ത്യാഗത്തിന്റെ തീജ്വാലയായി ജീവിച്ച ഗാന്ധിയൻ സ്വാതന്ത്ര്യസമര സേനാനി മുല്ലപ്പള്ളി ഗോപാലൻ

ഇന്ന് ഇരുപത്തിയാറാം സ്‌മൃതി ദിനം 

ഒരു രാജ്യത്തിന്റെ സ്വാതന്ത്ര്യം ചരിത്രത്തിൽ രേഖപ്പെടുത്തുന്നത് യുദ്ധവി ജയങ്ങളാലോ ഭരണാധികാരികളുടെ പ്രഖ്യാപനങ്ങളാലോ മാത്രമല്ല; സ്വന്തമെന്നു കരുതിയ സകലതും രാജ്യത്തിനുവേണ്ടി സമർപ്പിച്ച സാധാരണ മനുഷ്യരുടെ അസാധാരണ ജീവിതങ്ങളിലൂടെയാണ്. അത്തരം മഹനീയ രായ ദേശസ്നേഹികളുടെ നിരയിൽ എന്നും ആദരവോടെ ഓർക്കപ്പെടേണ്ട പേരാണ് മുല്ലപ്പള്ളി ഗോപാലൻ.

ത്യാഗവും നിസ്വാർത്ഥതയും സത്യനിഷ്ഠയും ജീവിതത്തിന്റെ ശ്വാസമായി സ്വീകരിച്ച അദ്ദേഹം, ചോമ്പാലിന്റെ മണ്ണിൽ വളർന്ന ഒരു സ്വാതന്ത്ര്യസമ രസേനാനി മാത്രമായിരുന്നില്ല; ഗാന്ധിയൻ മൂല്യങ്ങളെ ജീവിതത്തിന്റെ ഓരോ നിമിഷത്തിലും പ്രവർത്തിയിലൂടെ തെളിയിച്ച അപൂർവ വ്യക്തിത്വ മായിരുന്നു. അധികാരമോ സ്ഥാനമാനങ്ങളോ ഒരിക്കലും ലക്ഷ്യമാക്കാതെ, ജനസേവനത്തെ മാത്രം ജീവിതധർമമായി കണ്ട ഒരു യഥാർഥ ഗാന്ധിയൻ.

ദേശസ്നേഹത്തിന്റെ വിത്തുകൾ മുളച്ച ബാല്യം

1914 ജനുവരി 25-ന് ചോമ്പാലിൽ മാണിക്കോത്ത് കണ്ണന്റെ മകനായി ജനിച്ച മുല്ലപ്പള്ളി ഗോപാലന് ബാല്യകാലം മുതൽ ദേശീയ പ്രസ്ഥാനത്തിന്റെ ആശയങ്ങൾ ഹൃദയത്തിൽ ആഴത്തിൽ പതിഞ്ഞിരുന്നു. പ്രാഥമിക വിദ്യാഭ്യാസത്തിനുശേഷം അദ്ദേഹത്തിന്റെ ചിന്തകൾ മുഴുവൻ സ്വാതന്ത്ര്യസമരത്തിന്റെ വഴികളിലേക്കാണ് ഒഴുകിയത്.

മഹാത്മാഗാന്ധിയുടെ ജീവിതവും സന്ദേശങ്ങളും അദ്ദേഹത്തിന് വെറും പ്രചോദനമായിരുന്നില്ല; അത് ജീവിതത്തിന്റെ വഴികാട്ടിയായിരുന്നു. ഗാന്ധിജിയുടെ ആഹ്വാനങ്ങൾ അദ്ദേഹത്തിന്റെ മനസ്സിൽ കെടുത്താനാകാത്ത ദേശസ്നേഹത്തിന്റെ ദീപം തെളിച്ചു. പിന്നീടുള്ള ജീവിതം മുഴുവൻ ആ ദീപശിഖ കെടാതെ ജ്വലിച്ചുകൊണ്ടേയിരുന്നു.

ക്വിറ്റ് ഇന്ത്യാ സമരത്തിലെ ജ്വലിക്കുന്ന സാന്നിധ്യം

സ്വാതന്ത്ര്യസമരത്തിന്റെ തീക്ഷ്ണമായ ദിനങ്ങളിൽ ചോമ്പാലിൽ കോൺഗ്രസ് പ്രവർത്തനങ്ങൾക്ക് കരുത്തും ദിശയും നൽകിയ നേതാക്കളിൽ പ്രമുഖനായിരുന്നു മുല്ലപ്പള്ളി ഗോപാലൻ. ക്വിറ്റ് ഇന്ത്യാ സമരകാലത്ത് ചോമ്പാൽ വില്ലേജ് കോൺഗ്രസ് കമ്മിറ്റി സെക്രട്ടറിയായും കുറുമ്പ്രനാട് താലൂക്ക് കമ്മിറ്റി അംഗമായും അദ്ദേഹം പ്രവർത്തിച്ചു.

1942 ആഗസ്റ്റ് 14-ന് ചോമ്പാലിൽ നിന്ന് ഗ്രാമങ്ങളിലൂടെ പദയാത്രയായി കോഴിക്കോട്ടെത്തി കളക്ടറേറ്റ് പിക്കറ്റ് ചെയ്ത് അറസ്റ്റിലായ സംഘത്തിന് നേതൃത്വം നൽകിയത് അദ്ദേഹമായിരുന്നു. ആ ധീരനേതാവിന് രണ്ടു മാസം കോഴിക്കോട് സബ് ജയിലിൽ തടവുജീവിതം അനുഭവിക്കേണ്ടിവന്നു. പിന്നീട് 1943-ൽ ക്വിറ്റ് ഇന്ത്യാ സമരവുമായി ബന്ധപ്പെട്ട് രണ്ടുതവണ കൂടി കണ്ണൂർ സെൻട്രൽ ജയിലിൽ തടവുശിക്ഷ അനുഭവിച്ചു.

ജയിൽവാസം അദ്ദേഹത്തിന്റെ മനസ്സിനെ തളർത്തിയില്ല. മറിച്ച്, സ്വാതന്ത്ര്യത്തിന്റെ സ്വപ്നത്തിന് കൂടുതൽ ശക്തി പകർന്നു.

ധീരപ്രതിരോധങ്ങളുടെ നായകൻ

ചോമ്പാലിലെ റെയിൽപാളത്തിൽ നടന്ന അട്ടിമറി, ടെലിഗ്രാഫ് കമ്പികൾമുറിച്ചുനീക്കൽ, ഉപ്പ് ഡിപ്പോ കുത്തിത്തുറക്കൽ തുടങ്ങിയ ബ്രിട്ടീഷ് ഭരണത്തിനെതിരായ പ്രതിഷേധപ്രവർത്തനങ്ങളിൽ അദ്ദേഹം മുഖ്യസൂത്രധാരനായിരുന്നു.

വിദേശവസ്ത്ര ബഹിഷ്കരണം, കള്ളുഷാപ്പ് പിക്കറ്റിംഗ്, സാമൂഹിക നവോത്ഥാന പ്രവർത്തനങ്ങൾ എന്നിവയിലും അദ്ദേഹം സജീവമായി പങ്കെടുത്തു.

മദ്രാസ് ഗവർണർ കണ്ണൂരിലേക്ക് സഞ്ചരിച്ച തീവണ്ടിയെ തടയുന്നതിനായി ചോമ്പാലിനടുത്ത ചിറയിൽപീടികയിലെ ഓവുപാലം തകർക്കാനുള്ള ധീരശ്രമത്തിന് നേതൃത്വം നൽകിയത് മുല്ലപ്പള്ളി ഗോപാലനും കൊയിലോത്ത് കുഞ്ഞിക്കണ്ണക്കുറുപ്പുമായിരുന്നു. ജീവൻ പോലും പണയംവെച്ച പോരാട്ടമായിരുന്നു അത്.

മനുഷ്യസ്നേഹത്തിന്റെ മറ്റൊരു മുഖം

സ്വാതന്ത്ര്യസമരം അദ്ദേഹത്തിന് രാഷ്ട്രീയപ്രവർത്തനം മാത്രമായിരുന്നില്ല; അത് മനുഷ്യസേവനത്തിന്റെ വിശാലമായ വഴിയായിരുന്നു.

1943-ലെ ക്ഷാമകാലത്ത് വിശപ്പും ദാരിദ്ര്യവും കൊണ്ട് വലയുന്ന അനാഥരെയും നിരാശ്രയരെയും സഹായിക്കുന്നതിലും കോളറ ബാധിച്ച രോഗികളെ ശുശ്രൂഷിക്കുന്നതിലും അദ്ദേഹം മുന്നിലുണ്ടായിരുന്നു.

ദേശസ്നേഹത്തോടൊപ്പം മനുഷ്യസ്നേഹവും ഒരുപോലെ ഹൃദയത്തിൽ സൂക്ഷിച്ച അപൂർവ പൊതുപ്രവർത്തകനായിരുന്നു അദ്ദേഹം.

മയ്യഴി വിമോചന സമരത്തിലെ പോരാളി

1947-ൽ ഇന്ത്യ സ്വതന്ത്രമായെങ്കിലും മയ്യഴി ഇപ്പോഴും ഫ്രഞ്ച് അധീനതയിലാ യിരുന്നു. അതിനാൽ അദ്ദേഹത്തിന്റെ പോരാട്ടവും അവസാനിച്ചില്ല.

മയ്യഴി വിമോചന സമരത്തിൽ ഐ.കെ. കുമാരൻ മാസ്റ്ററോടൊപ്പം സജീവമായി പ്രവർത്തിച്ച അദ്ദേഹത്തിന് ഫ്രഞ്ച് ഭരണകൂടം 29 വർഷത്തെ കഠിനതടവ് ശിക്ഷ വിധിച്ചു. എന്നാൽ പോലീസിന് കീഴടങ്ങാതെ അഴിയൂരിൽ ഒളിവിൽ കഴിയുകയും സമരത്തിന് നേതൃത്വം നൽകുകയും ചെയ്തു.

അധികം വൈകാതെ മയ്യഴി സ്വതന്ത്രമായി. ആ വിജയത്തിന്റെ പിന്നിൽ അദ്ദേഹത്തെപ്പോലുള്ള അനേകം പോരാളികളുടെ ത്യാഗമുണ്ടായിരുന്നു.

വീട് പോലും പ്രസ്ഥാനത്തിന് സമർപ്പിച്ച ത്യാഗം

സ്വാതന്ത്ര്യസമര സേനാനികളുടെ ജീവിതത്തിൽ അനേകം ത്യാഗകഥകൾ ചരിത്രം രേഖപ്പെടുത്തിയിട്ടുണ്ട്. എന്നാൽ മുല്ലപ്പള്ളി ഗോപാലന്റെ ജീവിതത്തിലെ ഒരു സംഭവം അവയിൽ ഏറ്റവും ഹൃദയസ്പർശിയായ ഒന്നാണ്.

ഭാരതത്തിന്റെ ആദ്യ പ്രധാനമന്ത്രി ജവഹർലാൽ നെഹ്റു ചോമ്പാലിലെത്തിയപ്പോൾ അദ്ദേഹത്തെ സ്വീകരിക്കുന്നതിനായി രൂപീകരിച്ച സ്വാഗതസംഘത്തിന്റെ സെക്രട്ടറിയായിരുന്നു മുല്ലപ്പള്ളി ഗോപാലൻ.ആ സ്വാഗതസംഘത്തിന്റെ ചെലവുകൾക്കായി സ്വന്തം വീടും സ്ഥലവും വിറ്റ് ലഭിച്ച തുക മുഴുവൻ സംഭാവനയായി നൽകിയെന്നത് അദ്ദേഹത്തിന്റെ ജീവിതത്തിലെ ഏറ്റവും മഹത്തായ ത്യാഗങ്ങളിൽ ഒന്നാണ്.

 ഭാര്യ പാർവ്വതിയ്ക്കും മക്കൾക്കും സുരക്ഷിതമായി താമസിക്കാൻ മറ്റൊരു വീട് ഇല്ലെന്നറിഞ്ഞിട്ടും, പ്രസ്ഥാനത്തിന്റെ ആവശ്യമാണ് വലുതെന്ന് വിശ്വസിച്ച് സ്വന്തം വാസസ്ഥലം പോലും സമർപ്പിച്ച ആ മനസ്സ് ഇന്നത്തെ തലമുറയ്ക്ക് വിശ്വസിക്കാൻ പോലും പ്രയാസമാണ്.

സ്വാതന്ത്ര്യം നേടിയ ശേഷമാണ് ഈ സംഭവം നടന്നത് എന്നതുതന്നെ അദ്ദേഹത്തിന്റെ നിസ്വാർത്ഥതയുടെ ആഴം എത്രത്തോളമെന്ന് തെളിയിക്കുന്നു. അദ്ദേഹത്തിന് പ്രസ്ഥാനം അധികാരത്തിലേക്കുള്ള വഴി ആയിരുന്നില്ല; ജീവിതത്തിന്റെ ആത്മീയ ദൗത്യമായിരുന്നു.

ജീവിതത്തിന്റെ സന്ദേശം

"സത്യസന്ധനായിരിക്കുക. വാക്കിലും പ്രവർത്തിയിലും ആത്മാർത്ഥത പുലർത്തുക. പൊതുപ്രവർത്തനവും അധികാരവും കഷ്ടപ്പെടുന്ന ജനങ്ങളുടെ സേവനത്തിനുള്ള ഉപാധിയാക്കുക."

ഈ വാക്കുകൾ അദ്ദേഹം പ്രസംഗിച്ച മുദ്രാവാക്യങ്ങൾ മാത്രമായിരുന്നില്ല; ജീവിതംകൊണ്ട് എഴുതിയ സന്ദേശങ്ങളായിരുന്നു.

നിരവധി തവണ അഴിയൂർ മണ്ഡലം കോൺഗ്രസ് കമ്മിറ്റിയുടെ പ്രസിഡന്റായും സെക്രട്ടറിയായും പ്രവർത്തിച്ചെങ്കിലും അധികാരത്തിന്റെ തിളക്കമല്ല, സേവനത്തിന്റെ വെളിച്ചമാണ് അദ്ദേഹം എന്നും തെരഞ്ഞെടുത്തത്.

മഹത്തായ പാരമ്പര്യം

മുൻ കേന്ദ്ര ആഭ്യന്തര സഹമന്ത്രിയും കേരള പ്രദേശ് കോൺഗ്രസ് കമ്മിറ്റി പ്രസിഡന്റുമായിരുന്ന മുല്ലപ്പള്ളി രാമചന്ദ്രൻ ഉൾപ്പെടെ ഇന്ദിര, രവി, സാവിത്രി എന്നിവരാണ് അദ്ദേഹത്തിന്റെ മക്കൾ. ഇവരിൽ രവി ഇപ്പോഴില്ല .സമൂഹസേവനത്തിന്റെയും പൊതുപ്രവർത്തന ത്തിന്റെയും പാരമ്പര്യം കുടുംബത്തിലേക്കും പകർന്നുനൽകാൻ അദ്ദേഹത്തിന് കഴിഞ്ഞു.

കാലാതീതമായ ഓർമ്മ

2000 ജൂലൈ 22-ന്, തന്റെ 86-ാം വയസ്സിൽ മുല്ലപ്പള്ളി ഗോപാലൻ ഈ ലോകത്തോട് വിടപറഞ്ഞു. എന്നാൽ അദ്ദേഹത്തിന്റെ ജീവിതം അവസാനിച്ചില്ല; അത് ചരിത്രത്തിന്റെ പേജുകളിലും ചോമ്പാലിന്റെ മണ്ണിലും ദേശസ്നേഹികളുടെ ഹൃദയങ്ങളിലും ഇന്നും ജീവിക്കുന്നു.

ത്യാഗം ഒരു വാക്കല്ല, ജീവിതമാണെന്ന് തെളിയിച്ച മനുഷ്യനായിരുന്നു അദ്ദേഹം. രാഷ്ട്രീയം അധികാരത്തിന്റെ പടവുകളല്ല, ജനസേവനത്തിന്റെ യാഗവേദിയാണെന്ന് തന്റെ ജീവിതംകൊണ്ട് കാണിച്ച മഹാനായ ഗാന്ധിയൻ.

സ്വന്തം കുടുംബത്തിന്റെ സുഖസൗകര്യങ്ങളെക്കാൾ രാജ്യത്തിന്റെ സ്വാതന്ത്ര്യവും ജനങ്ങളുടെ നന്മയും വിലമതിച്ച ആ മഹാമനുഷ്യന്റെ ജീവിതം ഇന്നും നമ്മോട് ഒരു ചോദ്യം ചോദിക്കുന്നു— നമുക്ക് ലഭിച്ച സ്വാതന്ത്ര്യത്തിന്റെ വില നാം ശരിക്കും തിരിച്ചറിയുന്നുണ്ടോ?

ശ്രീ .മുല്ലപ്പള്ളി ഗോപാലന്റെ 26-ാം ചരമവാർഷികത്തിൽ, ദേശസ്നേഹത്തിന്റെ ആ മഹാദീപത്തിന് മുന്നിൽ പ്രണാമം. അദ്ദേഹത്തിന്റെ ത്യാഗജീവിതം വരുംതലമുറകൾക്ക് എന്നും പ്രചോദനമായി നിലനിൽക്കട്ടെ .....

:ദിവാകരൻ ചോമ്പാല