കോവിഡ് പുതിയ ഒമിക്രോൺ വകഭേദം PJ.2.1 വിവിധ രാജ്യങ്ങളിൽ റിപ്പോർട്ട് ചെയ്തു; ഉയർന്ന വ്യാപനശേഷിയെന്ന് പഠനം

വിവിധ രാജ്യങ്ങളിൽ കോവിഡ് വ്യാപന ആശങ്ക വീണ്ടും ഉയർത്തി പുതിയ ഒമിക്രോൺ വകഭേദമായ PJ.2.1 സാന്നിധ്യം സ്ഥിരീകരിച്ചു. കാനഡ, അമേരിക്ക, യൂറോപ്പ്, സിംഗപ്പൂർ, ഓസ്ട്രേലിയ തുടങ്ങിയ രാജ്യങ്ങളിലാണ് ഈ പുതിയ വകഭേദം കണ്ടെത്തിയിരിക്കുന്നത്. ഒമിക്രോൺ വംശപരമ്പരയിൽപ്പെട്ട PJ.2.1-ന് സാധാരണ വകഭേദങ്ങളെ അപേക്ഷിച്ച് ഉയർന്ന വ്യാപനശേഷിയുണ്ടെന്നാണ് പ്രാഥമിക പഠനങ്ങൾ വ്യക്തമാക്കുന്നത്. എന്നാൽ നിലവിൽ കൂടുതൽ ഗുരുതരമായ രോഗാവസ്ഥയ്ക്കോ മരണനിരക്ക് വർധിക്കുന്നതിനോ ഈ വകഭേദം കാരണമാകുന്നതായി തെളിവുകളില്ലാത്തതിനാൽ പരിഭ്രാന്തിയുടെ ആവശ്യമില്ലെന്നും, പകരം ജാഗ്രതയാണ് വേണ്ടതെന്നും ആരോഗ്യവിദഗ്ധർ ചൂണ്ടിക്കാട്ടുന്നു.

​യുകെ ആസ്ഥാനമായുള്ള പ്രമുഖ മെഡിക്കൽ ഗവേഷണ ജേണലായ 'Journal of Infection'-ൽ 2026 ഒക്ടോബർ 24-ന് പ്രസിദ്ധീകരിച്ച പഠനത്തിലാണ് PJ.2.1-ന്റെ സ്വഭാവം സംബന്ധിച്ച വിവരങ്ങൾ പുറത്തുവന്നത്. ഒറ്റയടിക്ക് നിരവധി ജനിതക മാറ്റങ്ങളോടെ രൂപപ്പെടുന്ന 'സോൾട്ടേഷൻ വകഭേദങ്ങളിൽ' ഉൾപ്പെടുന്നതാണ് ഇത്. ഒമിക്രോൺ JN.1-ന്റെ പിൻഗാമിയായ MC.10.1.7 വംശപരമ്പരയിൽ നിന്നാണ് PJ.2.1 രൂപപ്പെട്ടതെന്നാണ് കണ്ടെത്തൽ. സ്പൈക്ക് പ്രോട്ടീനിലെ ജനിതക മാറ്റങ്ങൾ വൈറസിന്റെ വ്യാപനശേഷിയെയും പ്രതിരോധശേഷിയെ മറികടക്കാനുള്ള കഴിവിനെയും സ്വാധീനിക്കാമെന്ന് ഗവേഷകർ വിലയിരുത്തുന്നു.

​കാനഡയിലെ ഒന്റാറിയോയിൽ 2026 മേയ് 2-നാണ് ഈ വകഭേദം ആദ്യമായി കണ്ടെത്തിയത്. തുടർന്ന് അമേരിക്ക, ഫ്രാൻസ്, സ്പെയിൻ, സിംഗപ്പൂർ, ഓസ്ട്രേലിയ തുടങ്ങിയ വിവിധ രാജ്യങ്ങളിലും വ്യാപനം സ്ഥിരീകരിച്ചു. അതേസമയം, ഇന്ത്യയിൽ PJ.2.1-ന്റെ വ്യാപകമായ സാന്നിധ്യം ഇതുവരെ ഔദ്യോഗികമായി സ്ഥിരീകരിച്ചിട്ടില്ല. എങ്കിലും അന്താരാഷ്ട്ര യാത്രകൾ വർധിക്കുന്ന സാഹചര്യത്തിൽ രാജ്യത്ത് നിരീക്ഷണവും ജനിതക പരിശോധനയും ശക്തമാക്കേണ്ടതിന്റെ പ്രാധാന്യം വിദഗ്ധർ ഓർമ്മിപ്പിക്കുന്നു. ലോകാരോഗ്യ സംഘടനയുടെ നിലവിലെ വകഭേദ നിരീക്ഷണ പട്ടികയിൽ PJ.2.1-നെ 'ആശങ്കാജനകമായ വകഭേദം' ആയി ഉൾപ്പെടുത്തിയിട്ടില്ല.

​പനി, തൊണ്ടവേദന, ചുമ, കടുത്ത ക്ഷീണം, തലവേദന തുടങ്ങിയവയാണ് കോവിഡിന്റെ പ്രധാന ലക്ഷണങ്ങൾ. പ്രായമായവരും മറ്റ് ഗുരുതര ആരോഗ്യപ്രശ്നങ്ങളുള്ളവരും പ്രത്യേക ജാഗ്രത പാലിക്കണമെന്നും, തിരക്കേറിയ ഇടങ്ങളിൽ മാസ്ക് ധരിക്കുകയടക്കമുള്ള മുൻകരുതലുകൾ തുടരണമെന്നും ആരോഗ്യവകുപ്പ് നിർദ്ദേശിക്കുന്നു.