'പ്രധാനമന്ത്രി അംബാനീ… നിങ്ങളാണ് ഇന്ത്യയുടെ യഥാർത്ഥ ബോസെന്ന് തിരിച്ചറിഞ്ഞില്ല'; പരിഹസിച്ച് മസ്‌ക്

ന്യൂഡൽഹി: റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയെ 'പ്രധാനമന്ത്രി' എന്ന് പരിഹസിച്ചുവിളിച്ച് ഇലോൺ മസ്‌ക്. ഇന്ത്യയിലെ യഥാർത്ഥ ബോസ് അംബാനിയാണെന്ന് മനസ്സിലാക്കാൻ സാധിച്ചില്ലെന്ന് വ്യക്തമാക്കിക്കൊണ്ടാണ് മസ്‌ക് എക്‌സിലൂടെ (X) രംഗത്തെത്തിയത്.

​"പ്രിയപ്പെട്ട പ്രധാനമന്ത്രി അംബാനി, നിങ്ങളാണ് ഇന്ത്യയുടെ യഥാർത്ഥ ബോസെന്ന് തിരിച്ചറിയാത്തതിൽ എന്റെ മാപ്പ് സ്വീകരിക്കുക. ഇന്ത്യയിലെ പ്രബുദ്ധരായ ജനങ്ങളെ നിങ്ങളുടെ കുത്തകാവകാശം ഉപയോഗിച്ച് ചൂഷണം ചെയ്യുന്നത് തുടരാൻ സ്വാഭാവികമായും നിങ്ങൾ ആഗ്രഹിക്കും, എന്നാൽ സ്റ്റാർ ലിങ്കിന് മത്സരരംഗത്ത് വരാൻ നിങ്ങൾ അനുവാദം നൽകുമോ? ഇന്ത്യയിലും മറ്റ് രാജ്യങ്ങളിലും ഇന്റർനെറ്റ് ലഭ്യമല്ലാത്ത നിരവധി പ്രദേശങ്ങളുണ്ട്. ഇത് കുട്ടികളുടെ വിദ്യാഭ്യാസത്തിനുള്ള അവസരം ഇല്ലാതാക്കുന്നു, ചെറിയ വ്യാപാരികൾക്ക് അവരുടെ ഉൽപ്പന്നങ്ങൾ ആഗോള മാർക്കറ്റിൽ വിൽക്കുന്നതിനുള്ള അവസരം നഷ്ടപ്പെടുത്തുന്നു. ഇവരുടെയെല്ലാം ജീവിതം മാറ്റാൻ സ്റ്റാർലിങ്കിന് സാധിക്കും," എന്ന് മസ്‌ക് എക്‌സിൽ കുറിച്ചു.

​മസ്‌കിന്റെ ഉപഗ്രഹ ഇന്റർനെറ്റ് സേവനമായ സ്റ്റാർലിങ്കിന് ഇന്ത്യയിൽ പ്രവർത്തനാനുമതി ലഭിക്കാത്തതിനെ തുടർന്ന് എക്‌സിലൂടെ മസ്‌ക് നിരന്തരം വിമർശനങ്ങൾ ഉന്നയിക്കുന്നുണ്ട്. ഇതിന്റെ തുടർച്ചയായി തുടർച്ചയായ മൂന്നാം ദിവസമാണ് അംബാനിക്കെതിരെ മസ്‌ക് രംഗത്തുവരുന്നത്. സ്റ്റാർലിങ്കിന്റെ ഇന്ത്യൻ പ്രവേശനത്തെ രാജ്യത്തെ ചില കുത്തക മുതലാളിമാർ തടയുകയാണെന്ന് മസ്‌ക് മുൻപും ആരോപിച്ചിരുന്നു. എന്നാൽ മസ്‌കിന്റെ ആരോപണങ്ങൾ തള്ളി കേന്ദ്ര സർക്കാരും രംഗത്തെത്തിയിട്ടുണ്ട്.

​ഉപഗ്രഹ വിനിമയ (സാറ്റലൈറ്റ് കമ്മ്യൂണിക്കേഷൻ) സേവനങ്ങൾക്കായി ഇന്ത്യയിൽ നീതിപൂർവ്വവും വിവേചനരഹിതവുമായ ചട്ടക്കൂടാണ് നിലവിലുള്ളതെന്നും, രാജ്യത്ത് ലൈസൻസ് ലഭിക്കുന്ന ഓരോ ഏജൻസിയും സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തേണ്ടത് നിർബന്ധമാണെന്നും കേന്ദ്ര സർക്കാർ വ്യക്തമാക്കി. അതേസമയം, തനിക്ക് ഇന്ത്യയിൽ പ്രവർത്തിക്കാൻ ലൈസൻസ് ലഭിക്കുന്നില്ലെന്ന് വ്യക്തമാക്കുന്ന മസ്‌കിന്റെ പോസ്റ്റിന് പ്രതികരണവുമായി ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയും രംഗത്തെത്തി. മസ്‌കിനെ ഇന്ത്യയിലേക്ക് സ്വാഗതം ചെയ്തുകൊണ്ടാണ് രാഹുൽ ഗാന്ധി കുറിപ്പ് പങ്കുവെച്ചത്.