2026-ലെ നൊബേൽ സമാധാന പുരസ്‌കാരം ഇന്ത്യൻ വംശജ നവനീതം പിള്ളയ്ക്ക്

ഓസ്ലോ: 2026-ലെ നൊബേൽ സമാധാന പുരസ്‌കാരം ദക്ഷിണാഫ്രിക്കൻ നിയമവിദഗ്‌ധയായ നവനീതം പിള്ളയ്ക്ക് (നവി പിള്ള) ലഭിച്ചു. ഇന്ത്യൻ തമിഴ് വംശജയായ നവനീതം ദക്ഷിണാഫ്രിക്കൻ ഹൈക്കോടതിയിലെ ആദ്യത്തെ വെളുത്തവർഗക്കാരിയല്ലാത്ത വനിതാ ജഡ്‌ജിയായിരുന്നു. 85 വയസ്സുകാരിയായ അവർ 2008 മുതൽ 2014 വരെ ഐക്യരാഷ്ട്രസഭയുടെ (യു.എൻ.) മനുഷ്യാവകാശ മേധാവിയായി പ്രവർത്തിച്ചിട്ടുണ്ട്. അന്താരാഷ്ട്ര നീതിന്യായ കോടതിയിൽ ജഡ്ജായും റുവാണ്ടയ്ക്കായുള്ള അന്താരാഷ്ട്ര ക്രിമിനൽ ട്രൈബ്യൂണലിന്റെ പ്രസിഡന്റായും അവർ സേവനമനുഷ്ഠിച്ചിട്ടുണ്ട്.

​സമാധാനവും അന്താരാഷ്ട്ര നിയമവാഴ്ചയും പ്രോത്സാഹിപ്പിക്കുന്നതിനായി നടത്തിയ സമാനതകളില്ലാത്ത പ്രവർത്തനങ്ങൾ പരിഗണിച്ചാണ് പുരസ്‌കാരത്തിന് തിരഞ്ഞെടുത്തതെന്ന് നോർവീജിയൻ നൊബേൽ കമ്മിറ്റി ചെയർമാൻ യോർഗൻ വാട്നെ ഫ്രിഡ്നെസ് അറിയിച്ചു.

​യുദ്ധങ്ങളുടെയും സംഘർഷങ്ങളുടെയും എണ്ണം വർധിച്ചുവരുന്ന ഈ കാലഘട്ടത്തിൽ, ബലപ്രയോഗമോ അക്രമമോ കൂടാതെ സംഘർഷങ്ങൾ പരിഹരിക്കാനുള്ള കഴിവ് അന്താരാഷ്ട്ര നിയമവാഴ്ചയെ ആശ്രയിച്ചാണിരിക്കുന്നതെന്ന് ഓർമിപ്പിക്കാനാണ് നൊബേൽ കമ്മിറ്റി ആഗ്രഹിക്കുന്നതെന്ന് വാർത്താക്കുറിപ്പിൽ വ്യക്തമാക്കി. യുദ്ധക്കുറ്റവാളികൾ ഉത്തരവാദിത്തം ഏറ്റെടുക്കുകയും അതിക്രമങ്ങൾക്ക് ഇരയായവർക്ക് നീതി ലഭിക്കുകയും ചെയ്യുന്ന അന്താരാഷ്ട്ര നിയമവ്യവസ്ഥ സമാധാനപരമായ ലോകത്തിന് അനിവാര്യമാണെന്നും കമ്മിറ്റി കൂട്ടിച്ചേർത്തു.

​ലോകത്തിലെ ഏറ്റവും അഭിമാനകരമായ പുരസ്കാരങ്ങളിലൊന്നായാണ് നൊബേൽ സമാധാന പുരസ്‌കാരം കണക്കാക്കപ്പെടുന്നത്. സമാധാന പുരസ്‌കാരത്തിന്റെ 125-ാം വാർഷികമാണ് ഈ വർഷം. ഈ വർഷത്തെ പുരസ്കാരത്തിനായി നോർവീജിയൻ നൊബേൽ കമ്മിറ്റി 287 പേരുടെയും സംഘടനകളുടെയും നാമനിർദേശങ്ങൾ സ്വീകരിച്ചിരുന്നു. സമാധാനത്തിന്റെ ദീർഘകാല നിലനിൽപ്പ്, രാജ്യങ്ങൾക്കും ജനങ്ങൾക്കുമിടയിലെ സൗഹൃദം പ്രോത്സാഹിപ്പിക്കൽ, ഈ ലക്ഷ്യങ്ങൾ ശക്തിപ്പെടുത്തുന്ന സ്ഥാപനങ്ങളുടെ നിശ്ശബ്ദമായ പ്രവർത്തനങ്ങൾ എന്നിവയ്ക്കാണ് കമ്മിറ്റി സാധാരണയായി പ്രാധാന്യം നൽകുന്നത്.

​കഴിഞ്ഞ വർഷം വെനസ്വേലയിലെ പ്രതിപക്ഷ നേതാവ് മരിയ കൊറീന മച്ചാഡോയ്ക്കാണ് നൊബേൽ സമാധാന പുരസ്‌കാരം ലഭിച്ചത്. തെക്കേ അമേരിക്കൻ രാജ്യത്ത് ജനാധിപത്യപരമായ അധികാരമാറ്റം സാധ്യമാക്കാനുള്ള പോരാട്ടത്തിനാണ് കഴിഞ്ഞ തവണ അംഗീകാരം ലഭിച്ചിരുന്നത്.