ലോകം ഒരു കുടുംബം; റൊമാനിയയെ ആത്മീയധന്യമാക്കി ശ്രീശ്രീ രവിശങ്കർ ജിയുടെ സന്ദർശനം

റൊമാനിയയിലെ ഇന്ത്യൻ അംബാസഡർ ഡോ. മനോജ് മഹാപാത്ര, ഇറ്റാലിയൻ അംബാസഡർ ലോറ അഗിലാർ, ബുക്കാറെസ്റ്റ് പബ്ലിക് അഡ്മിനിസ്ട്രേറ്റർ ലൂസിയൻ ജൂഡെലെ എന്നിവരടക്കം നയതന്ത്ര-സാമൂഹിക രംഗത്തെ പ്രമുഖർ ചടങ്ങിൽ സംബന്ധിച്ചു. 'വസുധൈവ കുടുംബകം' (ലോകം ഒരൊറ്റ കുടുംബം) എന്ന ഭാരതീയ ദർശനത്തെ മുൻനിർത്തിയാണ് ഇന്ത്യൻ അംബാസഡർ ചടങ്ങിൽ സ്വാഗതപ്രഭാഷണം നടത്തിയത്. ലോകസമാധാനത്തിന് വഴികാട്ടാൻ ഭാരതീയ ജ്ഞാനത്തിനും ആത്മീയ ഗുരുക്കന്മാർക്കും സാധിക്കുമെന്ന് അദ്ദേഹം അഭിപ്രായപ്പെട്ടു.

ചടങ്ങിൽ റൊമാനിയൻ പരമ്പരാഗത വസ്ത്രമായ 'വെസ്റ്റും' തൊപ്പിയും അണിഞ്ഞാണ് ശ്രീശ്രീ രവിശങ്കർ ജി ജനങ്ങളെ അഭിസംബോധന ചെയ്തത്. ലോകപ്രശസ്ത റൊമാനിയൻ സംഗീതജ്ഞനായ ഡാമിയൻ ഡ്രാഗിച്ചിയുടെ മാന്ത്രികമായ പുല്ലാങ്കുഴൽ കച്ചേരിയും 'ദോത്സാ' ഗ്രൂപ്പിന്റെ പരമ്പരാഗത നൃത്ത രൂപങ്ങളും പരിപാടിക്ക് സാംസ്കാരിക ചാരുതയേകി. അതിർത്തി കടന്ന് 30 മണിക്കൂറിലധികം യാത്ര ചെയ്ത് എത്തിയ യുക്രെയ്നിൽ നിന്നുള്ള പ്രത്യേക പ്രതിനിധി സംഘവും പരിപാടിയിൽ പങ്കാളികളായി.

തുടർന്ന് പ്രശസ്ത റൊമാനിയൻ നടിയും സംവിധായികയുമായ ക്രിസ്റ്റീന സെപ്രെഗയുമായി നടത്തിയ ആഴത്തിലുള്ള സംവാദത്തിൽ ജീവിതം, വിധി, കർമ്മം, മാനസികാരോഗ്യം എന്നിവയെക്കുറിച്ച് അദ്ദേഹം മനസ്സ് തുറന്നു.

വിധിയും സ്വതന്ത്ര ഇച്ഛയും: ജീവിതം വിധിയുടെയും നമ്മുടെ തീരുമാനങ്ങളുടെയും (Free Will) ഒരു മിശ്രിതമാണ്. നമ്മുടെ ശരീരത്തിന്റെ ഉയരം വിധിയാണെങ്കിൽ, ഭാരം നിയന്ത്രിക്കുന്നത് നമ്മുടെ തീരുമാനങ്ങളാണ്. അതുപോലെ ശരിയായ കർമ്മങ്ങളിലൂടെ ഭാവി മാറ്റിയെടുക്കാം.

ധ്യാനം മാനസിക ശുചിത്വം: 45 വർഷങ്ങൾക്ക് മുൻപ് ധ്യാനത്തെ ആളുകൾ സംശയത്തോടെയാണ് കണ്ടിരുന്നതെങ്കിൽ, ഇന്ന് ശാസ്ത്രം അതിന്റെ ഗുണങ്ങൾ തെളിയിച്ചിട്ടുണ്ട്. ധ്യാനം എന്നത് മനസ്സിനെ നിർബന്ധിച്ച് ഏകാഗ്രമാക്കലല്ല, മറിച്ച് പൂർണ്ണമായ ആഴത്തിലുള്ള വിശ്രമമാണ്.

ശ്വാസത്തിന്റെ രഹസ്യം: നമ്മുടെ വികാരങ്ങൾ ശ്വാസത്തിന്റെ താളവുമായി നേരിട്ട് ബന്ധപ്പെട്ടിരിക്കുന്നു. നെഗറ്റീവ് ചിന്തകളിൽ നിന്നും വിഷാദത്തിൽ നിന്നും കൃത്യമായ ശ്വസന വ്യായാമങ്ങളിലൂടെ (Sudarshan Kriya) പെട്ടെന്ന് മുക്തി നേടാം.

റൊമാനിയയിലെ ജനങ്ങളുടെ സന്തോഷ സൂചിക (Happiness Index) മുൻപന്തിയിൽ എത്തിക്കുന്നതിനായി രാജ്യത്തുടനീളം 'ഹാപ്പിനസ് സെന്ററുകൾ' ആരംഭിക്കുമെന്നും അതിനായി കൂടുതൽ ഇൻസ്ട്രക്ടർമാരെ പരിശീലിപ്പിക്കുമെന്നും അദ്ദേഹം പ്രഖ്യാപിച്ചു. ശ്രീശ്രീ രവിശങ്കർ ജിയുടെ 'ജേർണി വിത്തിൻ' (Călătorie spre interior) എന്ന പുസ്തകത്തിന്റെ റൊമാനിയൻ പരിഭാഷയും ചടങ്ങിൽ പ്രകാശനം ചെയ്തു. ലോകസമാധാനത്തിനായുള്ള കൂട്ടായ പ്രാർത്ഥനയോടും ആഴത്തിലുള്ള ധ്യാനത്തോടും കൂടിയാണ് പരിപാടി സമാപിച്ചത്.

ലിങ്കിൽ ക്ലിക്ക് ചെയ്തു വീഡിയോ കണ്ടാലും 

https://www.youtube.com/live/U4WE8PSY7B4