ചന്ദ്രന്റെ കാണാപ്പുറങ്ങൾ കണ്ട് ആർട്ടെമിസ് 2 മടങ്ങിയെത്തി; ഓറിയോൺ പേടകം പസഫിക് സമുദ്രത്തിൽ പതിച്ചു

ഹൂസ്റ്റൺ: ദശാബ്ദങ്ങൾ നീണ്ട കാത്തിരിപ്പിന് വിരാമമിട്ട് ചന്ദ്രന്റെ ഭ്രമണപഥത്തിലേക്ക് മനുഷ്യനെ വീണ്ടും എത്തിച്ച ചരിത്രദൗത്യം ആർട്ടെമിസ് 2 വിജയകരമായി പൂർത്തിയാക്കി. 54 വർഷങ്ങൾക്ക് ശേഷം ചന്ദ്രനെ വലംവെച്ച നാലംഗ യാത്രികർ പത്ത് ദിവസം നീണ്ട ദൗത്യം പൂർത്തിയാക്കി സുരക്ഷിതരായി ഭൂമിയിൽ തിരിച്ചെത്തി. ചന്ദ്രന്റെ മറുപുറം (Dark side of the Moon) നേരിൽ കാണുകയും സുപ്രധാനമായ ചിത്രങ്ങളും വിവരങ്ങളും ശേഖരിക്കുകയും ചെയ്ത ശേഷമാണ് സംഘം മടങ്ങിയത്.

​ഇന്ത്യൻ സമയം പുലർച്ചെ 5.07-ഓടെ ഭൗമാന്തരീക്ഷത്തിൽ പ്രവേശിച്ച ഓറിയോൺ പേടകം 5.37-ന് പസഫിക് സമുദ്രത്തിൽ പതിച്ചു. സാൻറിയാഗോ തീരത്തോട് ചേർന്നാണ് പേടകത്തിന്റെ സ്പ്ലാഷ് ഡൗൺ നടന്നത്. കമാൻഡർ റീഡ് വൈസ്മാൻ, പൈലറ്റ് വിക്ടർ ഗ്ലോവർ, ക്രിസ്റ്റീന കുക്ക്, ജെറമി ഹാൻസൻ എന്നിവരടങ്ങുന്ന സംഘമാണ് ഈ ചരിത്രയാത്രയുടെ ഭാഗമായത്. ചന്ദ്രോപരിതലത്തിൽ ഇറങ്ങിയില്ലെങ്കിലും, ഭൂമിയിൽ നിന്ന് ഏറ്റവും കൂടുതൽ ദൂരം സഞ്ചരിച്ച മനുഷ്യർ എന്ന റെക്കോർഡ് ഈ നാലംഗ സംഘം സ്വന്തമാക്കി.

​1972-ലെ അപ്പോളോ 17 ദൗത്യത്തിന് ശേഷം ആദ്യമായാണ് മനുഷ്യൻ ചന്ദ്രന്റെ ഭ്രമണപഥത്തിലേക്ക് യാത്ര ചെയ്യുന്നത്. 2022-ൽ മനുഷ്യരില്ലാതെ നടത്തിയ ആർട്ടെമിസ് 1 ദൗത്യത്തിന്റെ വിജയത്തിന് പിന്നാലെയാണ് നാസ ആർട്ടെമിസ് 2 വിക്ഷേപിച്ചത്. ചന്ദ്രനെ വലംവെച്ച് പകർത്തിയ ചിത്രങ്ങളും വീഡിയോകളും വരും ദിവസങ്ങളിൽ പഠനവിധേയമാക്കും. ആർട്ടെമിസ് 4 ദൗത്യത്തിലൂടെ ചന്ദ്രനിൽ വീണ്ടും മനുഷ്യനെ ഇറക്കാനാണ് നാസ ലക്ഷ്യമിടുന്നത്. ഇതിനായുള്ള ഒരുക്കങ്ങളിൽ സുപ്രധാനമായ ചുവടുവെപ്പാണ് ഇപ്പോൾ പൂർത്തിയായത്.