യുഎഇയിൽ പ്രവാസികൾക്കും അനാഥക്കുട്ടികളെ സംരക്ഷിക്കാൻ അനുമതി

ദുബായ്: യുഎഇയിൽ ഇനി പ്രവാസികൾക്കും അനാഥരായ കുട്ടികളുടെസംരക്ഷണം ഏറ്റെടുക്കാം. നിലവിൽ ഇമിറാത്തി കുടുംബത്തിനോ അവിവാഹിതരായ ഇമിറാത്തി സ്ത്രീകൾക്കോ മാത്രമാണ് അനാഥക്കുട്ടികളുടെ സംരക്ഷണമേറ്റെടുക്കാൻ അനുമതിയുണ്ടായിരുന്നത്. 2022-ൽ പുറപ്പെടുവിച്ച ഈ നിയമത്തിലാണ് ഇപ്പോൾ ഭേദഗതി വരുത്തിയിരിക്കുന്നത്.

സംരക്ഷകർ യുഎഇയിലെ താമസക്കാരായിരിക്കണം എന്നതാണ് പ്രധാന വ്യവസ്ഥ, ദമ്പതിമാരാണെങ്കിൽ ഒരുമിച്ച് താമസിക്കുന്നവരായിരിക്കണം. ഇവർക്ക് കുറഞ്ഞത് 25 വയസ്സുണ്ടാവണം. രണ്ടുപേരും പകർച്ചവ്യാധികളുള്ളവരോ മാനസിക വെല്ലുവിളികൾ നേരിടുന്നവരോ ആകരുത്. കുട്ടിയെ വളർത്താനുള്ള സാമ്പത്തിക ശേഷിയുണ്ടായിരിക്കണം. അധികൃതർ അറിയിക്കുന്ന മറ്റ് വ്യവസ്ഥകളും പാലിക്കണം.

അവിവാഹിതരായ സ്ത്രീകൾക്കും അനാഥക്കുട്ടികളെ ഏറ്റെടുക്കാം. യുഎഇ നിവാസിയായ, അവിവാഹിതയോ വിവാഹമോചിതയോ ആയവർക്കാണ് അനുമതി. ഇവർക്ക് 30 വയസ്സ് പൂർത്തിയാവണം. കേസുകൾ ഉണ്ടായിരിക്കരുത്. കുട്ടിയുടെ സംരക്ഷണത്തിന് സാമ്പത്തികമായി കഴിവുണ്ടാകണം. അധികൃതർ പുറപ്പെടുവിക്കുന്ന മറ്റ് വ്യവസ്ഥകളും പാലിക്കണം.

അപേക്ഷകർ സ്ഥിരതയുള്ള വീടും പരിസരവുമുണ്ടെന്ന് രേഖാമൂലം അറിയിക്കണം. കുട്ടിയുടെ ഔദ്യോഗികമായി രേഖപ്പെടുത്തിയ അസ്തിത്വത്തെയോ വിശ്വാസങ്ങളേയോ സ്വാധീനിക്കാൻ പാടില്ല. കുട്ടിയുടെ വിദ്യാഭ്യാസവും അധികൃതർ നിശ്ചയിച്ച മറ്റ് കാര്യങ്ങളും മേൽനോട്ട സമിതി വിലയിരുത്തുകയും ഉറപ്പുവരുത്തുകയും ചെയ്യും. മാർഗനിർദേങ്ങൾ പാലിക്കുന്നുണ്ടോയെന്നും പരിശോധിക്കും. പാലിക്കാതിരിക്കുകയോ ലംഘിക്കുകയോ ചെയ്‌താൽ സംരക്ഷണാനുമതി പിൻവലിക്കും.