പാക് പിന്തുണ: തുർക്കി സർവകലാശാലയുമായുള്ള കരാർ മരവിപ്പിച്ച് ജെഎൻയു

ന്യൂഡൽഹി: ഇന്ത്യ- പാക് സംഘർഷത്തിൽ പാകിസ്‌താനെ പിന്തുണച്ച തുർക്കിക്കെതിരേ ഇന്ത്യയിൽ എതിർപ്പ് രൂക്ഷമാകുന്നു. തുർക്കിയിലെ മലാത്യയിലുള്ള ഇനോനു സർവകലാശാലയുമായി ഏർപ്പെട്ട കരാർ ഡൽഹി ജവാഹർലാൽ നെഹ്‌റു സർവകലാശാല അനിശ്ചിതകാലത്തേക്ക് മരവിപ്പിച്ചു. ഇന്ത്യയിൽ നിന്നുള്ള വിനോദസഞ്ചാരികൾ തുർക്കിയിലേക്കും അസർബൈജാനിലേക്കുമുള്ള യാത്രകൾ കൂട്ടത്തോടെ റദ്ദാക്കി. ഈ രാജ്യങ്ങൾ സന്ദർശിക്കരുതെന്ന് ഈസ് മൈ ട്രിപ്പും ഇക്‌സിഗോയും നിർദേശിച്ചു.

ദേശീയ സുരക്ഷാ പരിഗണനകളാൽ ഇനോനു സർവകലാശാലയുമായുള്ള കരാർ മരവിപ്പിക്കുകയാണെന്ന് ജെഎൻയു എക്‌സ് പോസ്റ്റിൽ വ്യക്തമാക്കി. വിദ്യാഭ്യാസ വിനിമയത്തിനായി കഴിഞ്ഞ ഫെബ്രുവരിയിലാണ് ജെഎൻയുവും ഇനോനു സർവകലാശാലയും മൂന്നുവർഷ കരാർ ഒപ്പുവച്ചത്. തുർക്കിയുടെ ഉത്പന്നങ്ങൾ ബഹിഷ്കരിക്കാനുള്ള ആഹ്വാനവും വ്യാപകമായി ഉയരുന്നുണ്ട്.