ദീപാവലി: ഒരു വിളക്കിനപ്പുറം... വീടിന്റെ ആത്മാവിനെ ഉണർത്തുന്ന വാസ്തുദർശനം

അഞ്ചു ദിനങ്ങൾ, അഞ്ചു ആത്മീയ സന്ദേശങ്ങൾ; വെളിച്ചം തെളിയിക്കേണ്ടത് മുറികളിൽ മാത്രമല്ല, മനുഷ്യന്റെ മനസ്സിലും ജീവിതത്തിലും. മനുഷ്യനും പ്രകൃതിയും വസതിയും തമ്മിലുള്ള പവിത്രമായ പാരസ്പര്യത്തിന്റെ ആഘോഷമാണ് ദീപാവലി.

വാസ്തുഗുരു ഡോ. നിശാന്ത് തോപ്പിൽ

ദീപാവലി വരുമ്പോൾ വീടുകളിൽ വിളക്കുകൾ തെളിയുന്നു. മുറ്റങ്ങളിൽ വർണങ്ങൾ വിരിയുന്നു. വാതിലുകൾ പൂക്കളാലും തോരണങ്ങളാലും അല ങ്കരിക്കപ്പെടുന്നു. വീടുകൾ വൃത്തിയാക്കപ്പെടുന്നു. മധുരപലഹാരങ്ങൾ കൈമാറപ്പെടുന്നു. ഇരുട്ടിനെ അകറ്റി വെളിച്ചത്തെ സ്വീകരിക്കുന്ന ഈ ആഘോഷത്തിന് നാം നൽകുന്ന പൊതുവായ അർഥം നന്മയുടെ വിജയവും തിന്മയുടെ പരാജയവുമാണ്. എന്നാൽ ദീപാവലിയെ കേവലം ഒരു ഉത്സവമാ യല്ല, മനുഷ്യന്റെ ആത്മീയവും ഭൗതികവുമായ ജീവിതത്തെ ശുദ്ധീകരിക്കു ന്ന ഒരു മഹത്തായ ദർശനമായും കാണാനാകില്ലേ?ഒരു വീടിന്റെ വാതിൽ ക്കൽ തെളിയുന്ന ദീപം യഥാർഥത്തിൽ എന്തിനെയാണ് പ്രകാശിപ്പിക്കുന്നത് ? വീടിന്റെ അകത്തളങ്ങളെയോ, അതോ ആ വീടിനുള്ളിൽ ജീവിക്കുന്ന മനുഷ്യരുടെ ജീവിതത്തെയോ?ഇവിടെയാണ് ദീപാവലിയും വാസ്തുശാസ്ത്ര വും തമ്മിലുള്ള ആഴത്തിലുള്ള ബന്ധം പ്രസക്തമാകുന്നത്.വാസ്തു എന്നത് കെട്ടിടത്തിന്റെ ദിശകളും അളവുകളും മാത്രം നിർണയി ക്കുന്ന അറിവല്ല. മനുഷ്യനും ഭൂമിയും പ്രകൃതിയും തമ്മിലുള്ള സന്തുലിതമായ ബന്ധത്തെ ക്കുറിച്ചുള്ള വിശാലമായ ചിന്താപദ്ധതിയാണ്. ഭൂമി, ജലം, അഗ്നി, വായു, ആകാശം എന്നീ പഞ്ചഭൂതങ്ങളുടെ പാരസ്പര്യം, ദിശാബോധം, പ്രകൃതി വെളിച്ചം, വായുസഞ്ചാരം, സ്ഥലവിന്യാസം എന്നിവയെല്ലാം പരമ്പരാഗത വാസ്തുചിന്തയുടെ അടിസ്ഥാനഘടകങ്ങളാണ്.ഈ കാഴ്ചപ്പാടിൽ ദീപാവലി ഒരു പുതിയ ആത്മീയ അർഥം കൈവരിക്കുന്നു. പുറത്തെ ഇരുട്ടിനെ അകറ്റുന്നതിനൊപ്പം ഉള്ളിലെ അജ്ഞതയും നിരാശയും അകറ്റി വിവേക ത്തിന്റെയും പ്രതീക്ഷയുടെയും വെളിച്ചം സ്വീകരിക്കാനുള്ള സന്ദേശം കൂടിയാണത്.

അഞ്ചു ദിനങ്ങൾ; അഞ്ചു ആത്മീയ സന്ദേശങ്ങൾ

ദീപാവലി പല പ്രദേശങ്ങളിലും അഞ്ചു ദിവസങ്ങളിലായാണ് ആഘോഷി ക്കുന്നത്. ഓരോ ദിവസത്തിനും അതിന്റേതായ ആചാരങ്ങളും ഐതിഹ്യ ങ്ങളും ആത്മീയ സന്ദേശങ്ങളുമുണ്ട്. പ്രാദേശിക പാരമ്പര്യങ്ങൾക്കനുസരിച്ച് ആഘോഷക്രമത്തിലും പേരുകളിലും വ്യത്യാസങ്ങളുണ്ടെങ്കിലും ശുദ്ധീകരണം, ആരോഗ്യം, സമൃദ്ധി, കുടുംബസ്നേഹം, ബന്ധങ്ങളുടെ ദൃഢ ത എന്നീ മൂല്യങ്ങളാണ് ഈ ദിനങ്ങൾ മുന്നോട്ടുവയ്ക്കുന്നത്.

ധൻതേരസ്: ശുദ്ധിയുടെയും ആരോഗ്യത്തിന്റെയും സമൃദ്ധിയുടെയും തുടക്കം

ദീപാവലി ആഘോഷങ്ങൾക്ക് തുടക്കം കുറിക്കുന്ന ധൻതേരസ് അഥവാ ധൻത്രയോദശി സമ്പത്തിന്റെയും ആരോഗ്യത്തിന്റെയും പ്രാധാന്യം ഓർമിപ്പിക്കുന്ന ദിനമാണ്. ലക്ഷ്മീദേവിയെയും ആയുർവേദത്തിന്റെ ദേവതയായി കരുതപ്പെടുന്ന ധന്വന്തരിയെയും ഈ ദിവസം ആരാധിക്കുന്നു.

പുതിയ പാത്രങ്ങൾ, സ്വർണം, വെള്ളി, വീട്ടുപകരണങ്ങൾ എന്നിവ വാങ്ങു ന്നത് പല കുടുംബങ്ങളിലും ഈ ദിനത്തിലെ ആചാരമാണ്. എന്നാൽ ഈ ദിവസത്തിന്റെ ആത്മീയ സന്ദേശം സമ്പത്ത് സമ്പാദിക്കുന്നതിൽ മാത്രം ഒതുങ്ങുന്നില്ല. ആരോഗ്യമുള്ള ശരീരവും സമാധാനമുള്ള മനസ്സും സുരക്ഷി തമായ വീടുമാണ് യഥാർഥ സമ്പത്തിന്റെ അടിസ്ഥാനം.

വാസ്തുദർശനത്തിൽ ആരോഗ്യകരമായ വാസസ്ഥലം എന്നത് ശുദ്ധവായുവും പ്രകൃതിവെളിച്ചവും ശുചിത്വവും ക്രമീകരണവുമുള്ള ഇടമാണ്. വീടിന്റെ പരിസരം വൃത്തിയാക്കുകയും അനാവശ്യ വസ്തുക്കൾ നീക്കംചെയ്യുകയും ചെയ്യുന്നത് പുതിയ ഊർജത്തിനും ജീവിതക്രമത്തിനും ഇടം നൽകുന്ന പ്രതീകാത്മകമായ തുടക്കമാണ്.

നരക ചതുർദശി: അജ്ഞതയുടെ ഇരുട്ടിൽനിന്ന് ശുദ്ധീകരണത്തിന്റെ വെളിച്ചത്തിലേക്ക്

നരകാസുരനെ ശ്രീകൃഷ്ണൻ വധിച്ചതിന്റെ സ്മരണയുമായി ബന്ധപ്പെട്ടതാണ് നരക ചതുർദശി. തിന്മയ്ക്കുമേൽ നന്മ നേടിയ വിജയത്തിന്റെ സന്ദേശമാണ് ഈ ദിനം നൽകുന്നത്.

മഹാരാഷ്ട്ര ഉൾപ്പെടെയുള്ള ചില പ്രദേശങ്ങളിൽ പുലർച്ചെയുള്ള അഭ്യംഗ സ്നാനത്തിന് പ്രത്യേക പ്രാധാന്യമുണ്ട്. സുഗന്ധതൈലങ്ങൾ പുരട്ടി പരമ്പരാഗ ത ഉബ്ടൻ ഉപയോഗിച്ചുള്ള കുളി ശരീരശുദ്ധിയുടെയും പുതുക്കലിന്റെയും ആചാരമായി കണക്കാക്കപ്പെടുന്നു.

ഇതിനെ ആത്മീയമായി വായിക്കുമ്പോൾ ശരീരത്തിന്റെ ശുദ്ധീകരണത്തി നൊപ്പം മനസ്സിലെ അഹങ്കാരം, അസൂയ, വിദ്വേഷം, ദുഷ്ചിന്തകൾ എന്നിവ യും കഴുകിക്കളയേണ്ടതിന്റെ ഓർമപ്പെടുത്തലായി കാണാം.

വീടിന്റെ ഓരോ കോണും വൃത്തിയാക്കുന്നതുപോലെ മനസ്സിലെ അനാവ ശ്യ ചിന്തകളും ഒഴിവാക്കണം. വാസ്തുവിന്റെ യഥാർഥ പ്രസക്തി ആരംഭിക്കു ന്നത് മനുഷ്യൻ വസിക്കുന്ന ഇടത്തെയും അവന്റെ ജീവിതശൈലിയെയും ഒരുപോലെ പരിഗണിക്കുമ്പോഴാണ്.

ലക്ഷ്മീപൂജ: ഐശ്വര്യം എന്നത് സമ്പത്തിനപ്പുറമുള്ള ജീവിതസമൃദ്ധി

ദീപാവലിയുടെ ഏറ്റവും പ്രധാനപ്പെട്ട ആഘോഷദിനങ്ങളിലൊന്നാണ് ലക്ഷ്മീ പൂജ. സമ്പത്തിന്റെയും ഐശ്വര്യത്തിന്റെയും ക്ഷേമത്തിന്റെയും പ്രതീകമായ ലക്ഷ്മീദേവിയെയും വിഘ്നങ്ങൾ നീക്കുന്ന ഗണപതിയെയും പല പ്രദേശങ്ങളിലും ഈ ദിവസം ആരാധിക്കുന്നു.

വ്യാപാരികൾ പുതിയ കണക്കുപുസ്തകങ്ങൾ പൂജയ്ക്കുവയ്ക്കുകയും പുതി യ സാമ്പത്തിക വർഷത്തിനോ വ്യാപാരാരംഭത്തിനോ തുടക്കം കുറിക്കുകയും ചെയ്യുന്ന പാരമ്പര്യവും നിലനിൽക്കുന്നു.

എന്നാൽ സമൃദ്ധി എന്നത് പണവും സ്വർണവും മാത്രമാണോ?ഒരു വീട്ടിൽ ആരോഗ്യകരമായ അന്തരീക്ഷമുണ്ടെങ്കിൽ, കുടുംബാംഗങ്ങൾക്കിടയിൽ സ്നേഹവും പരസ്പരബഹുമാനവും നിലനിൽക്കുന്നുവെങ്കിൽ, സാമ്പത്തിക അച്ചടക്കവും സമാധാനവും സുരക്ഷിതത്വവുമുണ്ടെങ്കിൽ ആ വീടിനെയാ ണ് യഥാർഥത്തിൽ സമൃദ്ധമായ വീടെന്ന് വിളിക്കേണ്ടത്.

വാസ്തുശാസ്ത്രത്തിന്റെ വിശാലമായ ലക്ഷ്യവും മനുഷ്യജീവിതത്തിന് അനുയോജ്യമായ വാസസ്ഥലം സൃഷ്ടിക്കുകയാണ്. അതിനാൽ വീടിന്റെ ഐശ്വര്യം നിർണയിക്കുന്നത് അതിന്റെ വിസ്തീർണമോ വിലയേറിയ അലങ്കാരങ്ങളോ മാത്രമല്ല; അവിടെ ജീവിക്കുന്ന മനുഷ്യരുടെ സന്തോഷവും ആരോഗ്യവും കൂടിയാണ്.

ബലിപ്രതിപദ: സമത്വത്തിന്റെയും കുടുംബസ്നേഹത്തിന്റെയും ഓർമപ്പെടുത്തൽ

ബലിപ്രതിപദ അഥവാ ദീപാവലി പഡ്വ വിവിധ പ്രദേശങ്ങളിൽ വ്യത്യസ്തമാ യ ആചാരങ്ങളോടെ ആഘോഷിക്കുന്നു. മഹാബലി-വാമന ഐതിഹ്യവുമാ യി ബന്ധപ്പെടുത്തി ഈ ദിനത്തെ കാണുന്ന പാരമ്പര്യമുണ്ട്. മഹാരാഷ്ട്രയിൽ ഭാര്യാഭർത്താക്കന്മാർ തമ്മിലുള്ള സ്നേഹവും പരസ്പരബ ഹുമാനവും പുതുക്കുന്ന പഡ്വ എന്ന ആഘോഷത്തിനും പ്രത്യേക പ്രാധാന്യമുണ്ട്.ഇവിടെ ദീപാവലി കുടുംബബന്ധങ്ങളുടെ ആത്മീയതയിലേക്ക് നമ്മെ നയിക്കുന്നു.

ഒരു വീട് മനോഹരമാകുന്നത് അതിലെ ചുവരുകളുടെയും അലങ്കാരങ്ങളുടെയും ഭംഗികൊണ്ടല്ല. പരസ്പരം മനസ്സിലാക്കുന്ന മനുഷ്യരും സ്നേഹത്തോടെ പങ്കുവയ്ക്കുന്ന ജീവിതവുമാണ് അതിന്റെ യഥാർഥ സൗന്ദര്യം.

വാസ്തുവിന്റെ അടിസ്ഥാനലക്ഷ്യവും മനുഷ്യന് സന്തോഷത്തോടെ ജീവി ക്കാവുന്ന ഇടം ഒരുക്കുക എന്നതാണ്. ബന്ധങ്ങളിൽ ഐക്യവും ജീവിതത്തിൽ സന്തുലിതാവസ്ഥയും നിലനിൽക്കുമ്പോഴാണ് ഒരു വീട് യഥാർഥ വസതിയായി മാറുന്നത്.

ഭാവുബീജ്: സഹോദരബന്ധങ്ങളുടെ സ്നേഹദീപം

ദീപാവലിയുടെ അവസാനദിനമായി പല പ്രദേശങ്ങളിലും ആഘോഷിക്കു ന്ന ഭാവുബീജ് അഥവാ ഭായ് ദൂജ് സഹോദരീസഹോദരന്മാർ തമ്മിലുള്ള സ്നേഹബന്ധത്തിന്റെ ആഘോഷമാണ്.

സഹോദരിമാർ സഹോദരന്മാരുടെ ക്ഷേമത്തിനായി പ്രാർഥിക്കുകയും തില കം ചാർത്തി ആരതി ഉഴിയുകയും ചെയ്യുന്നു. സഹോദരന്മാർ സ്നേഹസമ്മാ നങ്ങൾ നൽകുന്നു.

കുടുംബബന്ധങ്ങൾ മനുഷ്യജീവിതത്തിലെ ഏറ്റവും വലിയ സമ്പത്താണെ ന്ന സന്ദേശമാണ് ഈ ദിനം നൽകുന്നത്. ഭൗതികമായ സമൃദ്ധിയേക്കാൾ വിലപ്പെട്ടത് പരസ്പരം താങ്ങും തണലുമാകുന്ന ബന്ധങ്ങളാണ്.

അഞ്ചു ദിവസത്തെ ഈ ആഘോഷക്രമം ഒടുവിൽ നമ്മെ പഠിപ്പിക്കുന്നത് ഒരേയൊരു കാര്യമാണ്: സമ്പത്തും ആരോഗ്യവും സന്തോഷവും സ്നേഹ വും ഒരുമിക്കുന്നിടത്താണ് യഥാർഥ ഐശ്വര്യം.