ആയുഷ്മാൻ ഭാരത് കാർഡ് കൈയിലുണ്ട്; ജീവൻ രക്ഷിക്കാൻ 1.60 ലക്ഷം കടം!

പിന്നെ എന്തിനാണ് ഈ കുടുംബത്തിന് ആയുഷ്മാൻ ഭാരത് കാർഡ്?

കേന്ദ്രസർക്കാർ വലിയ പ്രചാരണത്തോടെ നടപ്പാക്കിയ പ്രധാനമന്ത്രി ജൻ ആരോഗ്യ യോജനയുടെ (PM-JAY) ലക്ഷ്യം സാമ്പത്തികമായി പിന്നാക്കം നിൽക്കുന്ന കുടുംബങ്ങൾക്ക് ചികിത്സാ സാമ്പത്തിക പരിരക്ഷ ഉറപ്പാക്കുക എന്നതാണ്. എന്നാൽ പദ്ധതിയിൽ അംഗമായ ഒരു കുടുംബത്തിന് അത്യാഹിത ചികിത്സ വേണ്ടിവരുമ്പോൾ, കാർഡ് സ്വീകരിക്കുന്ന ആശുപത്രി കണ്ടെത്താൻ കഴിയാത്ത സാഹചര്യമു ണ്ടായാൽ ആ കാർഡിന്റെ പ്രയോജനം എന്താണ്?

തലശ്ശേരിയിലെ പ്രസ്തുത സ്വകാര്യ ആശുപത്രിയിൽ ആയുഷ്മാൻ ഭാരത് കാർഡ് ഉപയോഗിച്ച് ചികിത്സാ ആനുകൂല്യം ലഭ്യമാക്കാൻ കഴിഞ്ഞില്ലെ ന്നാണ് കുടുംബത്തിന്റെ അനുഭവം. ആശുപത്രി പദ്ധതിയിൽ അംഗീകൃത മല്ലാത്തതാണോ, അതോ ഈ പ്രത്യേക ചികിത്സയ്ക്ക് പദ്ധതിയുടെ പരിരക്ഷ ലഭിക്കാത്തതാണോ എന്നതടക്കമുള്ള കാര്യങ്ങൾ ബന്ധപ്പെട്ട അധികൃതർ വ്യക്തമാക്കണം.

ഓരോ ജില്ലയിലും പരിമിതമായ ആശുപത്രികളിൽ മാത്രമാണ് പദ്ധതിയുടെ സേവനം ലഭ്യമാകുന്നതെങ്കിൽ അതിന്റെ പ്രയോജനം സാധാരണക്കാരിലേക്ക് എങ്ങനെ എത്തും? നെഞ്ചുവേദനയുമായി അത്യാഹിത വിഭാഗത്തിലെത്തുന്ന ഒരു രോഗിയോട് ആദ്യം ചെയ്യേണ്ടത് അംഗീകൃത ആശുപത്രികളുടെ പട്ടിക പരിശോധിക്കലാണോ? അതോ ജീവൻ രക്ഷിക്കാനുള്ള അടിയന്തര ചികിത്സ ഉറപ്പാക്കലാണോ?

തീർച്ചയായും പദ്ധതിക്ക് നിശ്ചിത ആശുപത്രി ശൃംഖലയും ചികിത്സാ നിബന്ധനകളുമുണ്ടാകാം. എന്നാൽ അതിന്റെ പരിമിതികൾ രോഗികൾക്ക് വ്യക്തമായി അറിയിക്കാനും, അടിയന്തര ഘട്ടങ്ങളിൽ അർഹരായവർക്ക് പരിരക്ഷ ലഭ്യമാക്കുന്നതിനുള്ള പ്രായോഗിക സംവിധാനം ഒരുക്കാനും അധികാരികൾക്ക് ബാധ്യതയുണ്ട്.

സോഷ്യൽ മീഡിയയിൽ ആയുഷ്മാൻ ഭാരത് ആരോഗ്യപരിരക്ഷയെ ക്കുറിച്ചുള്ള പരസ്യങ്ങളും പ്രചാരണങ്ങളും നിറയുകയാണ്. എന്നാൽ ആനുകൂല്യം യഥാർഥത്തിൽ ലഭിക്കേണ്ടിവരുമ്പോൾ സാധാരണക്കാരൻ നേരിടുന്ന പ്രതിസന്ധികൾ ആരാണ് പരിഹരിക്കുക?

കാർഡ് കൈയിൽ കരുതിയതുകൊണ്ടുമാത്രം ചികിത്സ ഉറപ്പാകുന്നില്ലെ ങ്കിൽ ഇത്തരം പദ്ധതികളുടെ പ്രചാരണവും യാഥാർഥ്യവും തമ്മിലുള്ള അകലം ആരാണ് നികത്തുക?

അതേസമയം ഈ കാർഡ് ഉപയോഗിച്ച് എന്റെ മറ്റൊരുസുഹൃത്ത് ഉള്ളിയേരിയിലെ പ്രമുഖ ആശുപത്രിയിൽ കാൽമുട്ടിന് ഓപ്പറേഷൻ ചെയ്ത വകയിൽ രണ്ടര ലക്ഷം രൂപ ലഭിച്ച തായും സമ്മതിക്കുന്നു .

ജില്ലയിലെ പ്രധാന സർക്കാർ, സ്വകാര്യ ആശുപത്രികളിൽ പദ്ധതിയുടെ സേവനം എവിടെയൊക്കെയാണ് ലഭ്യമാകുന്നതെന്ന് പൊതുജനങ്ങൾക്ക് വ്യക്തമായി അറിയാൻ ഓൺലൈനിലൂടെ കഴിയുമെങ്കിലും ഈ സൗകര്യം ചിലർ നിഷേധിക്കുന്നതാണ് അറിവ് . അടിയന്തര ചികിത്സയ്ക്കുള്ള പരിരക്ഷ, അംഗീകൃത ആശുപത്രികളുടെ പട്ടിക, ചികിത്സാ നിബന്ധനകൾ എന്നിവയെല്ലാം സുതാര്യമായി പ്രസിദ്ധീകരിക്കണം. പദ്ധതിയിൽ ഉൾപ്പെട്ട ആശുപത്രികളിൽ അർഹരായ രോഗികൾക്ക് ചികിത്സാ ആനുകൂല്യം നിഷേധിക്കപ്പെടുന്നില്ലെന്നും ഉറപ്പാക്കണം.

ഇവിടെ ഒരു കുടുംബത്തിന്റെ കടബാധ്യത മാത്രമല്ല പ്രശ്നം. ഒരു പൊതുജനാരോഗ്യ പദ്ധതിയുടെ വിശ്വാസ്യത കൂടിയാണ് ചോദ്യം ചെയ്യപ്പെടുന്നത്.

ഒരുലക്ഷത്തി അറുപതിനായിരം രൂപ ആശുപത്രിയിൽ കെട്ടിവെക്കാൻ ആ മകൻ സഹായം തേടാത്ത ബന്ധുക്കളില്ല. ഇനി ആ കടം എങ്ങനെ വീട്ടും? സ്വർണം പണയംവെച്ചതെങ്ങനെ തിരിച്ചെടുക്കും? അമ്മയുടെ തുടർചികിത്സയ്ക്കുള്ള പണം എവിടെനിന്ന് കണ്ടെത്തും? ഈ ചോദ്യങ്ങൾക്ക് ആ കുടുംബത്തിന് മുന്നിൽ ഇപ്പോൾ ഉത്തരമില്ല.

ഇത് ദൈവനിയോഗമെന്നു പറഞ്ഞ് കൈകഴുകാനാവില്ല. പൊതുജനാരോഗ്യ സംവിധാനത്തിന്റെ ഭാഗത്തുനിന്നുണ്ടായ വീഴ്ചയുണ്ടെങ്കിൽ അത് ഗൗരവമായി പരിശോധിക്കപ്പെടേണ്ടതാണ്. അർഹമായ പരിരക്ഷ ലഭിക്കാതിരുന്നതിന് കാരണമെന്തെന്ന് അന്വേഷിച്ച് കുടുംബത്തിന് നീതി ഉറപ്പാക്കണം.

പ്രായമായ ഈ അമ്മയുടെ തുടർചികിത്സയ്ക്കും കുടുംബത്തിന്റെ കടബാധ്യത കുറയ്ക്കുന്നതിനും സുമനസ്സുകളുടെയും സന്നദ്ധ സംഘടനകളുടെയും സഹായം ലഭിക്കേണ്ടതുണ്ട്. അതിനൊപ്പം, ബന്ധപ്പെട്ട സർക്കാർ വകുപ്പുകളും ജനപ്രതിനിധികളും വിഷയത്തിൽ അടിയന്തരമായി ഇടപെടണം.

ആയുഷ്മാൻ ഭാരത് കാർഡ് പാവപ്പെട്ടവന്റെ കൈയിൽ വെറുമൊരു തിരിച്ചറിയൽ രേഖയായി ,അലങ്കാര വസ്തുവായി അവശേഷിക്കരുത്. അത് അവന് പ്രതിസന്ധി ഘട്ടത്തിൽ ആശ്രയിക്കാവുന്ന ആരോഗ്യസുരക്ഷ യായിരിക്കണം.

ഒരു അമ്മയുടെ ജീവൻ രക്ഷിക്കാൻ മകന് ഒന്നരലക്ഷത്തിലേറെ രൂപ കടം വാങ്ങേണ്ടിവന്നെങ്കിൽ, ആ കുടുംബത്തോട് ഒരു ചോദ്യം ചോദിക്കുന്നതി നുമുമ്പ് നമ്മുടെ ആരോഗ്യപരിരക്ഷാ സംവിധാനത്തോടാണ് സമൂഹം ചോദിക്കേണ്ടത്:

പാവപ്പെട്ടവന്റെ കൈയിൽ ആരോഗ്യകാർഡുണ്ട്. പക്ഷേ, അവന്റെ പ്രതിസന്ധിയിൽ ആ കാർഡ് എവിടെയാണ് ഉപകരിക്കുക ? ബന്ധപ്പെടാവുന്ന പ്രധാന ആശുപത്രികളിൽ എല്ലാം ഈ കാർഡ് സ്വീകരിക്കുന്ന അവസ്ഥ വരുന്നില്ലെങ്കിൽ ഇത് കേവലം ഒരു മോഹന വാഗ്ദാനമാണെന്നു തോന്നിയാൽ തെറ്റാവില്ല .

ചിത്രം :പ്രതീകാത്മകം 

: ദിവാകരൻ ചോമ്പാല