അധ്യക്ഷനില്ലാതെ കോൺഗ്രസ്; സംഘടനാ പ്രവർത്തനം മരവിച്ചെന്ന് മുല്ലപ്പള്ളി രാമചന്ദ്രൻ

സംഘടനാ പ്രവർത്തനങ്ങൾക്ക് നേതൃത്വം നൽകാൻ പുതിയ അധ്യക്ഷൻ വേണം; പുനഃസംഘടനയിൽ ഹൈക്കമാൻഡ് അടിയന്തരമായി ഇടപെടണമെന്നും ആവശ്യം : മുല്ലപ്പള്ളി

കോഴിക്കോട്: കെ.പി.സി.സി പ്രസിഡന്റില്ലാത്തത് സംസ്ഥാനത്ത് കോൺഗ്രസിന്റെ സംഘടനാ പ്രവർത്തനങ്ങളെ സാരമായി ബാധിക്കുന്നുവെന്ന് മുതിർന്ന കോൺഗ്രസ് നേതാവ് മുല്ലപ്പള്ളി രാമചന്ദ്രൻ. പുതിയ അധ്യക്ഷനെ നിയമിക്കാത്തതിനാൽ പാർട്ടിയുടെ സംസ്ഥാനതല പ്രവർത്തനം സ്തംഭനാവസ്ഥയിലാണെന്നും സുപ്രധാന രാഷ്ട്രീയ നിലപാടുകൾ സമയബന്ധിതമായി വ്യക്തമാക്കാൻ കഴിയാത്ത സാഹചര്യമാണുള്ളതെന്നും അദ്ദേഹം പറഞ്ഞു.

കെ.പി.സി.സി പുനഃസംഘടന ഉടൻ നടപ്പാക്കണമെന്ന ആവശ്യവും മുല്ലപ്പള്ളി മുന്നോട്ടുവച്ചു. പ്രസിഡന്റിന്റെ ചുമതലയിൽ നിന്ന് മാറിനിൽക്കാൻ തയ്യാറാണെന്ന് സണ്ണി ജോസഫ് അറിയിച്ചിട്ടുണ്ടെന്നും ഇക്കാര്യത്തിൽ ഹൈക്കമാൻഡാണ് ഉചിതമായ നടപടി സ്വീകരിക്കേണ്ടതെന്നും അദ്ദേഹം വ്യക്തമാക്കി.

സംഘടനാ ചുമതലയുള്ള നേതൃത്വത്തിന് കേരളത്തിലെ രാഷ്ട്രീയ സാഹചര്യങ്ങളെക്കുറിച്ച് വ്യക്തമായ ധാരണയുണ്ടാകണം. പാർട്ടിയുടെ പ്രവർത്തനം കാര്യക്ഷമമാക്കാൻ അധ്യക്ഷന്റെ നിയമനം വൈകിക്കരുതെന്നും മുല്ലപ്പള്ളി അഭിപ്രായപ്പെട്ടു.

അതേസമയം, നിലവിലെ സർക്കാരിന്റെ അഞ്ചുമാസത്തെ പ്രവർത്തനത്തിൽ താൻ പൂർണ തൃപ്തനാണെന്നും ഇത്രയും കുറഞ്ഞ കാലയളവിനുള്ളിൽ വികസനകാര്യങ്ങളിൽ ഇത്രയേറെ മുന്നോട്ടുപോയ മറ്റൊരു സർക്കാരിനെ കണ്ടിട്ടില്ലെന്നും അദ്ദേഹം പറഞ്ഞു. പ്രവർത്തനക്ഷമമായ സർക്കാരാണ് ഇപ്പോഴുള്ളതെന്നും മുല്ലപ്പള്ളി കൂട്ടിച്ചേർത്തു.