നായ കുരയ്ക്കുമ്പോൾ ആകാശം ഇടിഞ്ഞു വീഴില്ല : ഡോ .എം .എസ് .സുനിൽ

ചിലരുടെ വിമർശനങ്ങൾ കേട്ട് മനസ്സ് തളർത്തേണ്ടതില്ല. കാരണം, നമ്മൾ മുന്നോട്ടുപോകുമ്പോൾ പിന്നിൽനിന്ന് കല്ലെറിയുന്നവരും കുറ്റം പറയുന്നവരും ഉണ്ടാകും. ഓർക്കുക, നായ കുരച്ചതുകൊണ്ട് ആകാശം ഇടിഞ്ഞുവീഴില്ല; മറ്റുള്ളവരുടെ വാക്കുകൾകൊണ്ട് നമ്മുടെ മൂല്യവും ഇല്ലാതാകില്ല.

അസൂയയുള്ള മനുഷ്യന് ഒരിക്കലും മനസ്സമാധാനത്തോടെ ഉറങ്ങാൻ കഴിയില്ല. കാരണം, അവന്റെ ഉറക്കം കെടുത്തുന്നത് സ്വന്തം പരാജയങ്ങളേക്കാൾ മറ്റൊരാളുടെ വിജയമായിരിക്കും. മറ്റുള്ളവർ ഉയരുന്നത് കാണുമ്പോൾ സന്തോഷിക്കാൻ കഴിയാത്ത മനസ്സ്, സ്വന്തം ജീവിതത്തിലെ സന്തോഷങ്ങളെപ്പോലും തിരിച്ചറിയാതെ പോകും. മറ്റൊരാളുടെ നേട്ടത്തെ അംഗീകരിക്കാൻ കഴിയുന്നത് വലിയൊരു മനസ്സിന്റെ അടയാളമാണ്; അതിനെ താഴ്ത്തിക്കെട്ടാൻ ശ്രമിക്കുന്നത് സ്വന്തം ചെറുപ്പത്തെയാണ് വെളിപ്പെടുത്തുന്നത്.

നമ്മൾ ചെയ്യുന്ന നന്മകൾക്ക് കൈയടി കിട്ടണമെന്നില്ല. അഭിനന്ദനങ്ങളോ പുരസ്കാരങ്ങളോ തേടിവരണമെന്നുമില്ല. പക്ഷേ, വിശന്നിരിക്കുന്ന ഒരാൾക്ക് ഒരു നേരത്തെ ഭക്ഷണം നൽകാനും, കണ്ണീരോടെ നിൽക്കുന്ന ഒരാൾക്ക് ആശ്വാസത്തിന്റെ ഒരു വാക്ക് നൽകാനും, നിരാശയിൽ കഴിയുന്ന ഒരാൾക്ക് പ്രതീക്ഷയുടെ വെളിച്ചമാകാനും കഴിഞ്ഞാൽ, അതിനേക്കാൾ വലിയൊരു പുരസ്കാരം മറ്റെന്തുണ്ട്?

ഒരു പാവപ്പെട്ടവന്റെ കണ്ണുനീർ തുടയ്ക്കാൻ കഴിയുന്നതാണ് മനുഷ്യന് ലഭിക്കാവുന്ന ഏറ്റവും വലിയ അംഗീകാരങ്ങളിലൊന്ന്.

ജീവിതത്തിൽ നമ്മെ വിമർശിക്കുന്നവരേക്കാൾ വിലമതിക്കേണ്ടത് നമ്മളിലൂടെ ആശ്വാസം കണ്ടെത്തുന്നവരെയാണ്. നമ്മെക്കുറിച്ച് മറ്റുള്ളവർ എന്തുപറയുന്നു എന്നതല്ല, നമ്മളിലൂടെ മറ്റൊരാളുടെ ജീവിതത്തിൽ എന്തു മാറ്റമുണ്ടാകുന്നു എന്നതാണ് പ്രധാനം. കാരണം, വാക്കുകൾകൊണ്ട് ആരെയും ചെറുതാക്കാൻ ശ്രമിക്കാം; എന്നാൽ പ്രവൃത്തികൾകൊണ്ട് മാത്രമേ ഒരാൾക്ക് യഥാർഥത്തിൽ വലുതാകാൻ കഴിയൂ.

അതുകൊണ്ട്, നാളെ രാവിലെ ഉണരുമ്പോൾ ഇന്ന് നിങ്ങളെ കുറ്റം പറഞ്ഞവരെ ഓർത്ത് വിഷമിക്കരുത്. നിങ്ങളുടെ നന്മകളെ തിരിച്ചറിയാത്തവരോട് വിശദീകരണം നൽകാൻ ജീവിതം പാഴാക്കുകയുമരുത്. എല്ലാവരെയും ബോധ്യപ്പെടുത്താൻ നമുക്കാവില്ല; എല്ലാവരുടെയും മനസ്സിൽ നല്ലവരായി ജീവിക്കാനും കഴിയില്ല. പക്ഷേ, നമ്മുടെ മനസ്സാക്ഷിക്കു മുന്നിൽ തലകുനിക്കാതെ ജീവിക്കാൻ നമുക്കു കഴിയും.

കുറ്റം പറയുന്നവർ അവരുടെ വാക്കുകളിലൂടെ ചെറുതാകുമ്പോൾ, വിമർശനങ്ങൾക്കിടയിലും നന്മയുടെ വഴിയിൽ ഉറച്ചുനിൽക്കുന്നവർ പ്രവൃത്തികളിലൂടെ വലുതാകുന്നു. അതുകൊണ്ട് അസൂയയ്ക്ക് മറുപടി നൽകാൻ നമ്മുടെ സമയം പാഴാക്കേണ്ടതില്ല.

നമ്മുടെ, ആരുടെയെങ്കിലും വളർച്ചയും നമ്മുടെ നന്മകളും തന്നെയാകട്ടെ അതിനുള്ള മറുപടി.

നാളെ ഇനിയും സഹായം പ്രതീക്ഷിക്കുന്ന കുറേ മനുഷ്യരുണ്ട്. വിശപ്പടക്കാൻ ഒരു കൈത്താങ്ങ് തേടുന്നവർ, സങ്കടം പറയാൻ ഒരാളെ അന്വേഷിക്കുന്നവർ, വീണുപോയിടത്തുനിന്ന് എഴുന്നേൽക്കാൻ ഒരു പ്രോത്സാഹനവാക്ക് കാത്തിരിക്കുന്നവർ...

അവരിലേക്ക് എത്താൻ നമുക്കിനിയും സമയമുണ്ട്. ചെയ്യാൻ നന്മകളുണ്ട്. തുടയ്ക്കാൻ കണ്ണീരുകളുണ്ട്. പകരാൻ സ്നേഹമുണ്ട്.

അതുകൊണ്ട്, മറ്റുള്ളവർ നമ്മെക്കുറിച്ച് എന്തുപറയുന്നു എന്നോർത്ത് ഇന്നത്തെ സന്തോഷം നഷ്ടപ്പെടുത്തരുത്. പകരം, നാളെ ഒരാളുടെയെങ്കിലും മുഖത്ത് പുഞ്ചിരി വിരിയിക്കാൻ കഴിയുമല്ലോ എന്നോർത്ത് സന്തോഷത്തോടെ ഉറങ്ങുക.