ആഹാരം പാഴാക്കാതിരിക്കാം;

ഭക്ഷ്യസുരക്ഷയിൽ വിട്ടുവീഴ്ച അരുത് ; 

"ഭക്ഷ്യശ്രീ ' യുടെ ആരോഗ്യ മുന്നറിയിപ്പ്

തലേന്നത്തെ ബിരിയാണിയോ ചോറും കറിയോ ഫ്രിഡ്ജിലുണ്ടോ?

പിറ്റേന്ന് പാചകത്തിന്റെ തിരക്ക് കുറയ്ക്കാൻ ബാക്കിവന്ന ഭക്ഷണം വീണ്ടും ഉപയോഗി ക്കുന്നത് പല വീടുകളിലെയും പതിവാണ്. ഭക്ഷണം പാഴാക്കാതിരിക്കാനുള്ള ഈ ശീലം നല്ലതുതന്നെ. എന്നാൽ, സൂക്ഷിക്കുന്നതിലും വീണ്ടും ചൂടാക്കുന്നതിലും വരുത്തുന്ന ചെറി യഅശ്രദ്ധകൾ ഭക്ഷ്യവിഷബാധയ്ക്കും മറ്റ് ആരോഗ്യപ്രശ്നങ്ങൾക്കും കാരണമായേക്കാം.

ബാക്കിവന്ന ഭക്ഷണം സുരക്ഷിതമായി ഉപയോഗിക്കാൻ

ശ്രദ്ധിക്കേണ്ട കാര്യങ്ങൾ:

പുതിയ ഭക്ഷണവുമായി കൂട്ടിക്കലർത്തരുത്: നേരത്തേ പാകം ചെയ്ത് സൂക്ഷിച്ച ഭക്ഷണം പുതിയതായി തയ്യാറാക്കിയ വിഭവങ്ങളുമായി നേരിട്ട് കലർത്തുന്നത് ഒഴിവാക്കുക. ആവശ്യമുള്ള പഴയ ഭക്ഷണം മാത്രം പ്രത്യേകം ചൂടാക്കുക.

 വീണ്ടും വീണ്ടും ചൂടാക്കരുത്: ഫ്രിഡ്ജിൽനിന്ന് ഭക്ഷണം ഇടയ്ക്കിടെ പുറത്തെടുത്ത് ചൂടാക്കി വീണ്ടും തണുപ്പിച്ച് സൂക്ഷിക്കുന്ന ശീലം ഒഴിവാക്കണം. കഴിക്കാനുള്ള അളവ് മാത്രം എടുത്ത് ചൂടാക്കുന്നതാണ് ഉചിതം.

ആവശ്യത്തിന് മാത്രം ചൂടാക്കുക: ഒരുതവണ കഴിക്കാൻ വേണ്ട അളവ് മാത്രം പാത്രത്തിലേക്ക് മാറ്റുക. ബാക്കിയുള്ള ഭക്ഷണം സുരക്ഷിതമായി തണുപ്പിച്ച് സൂക്ഷിക്കുക.

 എല്ലാ ഭാഗത്തും ചൂടെത്തണം: ചൂടാക്കുന്നതിനിടെ ഭക്ഷണം നന്നായി ഇളക്കുക. നടുഭാഗം ഉൾപ്പെടെ എല്ലായിടത്തും ഒരേപോലെ നന്നായി ചൂടായെന്ന് ഉറപ്പാക്കണം. സാധ്യമെങ്കിൽ ഭക്ഷണത്തിന്റെ ഉള്ളിലെ താപനില 74°C (165°F) വരെ എത്തിക്കുക.

 ഫ്രീസറിൽനിന്നെടുത്ത ഭക്ഷണം ശ്രദ്ധയോടെ കൈകാര്യം ചെയ്യുക: ഫ്രോസൺ ഭക്ഷണം ഫ്രിഡ്ജിൽവെച്ച് ഉരുക്കിയെടുക്കുന്നതാണ് സുരക്ഷിതമായ മാർഗം. ഉരുകിയ ഭക്ഷണം ചൂടാക്കുമ്പോൾ മുഴുവൻ ഭാഗത്തും ആവശ്യത്തിന് ചൂടെത്തുന്നുവെന്ന് ഉറപ്പാക്കണം. മുറിയിലെ സാധാരണ താപനിലയിൽ ദീർഘനേരം വെച്ച് ഉരുക്കരുത്.

 സൂക്ഷിക്കുന്ന സമയവും പ്രധാനമാണ്: പാകം ചെയ്ത ഭക്ഷണം മുറിയിലെ താപനിലയിൽ രണ്ടുമണിക്കൂറിലധികം വെക്കരുത്. അന്തരീക്ഷ താപനില 32°C-ന് മുകളിലാണെങ്കിൽ ഒരു മണിക്കൂറിനകം ഫ്രിഡ്ജിൽ സൂക്ഷിക്കുക. ഫ്രിഡ്ജിന്റെ താപനില 4°C-ലോ അതിൽ താഴെയോ ആയിരിക്കണം. പൊതുവെ പാകം ചെയ്ത ഭക്ഷണം ഫ്രിഡ്ജിൽ 3–4 ദിവസത്തിനകം ഉപയോഗിക്കുക.

സംശയം തോന്നിയാൽ ഉപേക്ഷിക്കുക: ഭക്ഷണത്തിന് അസാധാരണമായ മണമോ നിറമാറ്റമോ പൂപ്പലോ ഉണ്ടെങ്കിൽ കഴിക്കരുത്. എന്നാൽ, മോശമായ മണമില്ലെന്നത് മാത്രം ഭക്ഷണം സുരക്ഷിതമാണെന്നതിന് ഉറപ്പല്ല. ചില രോഗാണുക്കളോ അവ ഉത്പാദിപ്പിക്കുന്ന വിഷവസ്തുക്കളോ സാധാരണ ചൂടാക്കലിലൂടെ നശിക്കണമെന്നില്ല.

ഭക്ഷണം പാഴാക്കാതിരിക്കാം; ആരോഗ്യം അപകടത്തിലാക്കരുത്!

ഭക്ഷ്യസുരക്ഷ എന്നത് പാചകത്തിൽ മാത്രം ഒതുങ്ങുന്നതല്ല; ഭക്ഷണം സൂക്ഷിക്കുന്നതിലും വീണ്ടും ഉപയോഗിക്കുന്നതിലും ഒരുപോലെ ജാഗ്രത വേണം. ചെറിയ മുൻകരുതലുകൾ വലിയ ആരോഗ്യപ്രശ്നങ്ങൾ ഒഴിവാക്കാൻ സഹായിക്കും.

ശുദ്ധമായ ഭക്ഷണം ഓരോ പൗരന്റെയും ജന്മാവകാശമാണ്. സുരക്ഷിതമായ ഭക്ഷണശീലങ്ങൾ പിന്തുടരാം; ഈ സന്ദേശം കുടുംബാംഗങ്ങളിലേക്കും സുഹൃത്തുക്കളിലേക്കും പങ്കുവെക്കാം.

ചിത്രം കടപ്പാട് :ഫുഡ് സേഫ്റ്റി കേരള 

courtesy :Food Safety Kerala

— ഭക്ഷ്യശ്രീ