അനധികൃത തെരുവുകച്ചവടം: വ്യാപാരികൾ പ്രക്ഷോഭത്തിലേക്ക് ; ഒക്ടോബർ ർ 6-ന് കോഴിക്കോട് കോർപ്പറേഷനിലേക്ക് മാർച്ചും ധർണയും

കടുത്ത സാമ്പത്തിക ബാധ്യതകൾക്കിടയിൽ

നിയമലംഘനമെന്ന് ആരോപണം

അനധികൃത തെരുവുകച്ചവടം: വ്യാപാരികൾ പ്രക്ഷോഭത്തിലേക്ക്

കടുത്ത സാമ്പത്തിക ബാധ്യതകൾക്കിടയിൽ നിയമലംഘനമെന്ന് ആരോപണം; ഒക്ടോബർ ർ 6-ന് കോഴിക്കോട് കോർപ്പറേഷനിലേക്ക് മാർച്ചും ധർണയും

കോഴിക്കോട്: നിയമാനുസൃതമായി വ്യാപാര സ്ഥാപനങ്ങൾ നടത്തി ഉപജീവനം കണ്ടെത്തുന്ന ചെറുകിട-ഇടത്തരം വ്യാപാരികൾ കടുത്ത സാമ്പത്തിക പ്രതിസന്ധി നേരിടുമ്പോൾ, തെരുവോരങ്ങളിലെ അനിയന്ത്രിത കച്ചവടങ്ങൾക്കെതിരെ പ്രക്ഷോഭം ശക്തമാക്കാനൊരുങ്ങി കേരള വ്യാപാരി വ്യവസായി ഏകോപന സമിതി. തദ്ദേശ സ്വയംഭരണ സ്ഥാപനങ്ങൾ നിശ്ചയിച്ച വെൻഡിംഗ് സോണുകൾക്ക് പുറത്തും നിലവിലുള്ള വ്യാപാര സ്ഥാപനങ്ങളുടെ പരിസരങ്ങളിലും അനധികൃത തെരുവുകച്ചവടങ്ങൾ വ്യാപകമാകുന്നുവെന്ന പരാതിയിലാണ് സംഘടനയുടെ പ്രതിഷേധം.

ഇതിന്റെ ഭാഗമായി ഒക്ടോബർ 6-ന് കോഴിക്കോട് കോർപ്പറേഷനിലേക്ക് ബഹുജന മാർച്ചും ധർണയും നടത്താൻ സംഘടനയുടെ സംസ്ഥാന കമ്മിറ്റി തീരുമാനിച്ചു. ജില്ലാ കമ്മിറ്റിയുടെ നേതൃത്വത്തിൽ നടക്കുന്ന സമരം സംസ്ഥാന പ്രസിഡന്റ് രാജു അപ്സര ഉദ്ഘാടനം ചെയ്യും.

കടമുറികളുടെ വാടക, ലൈസൻസ് ഫീസ്, ജി.എസ്.ടി., തൊഴിൽ നികുതി, ജീവനക്കാരുടെ വേതനം, വൈദ്യുതി ചാർജ് തുടങ്ങി ഒട്ടേറെ സാമ്പത്തിക ബാധ്യതകൾ നിറവേറ്റിയാണ് പരമ്പരാഗത വ്യാപാരികൾ സ്ഥാപനങ്ങൾ മുന്നോട്ടുകൊണ്ടുപോകുന്നത്. എന്നാൽ, ഇത്തരം ബാധ്യതകളൊന്നുമില്ലാതെ തെരുവോരങ്ങ ളിൽ കച്ചവടം നടത്തുന്നവരുടെ എണ്ണം വർധിക്കുന്നത് നിയമാനുസൃതമായി പ്രവർത്തിക്കുന്ന വ്യാപാരികൾക്ക് കടുത്ത വെല്ലുവിളിയാകുന്നുവെന്നാണ് സംഘടനയുടെ ആരോപണം.

വ്യാപാര സ്ഥാപനങ്ങളുടെ തൊട്ടുമുന്നിലും സമീപത്തും അനിയന്ത്രിതമായി തെരുവുകച്ചവടങ്ങൾ ആരംഭിക്കുന്നത് ഉപഭോക്താക്കളെ ആകർഷിക്കുന്നതിലും കച്ചവടം നിലനിർത്തുന്നതിലും പ്രതിസന്ധി സൃഷ്ടിക്കുന്നതായി വ്യാപാരികൾ ചൂണ്ടിക്കാട്ടുന്നു. ഒരുവശത്ത് വർധിച്ചുവരുന്ന പ്രവർത്തനച്ചെലവുകളും മറുവശത്ത് നിയന്ത്രണമില്ലാത്ത മത്സരവും ചെറുകിട വ്യാപാരികളുടെ നിലനിൽപ്പുതന്നെ അപകടത്തിലാക്കുന്ന സാഹചര്യമാണ് നിലവിലുള്ളതെന്നാണ് അവരുടെ വിലയിരുത്തൽ.

കച്ചവട മേഖലകൾക്ക് പുറത്തെ തെരുവ് വ്യാപാരത്തിനെതിരെ നടപടി വേണം 

തദ്ദേശ സ്ഥാപനങ്ങൾ കച്ചവടത്തിനായി പ്രത്യേകം കണ്ടെത്തിയ സ്ഥലങ്ങളിലും നിയമാനുസൃതമായി അനുവദിച്ച മേഖലകളിലുമാണ് തെരുവുകച്ചവടങ്ങൾ നിയന്ത്രിക്കേണ്ടതെന്ന് സംഘടന ആവശ്യപ്പെടുന്നു. പൊതുവഴികളിലും വ്യാപാര സ്ഥാപനങ്ങളുടെ പ്രവേശന കവാടങ്ങൾക്ക് സമീപവും അനുമതിയില്ലാതെ കച്ചവടം നടത്തുന്നത് തടയാൻ അധികൃതർ അടിയന്തരമായി ഇടപെടണമെന്നും ഭാരവാഹികൾ ആവശ്യപ്പെട്ടു.

പ്രശ്നത്തിൽ അടിയന്തരവും സുതാര്യവുമായ നടപടികൾ ഉണ്ടായില്ലെങ്കിൽ സമരം സംസ്ഥാനത്തെ മുഴുവൻ നഗരസഭകളിലേക്കും ഗ്രാമപഞ്ചായത്തുകളിലേക്കും വ്യാപിപ്പിക്കാനാണ് സംഘടനയുടെ തീരുമാനം. നിയമാനുസൃതമായി പ്രവർത്തിക്കുന്ന വ്യാപാരികളുടെ അവകാശങ്ങളും ഉപജീവനമാർഗങ്ങളും സംരക്ഷിക്കുന്നതിൽ സർക്കാർ സംവിധാനങ്ങൾ വീഴ്ച വരുത്തരുതെന്നും സംഘടന മുന്നറിയിപ്പ് നൽകി.

കോഴിക്കോട്ട് നടത്തിയ പത്രസമ്മേളനത്തിൽ വ്യാപാരി വ്യവസായി ഏകോപന സമിതി ഭാരവാഹികളായ പി.കെ. ബാപ്പു ഹാജി, ജി.കെ. തോമസ്, സുരേഷ് ബാബു, മനാഫ് കാപ്പാട്, വി. സുനിൽകുമാർ, എ.കെ. മൻസൂർ എന്നിവർ പങ്കെടുത്തു.

തെരുവുകച്ചവടം നിയന്ത്രിക്കണമെന്ന വ്യാപാരികളുടെ ആവശ്യം ശക്തമാകുമ്പോൾ, ഉപജീവനത്തിനായി തെരുവുകളെ ആശ്രയിക്കുന്ന ചെറുകിട കച്ചവടക്കാരുടെ അവകാശങ്ങളും നിയമപരമായ സംരക്ഷണവും ഒരുപോലെ പരിഗണിക്കേണ്ടതുണ്ട്. പൊതുസ്ഥലങ്ങളുടെ ക്രമീകരണവും വ്യാപാരികളുടെ ജീവിതസുരക്ഷയും തമ്മിൽ സന്തുലിതമായ പരിഹാരം കണ്ടെത്തുക എന്നത് തദ്ദേശ ഭരണകൂടങ്ങളുടെ മുന്നിലുള്ള പ്രധാന വെല്ലു വിളിയാണ്.. (ചിത്രം :പ്രതീകാത്മകം )

: ദിവാകരൻ ചോമ്പാല