സോഷ്യലിസ്റ്റ് മൂല്യങ്ങൾ ജീവിതാന്ത്യം വരെ ഉയർത്തിപ്പിടിച്ച നേതാവ് എം.കെ. പ്രേംനാഥ്: കെ.പി. മോഹനൻ

കറപുരളാത്ത വ്യക്തിജീവിതം പൊതുപ്രവർത്തകർക്ക് എന്നും മാതൃക; ജനഹൃദയങ്ങളിൽ പ്രേംനാഥ് എന്നും ജീവിക്കും

വടകര: സോഷ്യലിസ്റ്റ് മൂല്യങ്ങൾ ജീവിതകാലം മുഴുവൻ ഉയർത്തിപ്പിടിച്ച് പൊതുപ്രവർത്തനം നടത്തിയ നേതാവായിരുന്നു അഡ്വ. എം.കെ. പ്രേംനാഥെന്ന് മുൻ മന്ത്രിയും ആർ.ജെ.ഡി ദേശീയ എക്സിക്യുട്ടീവ് കമ്മിറ്റി അംഗവുമായ കെ.പി. മോഹനൻ പറഞ്ഞു.

ഐ.എസ്.ഒ. എന്ന സോഷ്യലിസ്റ്റ് വിദ്യാർത്ഥി പ്രസ്ഥാനത്തിലൂടെ പൊതുപ്രവർത്തന രംഗത്തേക്ക് കടന്നുവന്ന എം.കെ. പ്രേംനാഥ് സംസ്ഥാന-ദേശീയ രാഷ്ട്രീയത്തിൽ ശ്രദ്ധേയനായ സോഷ്യലിസ്റ്റ് നേതാവും മികച്ച നിയമസഭാ സാമാജികനുമായിരുന്നു. അദ്ദേഹത്തിന്റെ കറപുരളാത്ത വ്യക്തിജീവിതം പൊതുപ്രവർത്തകർക്ക് എന്നും മാതൃകയായിരിക്കു മെന്നും കെ.പി. മോഹനൻ പറഞ്ഞു.

വടകര എം.എൽ.എയും പ്രമുഖ സോഷ്യലിസ്റ്റ് നേതാവുമായിരുന്ന അഡ്വ. എം.കെ. പ്രേംനാഥിന്റെ മൂന്നാം ചരമവാർഷികത്തോടനുബന്ധിച്ച് തട്ടോളിക്കരയിലെ വീട്ടുമുറ്റത്ത് നടന്ന അനുസ്മരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

പി.പി. പ്രസീത്കുമാർ അധ്യക്ഷത വഹിച്ചു. ആർ.ജെ.ഡി നേതാക്കളായ മനയത്ത് ചന്ദ്രൻ, എം.കെ. ഭാസ്കരൻ, ഇ.പി. ദാമോദരൻ മാസ്റ്റർ, അഴിയൂർ ഗ്രാമപഞ്ചായത്ത് പ്രസിഡന്റ് കെ. ലീല, കെ.കെ. കൃഷ്ണൻ, പി.പി. രാജൻ, ആർ.വൈ.ജെ.ഡി സംസ്ഥാന പ്രസിഡന്റ് പ്രഭീഷ് ആദിയൂർ, ജില്ലാ പ്രസിഡന്റ് പി. കിരൺജിത്ത് എന്നിവർ സംസാരിച്ചു. കെ.പി. രജിൽ സ്വാഗതവും ശിവകുമാർ നന്ദിയും പറഞ്ഞു.

രാവിലെ നടന്ന ശവകുടീരത്തിലെ പുഷ്പാർച്ചനയിൽ ആർ.ജെ.ഡി നേതാക്കളും പ്രവർത്തകരും ഉൾപ്പെടെ നൂറുകണക്കിന് പേർ പങ്കെടുത്തു.