രോഗപ്രതിരോധശേഷിക്ക് തേങ്ങ; പ്രകൃതി നൽകിയ ഔഷധസമ്പത്ത് ;തേങ്ങയുടെ മഹത്വം ഭക്ഷണത്തിലൂടെ തിരിച്ചറിയണം — ടി. ശ്രീനിവാസൻ

കേരളീയരുടെ ഭക്ഷണസംസ്കാരത്തിൽ നൂറ്റാണ്ടുകളായി അഭേദ്യമായി ചേർന്നുനിൽക്കുന്ന ഭക്ഷ്യവിഭവമാണ് തേങ്ങ. കറികളിലും തോരനിലും ചമ്മന്തിയിലും പലഹാരങ്ങളിലും മാത്രമല്ല, വിവിധ പരമ്പരാഗത ഭക്ഷണരീതികളിലും തേങ്ങയ്ക്ക് നിർണായക സ്ഥാനമുണ്ട്. രുചിക്കും മണത്തിനും പുറമേ, ശരീരത്തിന് ഊർജം നൽകുന്ന കൊഴുപ്പ്, നാരുകൾ, വിവിധ ധാതുക്കൾ തുടങ്ങിയ പോഷകഘടകങ്ങളും തേങ്ങയിൽ അടങ്ങിയിട്ടുണ്ട്.

പ്രകൃതി നൽകിയ ഭക്ഷ്യവിഭവങ്ങളെ ജീവിതത്തിൽനിന്ന് അകറ്റിനിർത്തി കൃത്രിമവും അമിതമായി സംസ്കരിച്ചതുമായ ഭക്ഷണങ്ങളിലേക്ക് മാറുന്ന പ്രവണത ആരോഗ്യപ്രശ്നങ്ങൾക്ക് വഴിയൊരുക്കുന്നുണ്ടെന്നും ശ്രീനിവാസൻ പറഞ്ഞു. പ്രാദേശികമായി ലഭിക്കുന്ന പരമ്പരാഗത ഭക്ഷണവിഭവങ്ങളെ ആരോഗ്യകരമായ രീതിയിൽ ഭക്ഷണത്തിന്റെ ഭാഗമാക്കുക എന്നത് ഇന്നത്തെ കാലത്ത് ഏറെ പ്രസക്തമാണ്.

അതേസമയം, തേങ്ങ ആരോഗ്യത്തിന് ഗുണകരമാണെന്ന കാരണത്താൽ ഒരേസമയം വലിയ അളവിൽ തേങ്ങയോ വെളിച്ചെണ്ണ പോലുള്ള തേങ്ങാ ഉൽപ്പന്നങ്ങളോ ഉപയോഗിക്കുന്നത് ശരിയായ രീതിയല്ലെന്നും അദ്ദേഹം ഓർമിപ്പിച്ചു. അളവാണ് ആരോഗ്യകരമായ ഭക്ഷണത്തിന്റെ പ്രധാന മാനദണ്ഡം. ദിവസേനയുള്ള ഭക്ഷണത്തിൽ ആവശ്യത്തിന്, കുറേശ്ശെ കുറേശ്ശെയായി തേങ്ങ ഉൾപ്പെടുത്തുന്നതാണ് ഉചിതമെന്നും അദ്ദേഹം കൂട്ടിച്ചേർത്തു.

ലോകത്ത് ലഭ്യമായ പ്രകൃതിദത്ത ഭക്ഷ്യവിഭവങ്ങളിൽ ഉയർന്ന ഊർജമൂല്യമുള്ള ഒന്നാണ് തേങ്ങ. അതുകൊണ്ടുതന്നെ ശരീരത്തിന്റെ ഊർജാവശ്യകത നിറവേറ്റുന്നതിലും തേങ്ങയ്ക്ക് പ്രാധാന്യമുണ്ട്. എന്നാൽ ഓരോ വ്യക്തിയുടെയും ആരോഗ്യസ്ഥിതി, പ്രായം, ഭക്ഷണരീതി എന്നിവ കണക്കിലെടുത്തായിരിക്കണം ഭക്ഷണത്തിലെ അളവ് നിശ്ചയിക്കേണ്ടത്.

തേങ്ങയെ വെറും ഒരു പാചകച്ചേരുവയായി കാണാതെ പ്രകൃതി നൽകിയ സമ്പത്തായി തിരിച്ചറിയണം. കേരളത്തിന്റെ കാർഷിക-സാംസ്കാരിക ജീവിതവുമായി ചേർന്നുനിൽക്കുന്ന തെങ്ങിനെയും തേങ്ങയെയും സംരക്ഷിക്കുകയും അതിന്റെ പോഷകമൂല്യത്തെക്കുറിച്ച് പുതിയ തലമുറയെ ബോധവൽക്കരിക്കുകയും ചെയ്യേണ്ടത് കാലത്തിന്റെ ആവശ്യമാണ്. നാട്ടിൻപുറങ്ങളിലെ ഭക്ഷണസംസ്കാരത്തിൽ നിലനിന്നിരുന്ന സ്വാഭാവികവും സമതുലിതവുമായ ഭക്ഷണശീലങ്ങളിലേക്ക് മടങ്ങിപ്പോകാനുള്ള സന്ദേശം കൂടിയാണ് തേങ്ങയുടെ പ്രാധാന്യം ഓർമിപ്പിക്കുന്നത്.

കൊളക്കോട്ട് കൃഷ്ണൻ സ്മാരക ചാരിറ്റബിൾ ട്രസ്റ്റിന്റെ നേതൃത്വത്തിൽ സംഘടിപ്പിച്ച ചടങ്ങിൽ ട്രസ്റ്റ് പ്രസിഡന്റ് കെ. ശശികുമാർ അധ്യക്ഷത വഹിച്ചു. ഉന്നത വിജയം നേടിയ വിദ്യാർത്ഥികളെ വാർഡ് മെമ്പർ പി.കെ. സുരേഷ് ബാബു അനുമോദിച്ചു. ഗിരീഷ് ബി.കെ., ബേബി ബാലമ്പ്രത്ത്, എം.എം. രജിത്ത്, സന്തോഷ് വേങ്ങോളി എന്നിവർ സംസാരിച്ചു.