വ്യക്തിവികാസത്തിലൂടെ രാഷ്ട്രവികാസം; യുവജനങ്ങൾക്കായി ഏഴുദിന നേതൃത്വ പരിശീലനം -മൂടാടിയിൽ സെപ്റ്റംബർ 28 മുതൽ

കോഴിക്കോട് : വ്യക്തിവികാസത്തിലൂടെ സാമൂഹിക മാറ്റത്തിനും രാഷ്ട്രവികാസത്തിനും യുവതലമുറയെ സജ്ജമാക്കുക എന്ന ലക്ഷ്യത്തോടെ ആർട്ട് ഓഫ് ലിവിംഗ് സംഘടിപ്പിക്കുന്ന പാൻ കേരള യൂത്ത് ലീഡർഷിപ്പ് ട്രെയിനിംഗ് പ്രോഗ്രാം സെപ്റ്റംബർ 28 മുതൽ ഒക്ടോബർ 4 വരെ മൂടാടിയിലെ ആർട്ട് ഓഫ് ലിവിംഗ് കടലോര ആശ്രമത്തിൽ നടക്കും. ഏഴുദിവസം നീളുന്ന റെസിഡൻഷ്യൽ പരിശീലന പരിപാടിയിൽ 18 വയസ്സ് പൂർത്തിയായ സേവനസന്നദ്ധരായ യുവതീയുവാക്കൾക്കാണ് പ്രവേശനം.

രാസലഹരിക്കെതിരായ ‘ഓപ്പറേഷൻ തൂഫാൻ’ കർമ്മപദ്ധതിക്ക് ഐക്യദാർഢ്യം പ്രഖ്യാപിച്ചുകൊണ്ടുകൂടിയാണ് പ്രത്യേക പരിശീലന പരിപാടി സംഘടിപ്പിക്കുന്നത്. ആർട്ട് ഓഫ് ലിവിംഗ് ബംഗളൂരു ആശ്രമത്തിലെ പ്രമുഖ പരിശീലകരായ ഹരി, രാകേഷ്, നിഖിൽ, ബീന തുടങ്ങിയവർ പരിശീലനത്തിന് നേതൃത്വം നൽകും.

യോഗ, ധ്യാനം, സുദർശനക്രിയ, സൂര്യനമസ്കാരം, പത്മസാധന, ഫിസിക്കൽ ട്രെയിനിംഗ്, ജ്ഞാനസദസ്സുകൾ എന്നിവയ്ക്കൊപ്പം ആശയവിനിമയ മികവ്, സാമൂഹിക ഇടപെടൽ, മാർക്കറ്റിങ്–മാനേജ്മെന്റ് നൈപുണ്യം തുടങ്ങിയ മേഖലകളിലും പരിശീലനം നൽകും. വ്യക്തിജീവിതത്തിലും കുടുംബജീവിതത്തിലും ഔദ്യോഗിക രംഗത്തും ഗുണാത്മകമായ മാറ്റം സൃഷ്ടിക്കുന്നതിനൊപ്പം സാമൂഹിക ഉത്തരവാദിത്തവും നേതൃത്വശേഷിയും വളർത്തുകയാണ് പരിശീലനത്തിന്റെ ലക്ഷ്യം.

‘ദിവസവും ഒരു മണിക്കൂർ സമൂഹത്തിനും രാജ്യത്തിനുമായി സേവനം’ എന്ന ആശയത്തിലൂടെ യുവാക്കളെ സേവനപ്രവർത്തനങ്ങളിലേക്ക് സജ്ജരാക്കുകയും ഓരോ വ്യക്തിയെയും സാമൂഹിക മാറ്റത്തിന്റെ ഭാഗമാക്കുകയും ചെയ്യുകയാണ് YLTPയുടെ ലക്ഷ്യമെന്ന് സംഘാടകർ അറിയിച്ചു.