നഗരമോ ഇത് ? നരകമോ?

പഞ്ചായത്ത് വിളക്കുകളുടെ കാലം നമ്മെ പഠിപ്പിച്ച ഒരു ചെറിയ പാഠമുണ്ട്...വെളിച്ചം തെളിയിക്കുക എന്നത് ഒരു സാങ്കേതിക ജോലി മാത്രമല്ല; അതൊരു സാമൂഹിക ഉത്തരവാദിത്വമാണ്.

തെരുവുവിളക്കുകൾ കെടുമ്പോൾ ഇരുട്ടിലാകുന്നത് വെളിച്ചം മാത്രമല്ല; ഒരു സമൂഹത്തിന്റെ സുരക്ഷയും നാഗരികതയും കൂടിയാണ്.

ഭരണപരിഷ്കാരം, നഗരവികസനം, സ്മാർട്ട് നഗരം, ആധുനിക സൗകര്യങ്ങൾ ഇത്തരം പദങ്ങൾ വികസനത്തിന്റെ നിഘണ്ടുവിൽ നിറയുമ്പോഴും സന്ധ്യമയങ്ങിയാൽ തെരുവുകൾ ഇരുട്ടിലമരുന്ന കാഴ്ച പല പ്രദേശങ്ങളിലും ഇന്നും മാറിയിട്ടില്ല. 

ഭാഗികമായോ പൂർണമായോ ഇരുട്ടിലാകുന്ന ഒരു പ്രദേശത്തിന് നാഗരികത അവകാശപ്പെടാനാകുമോ? എന്ന ചോദ്യം സ്വാഭാവികമായും ഉയരുന്നു.

ഭക്ഷണം, വെള്ളം, പാർപ്പിടം, ചികിത്സ തുടങ്ങിയ അടിസ്ഥാന ആവശ്യങ്ങളോടൊപ്പം മനുഷ്യന്റെ സുരക്ഷിതമായ സഞ്ചാരത്തിനും ജീവിതത്തിനും ആവശ്യമായതാണ് വെളിച്ചം. തെരുവുവിളക്ക് എന്നത് ഒരു അലങ്കാര സൗകര്യമല്ല. അത് പൊതുസുരക്ഷയുടെ അടിസ്ഥാന സംവിധാനങ്ങളിൽ ഏറെ വിലപ്പെട്ടതാണ് . ഒരു വഴിയിലൂടെ ഭയമില്ലാതെ നടന്നുപോകാൻ കഴിയുക, രാത്രി ജോലി കഴിഞ്ഞെത്തുന്ന ഒരാൾക്ക് വീടണയാൻ കഴിയുക, വയോധികർക്കും സ്ത്രീകൾക്കും കുട്ടികൾക്കും വഴിയറിയാൻ കഴിയുക ഇവയൊക്കെ വെളിച്ചവുമായി നേരിട്ട് ബന്ധപ്പെട്ടിരിക്കുന്നു.

ഇരുട്ട് വെളിച്ചത്തിന്റെ അഭാവം മാത്രമല്ല. അത് പലപ്പോഴും ഭീതിയുടെ അന്തരീക്ഷം കൂടിയാണ്.

പഴയകാലത്തെ പഞ്ചായത്ത് വിളക്കുകളുടെ ഓർമ ഇവിടെ പ്രസക്തമാണ്. സന്ധ്യയാകുമ്പോൾ മണ്ണെണ്ണ ഒഴിച്ച് തിരി തെളിയിക്കുന്ന ഒരു പതിവ്. വലിയ സാങ്കേതികവിദ്യകളൊന്നുമില്ലാത്ത കാലത്തും ആ ചെറിയ വെളിച്ചം തെളിയിക്കാൻ ഒരാൾ തോളിൽ ചെറിയ മുളങ്കോണിയുമായെ ത്തും .

ആ കർമ്മം തന്റെ ഉത്തരവാദിത്വമായി കണ്ടിരുന്നു. പഞ്ചായത്ത് വിളക്കുകൾ കത്തിക്കുന്ന ആ കർമ്മം ഒരു ദിവസം പോലും മുടങ്ങാതിരിക്കാൻ ശ്രദ്ധിച്ചിരുന്ന പഴയ കാലം.

കാലം മാറി. പഞ്ചായത്തുകൾ വളർന്നു. പലതും മുനിസിപ്പാലിറ്റികളായി, കോർപ്പറേഷനുകളായി. നഗരങ്ങൾ വികസിച്ചു. വൈദ്യുതി ശൃംഖലകൾ വ്യാപിച്ചു. എൽ.ഇ.ഡി. വിളക്കുകളും ഓട്ടോമാറ്റിക് സംവിധാനങ്ങളും വന്നു. സോളാര് പാനലുകളും .

എന്നാൽ വിചിത്രമെന്നു പറയട്ടെ, പഞ്ചായത്ത് വിളക്കുകളുടെ കാലത്ത് ഉണ്ടായിരുന്ന ഉത്തരവാദിത്വബോധം ഇന്നത്തെ ചില ആധുനിക സംവിധാനങ്ങളിൽ കാണാതെ പോകുന്നു.

ഇരുട്ടിലായ ഒരു തെരുവിന്റെ പ്രശ്നം അവിടെ ഒരു വിളക്ക് കത്തുന്നില്ല എന്നതിൽ അവസാനിക്കുന്നില്ല.

വെളിച്ചമില്ലാത്ത ഇടവഴികൾ തെരുവുനായ്ക്കളുടെ വിളയാട്ടത്തിന് കൂടുതൽ ഭീതിജനകമായ പശ്ചാത്തലമൊരുക്കുന്നു , കാൽനടയാത്രക്കാരും ഇരുചക്രവാഹന യാത്രക്കാരും അപകടസാധ്യത നേരിടുന്നു. സാമൂഹികവിരുദ്ധ പ്രവർത്തനങ്ങൾക്ക് മറ ലഭിക്കുന്നു. പിടിച്ചുപറിക്കാർക്ക് ഇരുട്ട് അനുകൂല സാഹചര്യമാകുന്നു. ലഹരി ഇടപാടുകൾക്കും മറ്റ് നിയമവിരുദ്ധ പ്രവർത്തനങ്ങൾക്കും ആളൊഴിഞ്ഞ ഇരുണ്ട ഇടങ്ങൾ സുരക്ഷിത താവളങ്ങളായി മാറാനുള്ള സാധ്യതയേറെ .

ഇരുട്ട് കുറ്റകൃത്യം സൃഷ്ടിക്കുന്നില്ല; പക്ഷേ കുറ്റകൃത്യങ്ങൾക്ക് മറയൊരുക്കുന്ന സാഹചര്യം സൃഷ്ടിക്കാം. അതാണ് അധികാരികൾ തിരിച്ചറിയേണ്ടത്.

നഗരത്തിന്റെ പ്രധാന റോഡുകളിൽ മാത്രം വിളക്കുകൾ തെളിയിച്ചാൽ നഗരവികസനത്തിന്റെ കടമ പൂർത്തിയാകുന്നില്ല. പ്രധാന പാതയിൽ നിന്ന് തിരിയുന്ന ഇടവഴിയിലും, വീടുകളിലേക്കുള്ള ചെറിയ റോഡിലും, പൊതുസ്ഥലത്തിന്റെ പരിസരത്തും, യാത്രക്കാർ ആശ്രയിക്കുന്ന ഓരോ ഇടത്തും സുരക്ഷിതമായ വെളിച്ചം ഉറപ്പാക്കേണ്ടതുണ്ട്.