ഹിദൂർ മുഹമ്മദിന്റെ വിയോഗം: കോൺഗ്രസ് പ്രസ്ഥാനത്തിന് സത്യനിഷ്ഠയുള്ള നേതാവിനെ നഷ്ടമായി : മുല്ലപ്പള്ളി രാമചന്ദ്രൻ

“ചുമതലകൾ ആത്മാർത്ഥമായും സത്യസന്ധമായും നിർവഹിച്ച നേതാവായിരുന്നു ഹിദൂർ”

:മുല്ലപ്പള്ളി രാമചന്ദ്രൻ

തിരുവനന്തപുരം: പ്രിയങ്കരനായ ഹിദൂർ മുഹമ്മദിന്റെ വിയോഗത്തിലൂടെ കേരളത്തിലെ കോൺഗ്രസ് പ്രസ്ഥാനത്തിന് സത്യനിഷ്ഠയും ആത്മാർത്ഥതയും പുലർത്തിയ മികച്ച നേതാവിനെയാണ് നഷ്ടമായതെന്ന് മുൻ കെ.പി.സി.സി. പ്രസിഡന്റ് മുല്ലപ്പള്ളി രാമചന്ദ്രൻ അനുസ്മരിച്ചു.

ഹിദൂർ ഗുരുതരാവസ്ഥയിലാണെന്ന വിവരം ഒരാഴ്ച മുമ്പ് കെ.പി.സി.സി. ജനറൽ സെക്രട്ടറി മണക്കാട് സുരേഷാണ് അറിയിച്ചതെന്ന് മുല്ലപ്പള്ളി പറഞ്ഞു. ഹിദൂറുമായുള്ള ദീർഘകാല സൗഹൃദവും രാഷ്ട്രീയ ബന്ധവും അനുസ്മരിച്ചുകൊണ്ടായിരുന്നു അദ്ദേഹത്തിന്റെ പ്രതികരണം.

1978 കാലഘട്ടത്തിൽ താൻ യൂത്ത് കോൺഗ്രസ് അധ്യക്ഷനും ജി. കാർത്തികേയൻ കെ.എസ്.യു. പ്രസിഡന്റുമായിരുന്ന സമയത്താണ് കൊല്ലം കടയ്ക്കൽ സ്വദേശിയായ പ്രസന്നവദനനായ ഹിദൂർ എന്ന കെ.എസ്.യു. നേതാവുമായി അടുത്ത ബന്ധം സ്ഥാപിച്ചതെന്ന് മുല്ലപ്പള്ളി പറഞ്ഞു. കേരളം മുഴുവൻ സംഘടനാ പ്രവർത്തനങ്ങളുമായി ഓടിനടന്ന കാലമായിരുന്നു അതെന്നും അദ്ദേഹം ഓർത്തെടുത്തു.

ജി. കാർത്തികേയന് ശേഷം രമേഷ് ചെന്നിത്തല കെ.എസ്.യു. പ്രസിഡന്റായ കാലത്തും ഹിദൂർ വിശ്വസ്തനായ സഹപ്രവർത്തകനായി ഒപ്പമുണ്ടായിരുന്നു. കോൺഗ്രസ് നേതാവ് കെ. കരുണാകരന് ഹിദൂറിനോട് പ്രത്യേക സ്നേഹവും അടുപ്പവും ഉണ്ടായിരുന്നുവെന്നും മുല്ലപ്പള്ളി അനുസ്മരിച്ചു.

കേരള സർവകലാശാല യൂണിയൻ ജനറൽ സെക്രട്ടറിയായും സെനറ്റ് അംഗമായും പ്രവർത്തിച്ച കാലത്ത് ഹിദൂർ ആത്മാർത്ഥമായ സംഘടനാ പ്രവർത്തനമാണ് നടത്തിയിരുന്നത്. തുടർന്ന് സംസ്ഥാന കെ.എസ്.യു., യൂത്ത് കോൺഗ്രസ്, കെ.പി.സി.സി. എന്നിവയുടെ വിവിധ ഔദ്യോഗിക ചുമതലകൾ വഹിച്ചപ്പോഴും ഏൽപ്പിച്ച ഉത്തരവാദിത്തങ്ങൾ സത്യസന്ധതയോടെ നിർവഹിക്കാൻ അദ്ദേഹം ശ്രദ്ധിച്ചിരുന്നുവെന്നും മുല്ലപ്പള്ളി പറഞ്ഞു.

രമേഷ് ചെന്നിത്തല കെ.പി.സി.സി. പ്രസിഡന്റായിരുന്ന കാലത്ത് നെയ്യാർ ഡാമിന് സമീപം ആരംഭിച്ച രാജീവ് ഗാന്ധി സെന്റർ ഫോർ ഡെവലപ്മെന്റ് സ്റ്റഡീസിന്റെ ഡയറക്ടറായും ഹിദൂർ പ്രവർത്തിച്ചു.

നിയമസഭയിലേക്ക് രണ്ടു തവണ മത്സരിച്ചെങ്കിലും വിജയിക്കാനായില്ല. എന്നാൽ തെരഞ്ഞെടുപ്പ് വിജയത്തിനപ്പുറം സംഘടനാ പ്രവർത്തനത്തിലെ ആത്മാർത്ഥതയും സഹപ്രവർത്തകരോടുള്ള സ്നേഹവുമായിരുന്നു ഹിദൂറിന്റെ വ്യക്തിത്വത്തിന്റെ സവിശേഷതയെന്ന് മുല്ലപ്പള്ളി പറഞ്ഞു.

സ്നേഹസമ്പന്നനും ആത്മാർത്ഥനുമായ ഹിദൂർ മുഹമ്മദിന്റെ വേർപാടിലൂടെ കേരളത്തിലെ കോൺഗ്രസ് പ്രസ്ഥാനത്തിന് ഉത്തമനായ ഒരു നേതാവിനെയാണ് നഷ്ടമായതെന്നും അദ്ദേഹം കൂട്ടിച്ചേർത്തു.

“പ്രിയ ഹിദൂറിന്റെ സ്മരണകൾക്ക് മുമ്പിൽ പ്രണാമം.”