കാവലാളുകൾ തന്നെ കള്ളന്മാരായാൽ...!

നിയമവും നീതിയും സംരക്ഷിക്കേണ്ടവരാണ് നിയമപാലകർ. സമൂഹത്തിന്റെ സുരക്ഷയും ക്രമസമാധാനവും ഉറപ്പാക്കേണ്ട ഉത്തരവാദിത്വം ഏറ്റെടുത്തിരിക്കുന്ന ഒരു പോലീസ് ഉദ്യോഗസ്ഥൻ തന്നെ നിയമവിരുദ്ധ പ്രവർത്തനത്തിൽ പങ്കാളിയാകുന്നു എന്ന വാർത്ത അതുകൊണ്ടുതന്നെ ഏറെ ഗൗരവമുള്ളതാണ്. ലജ്‌ജാകരം .ശുദ്ധമായ പഴക്കൊട്ടയിൽ കെട്ടുപഴകിയ ഒരുപഴം മതി ആ കൊട്ടയിലെ പഴം മുഴുവൻ വർജ്ജിക്കേണ്ട നിലയിലെത്താൻ  .

ഒരു വ്യക്തിയുടെ തെറ്റായി മാത്രം ഇതിനെ കാണാനാകില്ല; അത് നിയമപാലന സംവിധാനത്തിലുള്ള പൊതുജനവിശ്വാസത്തെ ചോദ്യം ചെയ്യുന്ന സംഭവമാണ്.

ലഹരിമരുന്നിന്റെ വ്യാപനം കേരളസമൂഹം നേരിടുന്ന ഏറ്റവും ഗുരുതര മായ വെല്ലുവിളികളിലൊന്നാണ്. പ്രത്യേകിച്ച് രാസലഹരിയുടെ വ്യാപനം യുവതലമുറയുടെ ഭാവിയെപ്പോലും അപകടത്തിലാക്കുന്ന സാഹചര്യ ത്തിൽ, അതിനെതിരെ ശക്തമായ നടപടികളാണ് സമൂഹം പ്രതീക്ഷിക്കുന്നത്.

ഈ ലക്ഷ്യത്തോടെ നടപ്പാക്കുന്ന ‘ഓപ്പറേഷൻ തുഫാൻ’ പോലുള്ള നടപടികൾക്ക് ജനപിന്തുണ ലഭിക്കുന്നതും അതുകൊണ്ടാണ്. കോടിക്കണക്കിന് രൂപയുടെ ലഹരിമരുന്നുകൾ പിടികൂടുന്നുവെന്ന വാർത്തകൾ പുറത്തുവരുമ്പോൾ, ലഹരിവ്യാപനത്തിനെതിരായ പോരാട്ടം ശക്തമാകുകയാണെന്ന പ്രതീക്ഷയാണ് ജനങ്ങളിൽ ഉണ്ടാകുന്നത്.

എന്നാൽ, പിടിച്ചെടുത്ത ലഹരിമരുന്ന് ഉൾപ്പെടെയുള്ള തൊണ്ടിമുതൽ പോലീസ് കസ്റ്റഡിയിൽ നിന്ന് തന്നെ പുറത്തേക്ക് കടത്താൻ ഒരു ഉദ്യോഗ സ്ഥൻ ശ്രമിച്ചുവെന്ന ആരോപണം ഉയരുന്നത് ഈ വിശ്വാസത്തിന് വലിയ ആഘാതമാണ്. കുറ്റം തെളിയുന്നതിന് മുമ്പ് ആരെയും കുറ്റക്കാരനായി വിധിക്കാനാകില്ലെന്ന നിയമതത്വം പാലിക്കുമ്പോഴും, ആരോപണം സത്യമായാൽ അതിന്റെ ഗൗരവം ചെറുതല്ല.

ഇവിടെ ഉയരുന്ന പ്രധാന ചോദ്യം ഒരു ഉദ്യോഗസ്ഥനെക്കു റിച്ചുള്ളതുമാ ത്രമല്ല . പോലീസ് പിടിച്ചെടുക്കുന്ന ലഹരിമരുന്നുകളും മറ്റ് തൊണ്ടിമു തലുകളും എത്രത്തോളം സുരക്ഷിതമായും സുതാര്യമായും കൈകാര്യം ചെയ്യപ്പെടുന്നു എന്നതിനെക്കുറിച്ചാണ്. പിടിച്ചെടുക്കൽ മുതൽ കോടതി യിൽ ഹാജരാക്കുന്നതുവരെയുള്ള ഓരോ ഘട്ടത്തിലും കർശനമായ രേഖപ്പെടുത്തലും മേൽനോട്ടവും ഉറപ്പാക്കേണ്ടതിന്റെ ആവശ്യകത ഈ സംഭവം വീണ്ടും ഓർമ്മിപ്പിക്കുന്നു.

ലഹരിക്കെതിരായ പോരാട്ടത്തിൽ

പിടിച്ചെടുക്കൽ മാത്രം പോരാ;

പിടിച്ചെടുത്തത് വീണ്ടും വിപണിയിലെത്തുന്നില്ലെന്ന് ഉറപ്പാക്കുന്നതും അത്രതന്നെ പ്രധാനമാണ്. അതിനായി പോലീസ് സംവിധാനത്തിനകത്ത് കൂടുതൽ ശക്തമായ നിയന്ത്രണ സംവിധാനങ്ങൾ വേണം. തൊണ്ടിമുതലുകളുടെ ഡിജിറ്റൽ രേഖപ്പെടുത്തൽ, സുരക്ഷിത സംഭരണം, പതിവായ പരിശോധനകൾ, ഉത്തരവാദിത്ത നിർണയം എന്നിവ കൂടുതൽ കാര്യക്ഷമമാക്കേണ്ടതുണ്ട്.

അതേസമയം, ഇത്തരം ആരോപണങ്ങളിൽ നടപടിയെടുക്കുമ്പോൾ നിയമത്തിന്റെ പരിധി വിട്ടുള്ള ശിക്ഷാവിധികൾ ആവശ്യപ്പെടുന്നതും ശരിയായ സമീപനമല്ല. കുറ്റം തെളിയുകയാണെങ്കിൽ, കുറ്റത്തിന്റെ ഗൗരവത്തിന് ആനുപാതികമായ നിയമപരമായ പരമാവധി ശിക്ഷ ഉറപ്പാക്കുകയാണ് വേണ്ടത്. സസ്പെൻഷൻ പോലുള്ള വകുപ്പുതല നടപടികൾക്കപ്പുറം, ക്രിമിനൽ ഉത്തരവാദിത്തം ഉണ്ടെങ്കിൽ അതിനനുസരിച്ചുള്ള നിയമനടപടിയും ഉണ്ടാകണം.

പോലീസ് സേനയിലെ ഒരാളുടെ തെറ്റിനെ മുഴുവൻ സേനയുടെയും പ്രവർത്തനമായി ചിത്രീകരിക്കുന്നതും നീതിയുക്തമല്ല. ആയിരക്കണക്കിന് ഉദ്യോഗസ്ഥർ കഠിന സാഹചര്യങ്ങളിൽ നിയമപാലനത്തിനായി പ്രവർത്തിക്കുന്നുണ്ട്. എന്നാൽ, ആ സംവിധാനത്തിനുള്ളിൽ ഉണ്ടാകുന്ന വീഴ്ചകൾക്കെതിരെ ‘നമ്മുടെ ആളാണ്’ എന്ന പരിഗണനയില്ലാതെ നടപടിയെടുക്കാനുള്ള ആത്മവിശ്വാസമാണ് ഒരു സേനയുടെ വിശ്വാസ്യതയുടെ യഥാർത്ഥ അളവുകോൽ.

ലഹരിക്കെതിരായ പോരാട്ടത്തിൽ സർക്കാരിനും പോലീസിനും സമൂഹത്തിനും ഒരുപോലെ ഉത്തരവാദിത്വമുണ്ട്. അതിൽ ഏറ്റവും പ്രധാനപ്പെട്ടത് ജനങ്ങളുടെ വിശ്വാസമാണ്. കാവൽ ഏൽപ്പിച്ച കൈകൾ തന്നെ നിയമവിരുദ്ധ പ്രവർത്തനത്തിന് ഉപയോഗിക്കപ്പെടുന്നുവെന്ന തോന്നൽ ശക്തമായാൽ, എത്ര വലിയ ലഹരിവിരുദ്ധ പദ്ധതികൾ പ്രഖ്യാപിച്ചാലും അവയുടെ വിശ്വാസ്യത ചോദ്യം ചെയ്യപ്പെടും.

അതുകൊണ്ട് ഈ സംഭവത്തിൽ നിഷ്പക്ഷവും സമഗ്രവുമായ അന്വേഷണം, കുറ്റം തെളിയുകയാണെങ്കിൽ കർശനമായ നിയമനടപടി, അതോടൊപ്പം തൊണ്ടിമുതൽ കൈകാര്യം ചെയ്യുന്ന സംവിധാനത്തിലെ പിഴവുകൾ കണ്ടെത്തി പരിഹരിക്കൽ ഇവ മൂന്നും ഒരുപോലെ അനിവാര്യമാണ്.

ജനങ്ങളുടെ കാവലാളാകേണ്ടവർ തന്നെ നിയമത്തിന്റെ വിശ്വാസ്യതയ്ക്ക് ഭീഷണിയാകുന്ന സാഹചര്യം ഒരിക്കലും സാധാരണ സംഭവമായി കാണരുത്. നിയമം കാക്കുന്നവർക്കും നിയമം ഒരുപോലെ ബാധകമാണെന്ന് തെളിയിക്കുമ്പോഴാണ് നിയമപാലന സംവിധാനത്തോടുള്ള ജനവിശ്വാസം നിലനിൽക്കുക.

:ദിവാകരൻ ചോമ്പാല