ലിംഗസമത്വവും ഭരണഘടനാ മൂല്യങ്ങളും സംരക്ഷിക്കാൻ ഭരണാധികാരികൾക്ക് ഉത്തരവാദിത്തമുണ്ട്: പ്രൊഫ. എം. എൻ. കാരശ്ശേരി

കോഴിക്കോട്: ആണും പെണ്ണും ട്രാൻസ്‌ജെൻഡറുകളും തുല്യരാണെന്ന് വിശ്വസിക്കുന്നവർക്ക് മാത്രമേ കേരളത്തിൽ ജനപ്രതിനിധിയായോ മന്ത്രിയായോ മുഖ്യമന്ത്രിയായോ ഭരിക്കാനും രാഷ്ട്രീയ പ്രവർത്തനം നടത്താനും യോഗ്യതയുള്ളൂ എന്ന് പ്രമുഖ ചിന്തകനും സാംസ്‌കാരിക പ്രവർത്തകനുമായ പ്രൊഫ. എം. എൻ. കാരശ്ശേരി.

"പെണ്ണുങ്ങൾ രാത്രി പുറത്തിറങ്ങുന്നത് വിനാശകരമാണ്" എന്ന തരത്തിലുള്ള പ്രസ്താവനകൾ വരുമ്പോൾ, അത് ഈ കാലഘട്ടത്തിനും നമ്മുടെ ഭരണഘടനയ്ക്കും ചേർന്നതല്ലെന്ന് ഉറപ്പിച്ചു പറയാനും വിയോജിപ്പ് രേഖപ്പെടുത്താനും ചുമതലപ്പെട്ട ആളാണ് ഒരു മുഖ്യമന്ത്രി എന്ന് അദ്ദേഹം വ്യക്തമാക്കി.

കാന്തപുരം എ.പി. അബൂബക്കർ മുസ്ലിയാർക്കായാലും പാലാ ബിഷപ്പിനായാലും ഒരു സമാന്തര ഭരണം നടത്താം എന്ന ധാരണയുണ്ടെന്ന് വിമർശിച്ച അദ്ദേഹം, ഇത്തരം നിലപാടുകൾ ഏതെങ്കിലും ഒരു പ്രത്യേക സമുദായത്തിന്റെയോ സ്ത്രീകളുടെയോ മാത്രം പ്രശ്നമല്ലെന്നും മറിച്ച് രാജ്യത്തെ പൗരന്മാരുടെയും മനുഷ്യരുടെയും പൊതുവായ വിഷയമാണെന്നും കൂട്ടിച്ചേർത്തു. പണ്ട് നിലനിന്നിരുന്ന സതി, നരബലി, ഐത്തം തുടങ്ങിയവ പോലെ തന്നെ സാമൂഹികമായ ഇടപെടൽ അർഹിക്കുന്ന വിഷയമാണിത്.

ചരിത്രപരമായ മാറ്റങ്ങൾ ചൂണ്ടിക്കാട്ടി എം.എൻ. കാരശ്ശേരി:

മതനേതൃത്വങ്ങളുടെ നിലപാടുകളിൽ കാലക്രമേണ വന്ന മാറ്റങ്ങളെക്കുറിച്ച് സംസാരിക്കവെ ചില ചരിത്ര വസ്തുതകളും അദ്ദേഹം ഓർമ്മിപ്പിച്ചു1926-ൽ രൂപീകൃതമായ സമസ്ത കേരള ജംഇയ്യത്തുൽ ഉലമ, 1930 മാർച്ചിൽ മണ്ണാർക്കാട് വച്ച് നടന്ന സമ്മേളനത്തിൽ പെൺകുട്ടികൾ എഴുത്ത് പഠിക്കുന്നത് 'മക്റൂഹ്' (ഒഴിവാക്കേണ്ടത്/അനാവശ്യം) ആണെന്ന് പ്രമേയം പാസാക്കിയിരുന്നു.

1962-കളിൽ പോലും പെൺകുട്ടികൾക്ക് വാചാ പരീക്ഷ (വാമൊഴി പരീക്ഷ) മാത്രമാണ് ഉണ്ടായിരുന്നത്.

എന്നാൽ ഇന്ന് അവസ്ഥ മാറി. കാന്തപുരത്തിന്റെ നേതൃത്വത്തിൽ തന്നെ നിരവധി പെൺകുട്ടികളുടെ മതപാഠശാലകൾ (മദ്റസത്തുൽ ബനാത്ത്) ഇന്ന് പ്രവർത്തിക്കുന്നുണ്ട്.

പഴയ ഇത്തരം പ്രമേയങ്ങൾ സംഘടനകൾ ഔദ്യോഗികമായി തള്ളിക്കളഞ്ഞിട്ടില്ലെങ്കിലും, കാലത്തിന്റെ മാറ്റത്തിനനുസരിച്ച് പ്രയോഗത്തിൽ വലിയ മാറ്റങ്ങൾ വരുത്താൻ അവർ നിർബന്ധിതരായിട്ടുണ്ടെന്നും പ്രൊഫ. എം. എൻ. കാരശ്ശേരി ചൂണ്ടിക്കാട്ടി.

https://www.youtube.com/watch?v=E7heXxV7YCQ