അശരണരുടെ അമൃതകരവും കാരുണ്യത്തിന്റെ പര്യായവും: പന്നിയോട് സുകുമാരൻ വൈദ്യർക്ക് ആദരാഞ്ജലികൾ

അശരണരുടെ അമൃതകരവും കാരുണ്യത്തിന്റെ പര്യായവും: പന്നിയോട് സുകുമാരൻ വൈദ്യർക്ക് ആദരാഞ്ജലികൾ

​തിരുവിതാംകൂർ രാജാക്കന്മാരുടെ കൊട്ടാരം വൈദ്യന്മാരുടെ പാരമ്പര്യത്തിലെ ഏഴാം കണ്ണിയായി, നാട്ടുവൈദ്യത്തിന്റെ അപൂർവ്വ വിജ്ഞാനം കൈമുതലാക്കി ആതുരസേവനം നടത്തിയ പന്നിയോട് സുകുമാരൻ വൈദ്യരുടെ വേർപാട് കേരളത്തിന്‌ നികത്താനാവാത്ത നഷ്ടമാണ്. തലമുറകളായി കൈമാറ്റം ചെയ്യപ്പെട്ടു വന്ന പാരമ്പര്യ അറിവുകൾക്കൊപ്പം സ്വന്തം നിരീക്ഷണങ്ങളും ആഴത്തിലുള്ള ഗവേഷണങ്ങളും സമന്വയിപ്പിച്ചാണ് അദ്ദേഹം തനതായ ചികിത്സാരീതികൾ മുന്നോട്ടുകൊണ്ടുപോയത്. ഹൃദ്രോഗം ഉൾപ്പെടെയുള്ള സങ്കീർണ്ണമായ രോഗങ്ങൾക്ക് സ്വന്തമായി ഏഴ് പ്രത്യേക ഔഷധക്കൂട്ടുകൾ കണ്ടെത്തുകയും അവ ഉപയോഗിച്ച് പതിനായിരക്കണക്കിന് രോഗികൾക്ക് സൗഖ്യം പകരുകയും ചെയ്തത് അദ്ദേഹത്തിന്റെ അപാരമായ വൈദ്യവൈദഗ്ധ്യത്തിന് തെളിവാണ്.

​തികഞ്ഞ കൃത്യതയാർന്ന നാഡിപരിശോധനയും രോഗിയുടെ ശാരീരിക അവസ്ഥ പൂർണ്ണമായി മനസ്സിലാക്കി നൽകുന്ന ഒറ്റമൂലി ചികിത്സയും സുകുമാരൻ വൈദ്യരുടെ പ്രത്യേകതയായിരുന്നു. ഇതിനുപുറമേ, അപൂർവ്വ സസ്യങ്ങളും ഔഷധക്കൂട്ടുകളും ഉപയോഗിച്ചുള്ള പരമ്പരാഗത വിഷചികിത്സയിലും അദ്ദേഹം വലിയ നിപുണത പുലർത്തിപോന്നു. എന്നാൽ, വൈദ്യശാസ്ത്ര രംഗത്തെ നേട്ടങ്ങൾക്കുമപ്പുറം തികഞ്ഞ ഒരു ജീവകാരുണ്യ പ്രവർത്തകൻ കൂടിയായിരുന്നു അദ്ദേഹം. ചികിത്സയെ ഒരിക്കലും പണസമ്പാദനത്തിനുള്ള മാർഗ്ഗമായി കാണാതെ, ജനസേവനത്തിനുള്ള നിയോഗമായാണ് വൈദ്യർ കരുതിയത്. അതുകൊണ്ടുതന്നെ പാവപ്പെട്ടവർക്ക് എപ്പോഴും അദ്ദേഹത്തിന്റെ വൈദ്യശാലയുടെ വാതിലുകൾ തുറന്നുകിടന്നിരുന്നു.

​സ്വന്തം മാതാവിന്റെ ഓർമ്മയ്ക്കായി വാങ്ങിയ കോടിക്കണക്കിന് രൂപ വിലമതിക്കുന്ന ഭൂമിയിൽ നിന്ന് രണ്ടര ഏക്കറിലധികം സ്ഥലം വീടില്ലാത്ത പാവപ്പെട്ടവർക്കായി സർക്കാരിന്റെ ലൈഫ് മിഷൻ പദ്ധതിക്ക് സൗജന്യമായി വിട്ടുനൽകി അദ്ദേഹം നാടിന് വലിയ മാതൃകയായി. കൂടാതെ, ഗ്രാമീണ മേഖലയിൽ ലൈബ്രറികൾ, വായനശാലകൾ, കാത്തിരിപ്പുകേന്ദ്രങ്ങൾ എന്നിവ സ്ഥാപിക്കുന്നതിനും അദ്ദേഹം സജീവമായി നേതൃത്വം നൽകി. ആയുർവേദത്തിന്റെ തനിമ ചോർന്നുപോകാതെ പാരമ്പര്യ വിജ്ഞാനത്തെ കാത്തുസൂക്ഷിക്കുകയും, അതോടൊപ്പം തന്റെ സമ്പാദ്യം സമൂഹത്തിലെ പാർശ്വവൽക്കരിക്കപ്പെട്ടവർക്കായി പങ്കുവെക്കുകയും ചെയ്ത സുകുമാരൻ വൈദ്യരുടെ ജീവിതം നാളത്തെ തലമുറകൾക്ക് വലിയൊരു പ്രചോദനമാണ്. തനതായ വൈദ്യവിദ്യ കൊണ്ടും നിറഞ്ഞ കാരുണ്യം കൊണ്ടും ആയിരക്കണക്കിന് മനുഷ്യർക്ക് ആശ്വാസമായി മാറിയ ആ മഹത്വ്യക്തിത്വത്തിന്റെ ഓർമ്മകൾക്ക് മുന്നിൽ പ്രണാമം അർപ്പിക്കുന്നു.

:ബിജു കാരക്കോണം.