ഒപ്പമുള്ളവരെ ചേർത്തുനിർത്തുന്നതാകണം ഓണം: ഡെപ്യൂട്ടി മേയർ

കൊല്ലം: സമൂഹത്തിൽ ആരാലും ശ്രദ്ധിക്കപ്പെടാതെ താഴെത്തട്ടിൽ കഷ്ടപ്പെടുന്നവരെ കൂടി ഓർക്കുകയും ചേർത്തുനിർത്തുകയും ചെയ്യുന്നതാകണം നമ്മുടെ ഓണാഘോഷമെന്ന് കൊല്ലം ഡെപ്യൂട്ടി മേയർ ഉദയ സുകുമാരൻ കരുമാലിൽ പറഞ്ഞു.

വിദ്യാഭ്യാസ ഓൺലൈൻ ചാനലായ പള്ളിക്കുടം ടി.വിയും ജില്ലാ ശിശുക്ഷേമ സമിതിയും സംയുക്തമായി സംഘടിപ്പിച്ച ‘സ്കൂളമ്മയ്ക്ക് ഒരു ഓണപ്പുടവ’ പദ്ധതിയുടെ സംസ്ഥാനതല ഉദ്ഘാടനം കൊല്ലം ചാത്തിനാകുളം എം.എസ്.എം. എച്ച്.എസ്.എസിൽ നിർവഹിച്ച് സംസാരിക്കുകയായിരുന്നു അദ്ദേഹം.

അന്നം നൽകുന്നവരെ ആദരിക്കുന്നതിന്റെയും ഏത് തൊഴിലിനും അതിന്റേതായ മാന്യതയും ബഹുമാനവും നൽകേണ്ടതിന്റെയും സന്ദേശം യുവതലമുറയിൽ എത്തിക്കുക എന്ന ലക്ഷ്യത്തോടെയാണ് പദ്ധതി സംസ്ഥാനതലത്തിൽ ആരംഭിച്ചത്. സംസ്ഥാനത്തെ എല്ലാ ജില്ലകളിലും തിരഞ്ഞെടുക്കപ്പെട്ട സ്കൂളുകളിൽ പദ്ധതി നടപ്പാക്കും.

പദ്ധതിയുടെ ഭാഗമായി സ്കൂൾ പാചകത്തൊഴിലാളികളെ അതിഥികൾക്കൊപ്പം ഇരുത്തി ഓണപ്പുടവ നൽകി ആദരിച്ചത് കുട്ടികൾക്കും രക്ഷിതാക്കൾക്കും വേറിട്ട അനുഭവമായി. സ്കൂൾ പാചകത്തൊഴിലാളികൾക്കും ഇത് ജീവിതത്തിലെ മറക്കാനാകാത്ത അനുഭവമായി.

പി.ടി.എ. പ്രസിഡന്റ് എ. നൗഫൽ അധ്യക്ഷത വഹിച്ചു. ഹെഡ്മാസ്റ്റർ ശ്രീകുമാർ കെ.എസ്. സ്വാഗതം പറഞ്ഞു. പള്ളിക്കുടം ടി.വി. ചീഫ് എഡിറ്റർ എൽ. സുഗതൻ പദ്ധതി വിശദീകരിച്ചു. ജോയിന്റ് ആർ.ടി.ഒ. ആർ. ശരത്ചന്ദ്രൻ വിശിഷ്ടാതിഥിയായി. കെ.പി.എ.സി. ലീലാകൃഷ്ണൻ ഓണസന്ദേശം നൽകി.

ശിശുക്ഷേമ സമിതി ജില്ലാ സെക്രട്ടറി അഡ്വ. ഡി. ഷൈൻ ദേവ്, സ്കൂൾ മാനേജർ എച്ച്. അബ്ദുൽ കലാം, സ്കൂൾ പ്രിൻസിപ്പൽ റാണി എസ്. നായർ, ഹാരീഷ് തുടങ്ങിയവർ സംസാരിച്ചു. പ്രോഗ്രാം കൺവീനർ എസ്. രാധാകൃഷ്ണപിള്ള നന്ദി പറഞ്ഞു.