മുണ്ട് ; മലയാളിയുടെ കാലാതീതമായ അഭിമാനവസ്ത്രം :ദിവാകരൻ ചോമ്പാല

“കാലം മാറി … ഇറക്കം കുറഞ്ഞ ബർമുഡയും ഷോർട്സും യുവാക്കളുടെ ഇഷ്ടവേഷമായി. പക്ഷേ, മുണ്ട് മടക്കിക്കുത്തിയ മലയാളിയുടെ ചിത്രം കാലാതീതമാണ്!”ഓണം വരുമ്പോൾ മലയാളിയുടെ മനസ്സിൽ ആദ്യം തെളിയുന്ന ചില ചിത്രങ്ങളുണ്ട്. പൂക്കളമിട്ട മുറ്റം, തുമ്പപ്പൂവിന്റെ മണം, നിലവിളക്കിന്റെ നാളം, ഓണസദ്യയുടെ രുചി… അതിനിടയിൽ മുണ്ട് മടക്കിക്കുത്തി ആഘോഷത്തിരക്കിലേക്ക് ഇറങ്ങുന്ന മലയാളിയുടെ നാടൻ രൂപവും.

ആഘോഷനിമിഷങ്ങളെ അനശ്വരമാക്കാൻ മലയാളി തിരഞ്ഞെടുക്കുന്ന അഭിമാനവസ്ത്രമാണ് മുണ്ട്. ഒരു നെയ്ത്തുകാരന്റെ കരവിരുതിൽ പിറക്കുന്ന ഓരോ മുണ്ടിലും ഒരു ദേശത്തിന്റെ അഭിമാനമുണ്ട്. അധ്വാനത്തിന്റെ അടയാളമുണ്ട്. ആദരവിന്റെ ചിഹ്നമുണ്ട്. അതിലുപരി കേരളത്തിന്റെ സാംസ്കാരിക മുഖച്ഛായയുണ്ട്.

ഒരു നെയ്ത്തുകാരന്റെ വിയർപ്പുതുള്ളികൾ വീണുനനഞ്ഞ കൈകളിലൂടെ പിറക്കുന്ന കൈത്തറി മുണ്ടില്ലാതെ മലയാളിയുടെ ഓണം പൂർണമാകില്ലെന്നു പറയുന്നതിൽ അതിശയോക്തിയില്ല.

100 ശതമാനം ശുദ്ധമായ പരുത്തിനൂലിൽ നിർമ്മിച്ച മലയാളിയുടെ ഈ അഭിമാനവസ്ത്രമായ മുണ്ട് വാങ്ങാനാണ് ഞാനിന്ന് കേരള ഹാൻഡ്‌ലൂം വീവേഴ്സ് ഇൻഡസ്ട്രിയൽ കോ-ഓപ് സൊസൈറ്റിയുടെ ഷോറൂമിലെത്തിയത്. ചോമ്പാലയ്ക്കടുത്ത് ചിറയിൽപീടികയിൽ പ്രവർത്തിക്കുന്ന ഈ സ്ഥാപനം പാരമ്പര്യത്തിന്റെയും ഗുണമേന്മയുടെയും വിശ്വാസത്തിന്റെയും ഒരു കേന്ദ്രം കൂടിയാണ്.

മുണ്ട് മലയാളിക്ക് ഒരു വസ്ത്രം മാത്രമായിരുന്നില്ല. ജീവിതത്തിന്റെ വ്യത്യസ്ത സന്ദർഭങ്ങളിൽ അതിന് വ്യത്യസ്തമായ ഭാവങ്ങളും അർത്ഥങ്ങളുമുണ്ടായിരുന്നു.

ഗ്രാമീണ കേരളത്തിൽ മുണ്ട് മടക്കിക്കുത്തൽ പുരുഷന്റെ പ്രവർത്തനവീര്യത്തിന്റെയും അധ്വാനശീലത്തിന്റെയും സ്വയംപര്യാപ്തതയുടെയും അടയാളമായി കണക്കാക്കപ്പെട്ടിരുന്നു. വയൽപ്പണിയിലിറങ്ങുമ്പോഴും വെള്ളത്തിലൂടെ നടക്കുമ്പോഴും കളരിപ്പയറ്റിലും മറ്റു കായികപ്രകടനങ്ങളിലും പങ്കെടുക്കുമ്പോഴും മഴക്കാലത്ത് ചെളിനിറഞ്ഞ വഴികളിലൂടെ നടക്കുമ്പോഴും മുണ്ട് മടക്കിക്കുത്തൽ ഏറ്റവും പ്രായോഗികമായ രീതിയായിരുന്നു.

മുണ്ട് ധരിച്ചശേഷം ജോലിക്കോ സഞ്ചാരത്തിനോ സൗകര്യാർത്ഥം അത് മുട്ടിന് മുകളിലേക്ക് മടക്കിക്കുത്തിവയ്ക്കുന്ന ആ ചെറിയ പ്രവൃത്തി പോലും മലയാളിയുടെ ജീവിതവുമായി എത്രമാത്രം ഇഴചേർന്നിരിക്കുന്നു!

“മുണ്ട് മടക്കിക്കുത്തി ഇറങ്ങി” 'അഥവാ അരയും തലയും മുറുക്കി ' എന്ന് മലയാളി പറയുമ്പോൾ അതിന്റെ അർത്ഥം വെറും വസ്ത്രധാരണത്തിൽ ഒതുങ്ങുന്നില്ല. ജോലിക്കിറങ്ങാൻ, പ്രവർത്തിക്കാൻ, വെല്ലുവിളി ഏറ്റെടുക്കാൻ ഒരാൾ പൂർണമായി തയ്യാറായി എന്നതിന്റെ സൂചന കൂടിയാണത്.

സാഹിത്യത്തിലും സിനിമകളിലും ജനകീയപ്രയോഗങ്ങളിലും മുണ്ട് മടക്കിക്കുത്തൽ പ്രവർത്തനവീര്യത്തിന്റെ പ്രതീകമായി മാറിയതും അതുകൊണ്ടുതന്നെ.

അതേസമയം, മുണ്ട് താഴേക്ക് വിടർത്തിയുടുത്താൽ അതിന് മറ്റൊരു ഭാവമാണ്. വിവാഹം പോലുള്ള ആചാരപരമായ ചടങ്ങുകളിലും പൊതുസമ്മേളനങ്ങളിലും ഔപചാരിക വേദികളിലും മുണ്ട് താഴേക്കിട്ട് ധരിക്കുന്നത് ബഹുമാനത്തിന്റെയും മാന്യതയുടെയും അടയാളമായി കണക്കാക്കപ്പെട്ടു.

മുണ്ട് താഴേക്ക് — ബഹുമാനം.

മുണ്ട് മടക്കിക്കുത്തി — പ്രവർത്തനസന്നദ്ധത.

ഒരു വസ്ത്രത്തിന്റെ മടക്കിലും വിടർച്ചയിലും വരെ ഒരു സമൂഹത്തിന്റെ ജീവിതദർശനം ഒളിഞ്ഞിരിക്കുന്നുവെന്നതാണ് മുണ്ടിന്റെ ഏറ്റവും വലിയ സാംസ്കാരിക സവിശേഷത.

മുണ്ടിന്റെ മറ്റൊരു മുഖവും സിനിമ നമ്മെ കാണിച്ചുതന്നിട്ടുണ്ട്. മുണ്ട് മടക്കിക്കുത്തി പോരാട്ടത്തിനിറങ്ങുന്ന നായകനെയും, മുണ്ട് ഉരിഞ്ഞോടുന്ന നർമ്മരംഗങ്ങളെയും മലയാള സിനിമ പല കാലത്തും അവതരിപ്പിച്ചിട്ടുണ്ട്. അതുകൊണ്ടുതന്നെ മുണ്ട് മലയാളിയുടെ ജീവിതത്തിലെ ഗൗരവത്തി ന്റെയും നർമ്മത്തിന്റെയും ഒരുപോലെ സാക്ഷിയായ വസ്ത്രമാണ്.

ഇന്നത്തെ കാലത്ത് മുണ്ടുടുക്കൽ രീതിയിലും മാറ്റങ്ങളുണ്ട്. ഷർട്ടിന്റെ നിറത്തിനൊത്ത കരയുള്ള മുണ്ടുകൾക്ക് ആവശ്യക്കാരേറെയാണ്. മുണ്ടുടുക്കുന്ന വിവിധ രീതികൾ പഠിപ്പിക്കുന്ന വീഡിയോകൾക്ക് സാമൂഹികമാധ്യമങ്ങളിൽ ലഭിക്കുന്ന ലൈക്കുകൾ എണ്ണമറ്റത്. മുണ്ട് മുറുക്കിയുടുക്കാൻ സഹായിക്കുന്ന വെൽക്രോ പതിച്ച തുണിബെൽറ്റുകൾക്കും വിപണിയിൽ ആവശ്യക്കാരേറെയുണ്ട്.

കാലം മാറുമ്പോൾ സൗകര്യങ്ങൾ മാറുന്നു. പക്ഷേ, മുണ്ടിന്റെ പ്രസക്തി മങ്ങുന്നില്ല.

ഉദ്ഘാടനവേദികളിൽ ഭദ്രദീപം തെളിയിക്കുന്ന ചടങ്ങുകളിൽപോലും അല്പവസ്ത്രധാരണം അപമാനമല്ല, അലങ്കാരമാണെന്ന തെറ്റായ കാഴ്ചപ്പാടിനെതിരെ വിരൽചൂണ്ടുന്നവരേറെയുള്ള കേരളത്തിൽ, “മുണ്ടില്ലാതെന്ത് ഓണം?” എന്നു ചോദിക്കുന്നവരും എണ്ണത്തിൽ കുറവല്ല.

കാരണം മുണ്ട് ശരീരം മറയ്ക്കുന്ന വസ്ത്രം മാത്രമല്ല; ഒരു സംസ്കാരത്തെ അടയാളപ്പെടുത്തുന്ന വസ്ത്രം കൂടിയാണ്.

പാരമ്പര്യവും പുതിയ കാലവും തമ്മിലുള്ള ഈ മനോഹരമായ പാലം പലരും പലവിധത്തിൽ പണിയുന്നുണ്ട്. മൂവായിരം മുണ്ടുകൾ ഉപയോഗിച്ച് മുപ്പതടി വ്യാസത്തിൽ വമ്പൻ പൂക്കളമൊരുക്കി ഏഷ്യ ബുക്ക് ഓഫ് റെക്കോർഡ്സിൽ ഇടം നേടിയ രാംരാജ് കോട്ടൺ സ്ഥാപകൻ കെ. ആർ. നാഗരാജന്റെ ശ്രമം അതിലൊന്നാണ്. ഓണത്തിന്റെ നന്മയും പാരമ്പര്യവും പുതുകാലത്തിന്റെ കാഴ്ചപ്പാടുകളുമായി സമന്വയിപ്പിക്കാനുള്ള ശ്രമം.

2022-ൽ ചെന്നൈയിൽ നടന്ന 44-ാമത് ചെസ് ഒളിമ്പ്യാഡിന്റെ ഉദ്ഘാടനവേളയിൽ പ്രധാനമന്ത്രി നരേന്ദ്ര മോദി പരമ്പരാഗത രാംരാജ് ബ്രാൻഡഡ് ധോത്തി ധരിച്ചെത്തിയതും ഇന്ത്യൻ പാരമ്പര്യവസ്ത്രത്തിന്റെ പ്രാധാന്യം ഓർമിപ്പിക്കുന്ന ഒരു ചിത്രമായി അവശേഷിക്കുന്നു.

ലോകമെമ്പാടും ആത്മീയയാത്രകൾ നടത്തുന്ന ഗുരുദേവ് ശ്രീശ്രീ രവിശങ്കരജിയും വിവിധ വേദികളിൽ ഇന്ത്യൻ പാരമ്പര്യവേഷത്തിന്റെ ലാളിത്യം ഉൾക്കൊണ്ട വസ്ത്രധാരണത്തിൽ പ്രത്യക്ഷപ്പെടാറുണ്ട്. ഇന്ത്യൻ പാർലിമെണ്ടിൽ കേരളീയ വേഷത്തിന്റെ ഭാഗമായി മുണ്ടിനോടുള്ള മലയാളിയുടെ ഇഷ്ടവും അഭിമാനവും ഇതിലൂടെ ഒരിക്കൽക്കൂടി ഓർമിക്കപ്പെടുന്നു.കേന്ദ ആഭ്യന്തര മന്ത്രിയായിരുന്ന ചോമ്പാലക്കാരൻ മുല്ലപ്പള്ളിരാമചന്ദ്രൻ മുണ്ടുടുത്താണ് പാര്ലിമെനിറ്റിൽ കയറിയത് .അത്പോലെത്രയോ മലയാളി നേതാക്കൾ വേറെയും ....

എന്നാൽ, ഈ ഓർമ്മകളെല്ലാം ഒടുവിൽ നമ്മെ തിരിച്ചെത്തിക്കുന്നത് ഒരു നെയ്ത്തുകാരന്റെ തറിക്കരികിലേക്കാണ്.  

: ദിവാകരൻ ചോമ്പാല