അറിവിന്റെ വെളിച്ചം പകരുന്ന പി. ആർ. നാഥൻ ; ധന്യമീ ജീവിതത്തിന്റെ ഏഴുവർഷ യാത്ര

ചില മനുഷ്യരെ നാം പരിചയപ്പെടുന്നത് ഒരു വ്യക്തിയെ അറിയുന്നതിനു വേണ്ടി മാത്രമല്ല. അവരുടെ ജീവിതത്തിലൂടെ കടന്നുപോകുമ്പോൾ നമ്മളെത്തന്നെ കുറച്ചുകൂടി തിരിച്ചറിയുന്നതിനുവേണ്ടിയാണ്.

ചിലരുടെ വാക്കുകൾ കേൾക്കുമ്പോൾ പുതിയൊരു അറിവ് ലഭിക്കും. ചിലരുടെ ജീവിതം അടുത്തറിയുമ്പോൾ, അറിവിനപ്പുറം ഒരു ജീവിതദർശനം തന്നെ നമ്മിലേക്ക് പകരും.

പി. ആർ. നാഥൻ എന്നെഴുത്തുകാരൻ അത്തരത്തിലൊരാളാണ്.

എഴുത്തുകാരൻ, പ്രഭാഷകൻ, ചിന്തകൻ, ആത്മീയാന്വേഷകൻ ഇവയിലൊന്നുകൊണ്ടും മാത്രം പി. ആർ. നാഥനെ പൂർണമായി അടയാളപ്പെടുത്താനാവില്ല.

സാഹിത്യത്തെയും ഭാരതീയ ദർശനങ്ങളെയും ആത്മീയാന്വേഷണത്തെയും ജീവിതാനുഭവങ്ങളെയും സാധാരണ മനുഷ്യന്റെ നിത്യജീവിതവുമായി ബന്ധിപ്പിച്ച് സംസാരിക്കുന്ന അയത്നലളിതവും അർത്ഥസമ്പുഷ്ടവുമായ അദ്ദേഹത്തിന്റെ രീതി തന്നെയാണ് അദ്ദേഹത്തെ വേറിട്ടുനിർത്തുന്നത്.

ഗുരുദേവ് ശ്രീശ്രീരവിശങ്കർജിയുടെ നിയന്ത്രണത്തിൽ ബംഗളുരു ആസ്ഥാന മായി പ്രവർത്തിക്കുന്ന ആര്ട്ട് ഓഫ് ലിവിംഗ് പ്രസ്ഥാനത്തിന്റെ മലയാളം പ്രസിദ്ധീകരണമായ 'ഋഷിമുഖ്‌ ' മാസികയിൽ ദീർഘകാലം പി ആർ നാഥൻ സാർ എഴുതിയിരുന്നു .അദ്ദേഹത്തെ വർഷങ്ങൾക്ക് മുൻപ് 'ഋഷിമുഖ് ' പ്രസിദ്ധീകരണ വിഭാഗവുമായി ബന്ധിപ്പിക്കാൻ ഞാൻ നിമിത്തമായി എന്ന് അഭിമാനപൂർവ്വം വ്യക്തമാക്കട്ടെ.

.

അദ്ദേഹത്തിന്റെ അറിവിന്റെ ആഴത്തേക്കാൾ ഒരുപക്ഷേ ശ്രദ്ധേയമായത്, ആ അറിവ് മറ്റുള്ളവരിലേക്ക് പകർന്നുനൽകാനുള്ള ലാളിത്യവും ഇടപെടലു കളും നിലപാടുമാണ് .

അതിനൊരു തെളിവായി മാറുകയാണ് കഴിഞ്ഞ ഏഴുവർഷമായി തുടരുന്ന ധന്യമീ ജീവിതം എന്ന യൂട്യൂബ് പരമ്പര.

ഈ യാത്രയുടെ പിന്നിൽ നിൽക്കുന്ന ഗോപകുമാറിനെ ഒഴിവാക്കി ധന്യമീ ജീവിതത്തിന്റെ കഥ പറയാനാവില്ല. കാരണം, ഒരു വ്യക്തിയുടെ അറിവും അനുഭവങ്ങളും വരുംതലമുറകൾക്കായി സൂക്ഷിക്കപ്പെടണമെന്ന അദ്ദേഹത്തിന്റെ ചിന്തയിൽ നിന്നാണ് ഈ മഹത്തായ സംരംഭത്തിന്റെ ശുഭാരംഭം .

2019 ഓഗസ്റ്റിൽ ഗോപകുമാറിന്റെ മനസ്സിലുണ്ടായ ആ ആശയം പി. ആർ. നാഥനോട് പങ്കുവച്ചതോടെയാണ് 'ധന്യമീ ജീവിതം 'എന്ന യാത്ര ആരംഭിക്കു ന്നത്. ഇന്ന് ഏഴ് വർഷം പിന്നിടുമ്പോൾ പരമ്പര 1500 എപ്പിസോഡുകളിലേ ക്ക്പടർന്നുകയറി പന്തലിച്ചിരിക്കുന്നു .

ഇത് ഒരു യൂട്യൂബ് ചാനലിന്റെ വളർച്ചയുടെ കണക്കുമാത്രമല്ല. ഒരാളുടെ ജീവിതാനുഭവങ്ങളും അറിവും ചിന്തകളും പുതിയൊരു തലമുറയിലേക്ക് കൈമാറപ്പെടുന്നതിന്റെ വിശദവും വിശ്വാസയോഗ്യവുമായ ചരിത്ര സത്യം കൂടിയാണ്.

ബന്ധത്തിൽ നിന്ന് ബോധ്യത്തിലേക്ക്

പി. ആർ. നാഥൻ ഗോപകുമാറിന് കേവലം ഒരു എഴുത്തുകാരനോ പ്രഭാഷകനോ മാത്രമായിരുന്നില്ല. വ്യക്തിപരമായ മാർഗദർശകൻ കൂടിയായിരുന്നു.

അദ്ദേഹം ഗോപകുമാറിന്റെ അച്ഛന്റെ ജ്യേഷ്ഠനാണ്. അതുകൊണ്ടുതന്നെ ചെറുപ്പം മുതൽ നാഥനോടൊപ്പമുള്ള നിരവധി സത്സംഗങ്ങളിലും യാത്രകളിലും പങ്കെടുക്കാൻ ഗോപകുമാറിന് അവസരം ലഭിച്ചു. കുടുംബബന്ധത്തിലൂടെ ആരംഭിച്ച ആ അടുപ്പം പിന്നീട് ഒരു ജീവിതദർശനത്തിലേക്കുള്ള യാത്രയായി മാറുകയായിരുന്നു.

പി .ആർ .നാഥന്റെ സംസാരവും നിരീക്ഷണങ്ങളും ജീവിതത്തെ നോക്കി കാണുന്ന രീതിയും ഗോപകുമാറിന്റെ ചിന്തകളെ സ്വാധീനിച്ചു. പുസ്തകങ്ങളിൽ മാത്രം ഒതുങ്ങാത്ത അറിവാണ് അദ്ദേഹത്തിന്റേതെന്ന് ഗോപകുമാർ തിരിച്ചറിഞ്ഞു. അനുഭവങ്ങളിലൂടെ പാകപ്പെട്ട അറിവ്.

അതുകൊണ്ടുതന്നെ ആ അറിവുകൾ തന്റെ കാലത്തിനപ്പുറവും നിലനിൽക്കണം എന്ന ആഗ്രഹം സ്വാഭാവികമായും ഗോപകുമാറിൽ വളർന്നു.അവിടെ നിന്നാണ് ധന്യമീ ജീവിതംപിറക്കുന്നതും പിച്ചവെയ്ക്കു ന്നതും ...

മലയാളത്തിന്റെ ദാർശനിക എഴുത്തുകാരൻ

തത്വചിന്താപരമായ രചനകളിലൂടെ മലയാള സാഹിത്യത്തിന് ദാർശനികമായൊരു ആഴം നൽകിയ എഴുത്തുകാരനാണ് പി. ആർ. നാഥൻ എന്ന് നിരൂപകർ വിലയിരുത്തിയിട്ടുണ്ട്.

അദ്ദേഹത്തിന്റെ സാഹിത്യജീവിതം ഗഹനവും വിശാലമാണ്. മുപ്പതോളം നോവലുകൾ ഉൾപ്പെടെയുള്ള രചനകൾ, ചെറുകഥകൾ, ലേഖനങ്ങൾ, ടെലിവിഷൻ പരമ്പരകൾ, റേഡിയോ നാടകങ്ങൾ തുടങ്ങി വിവിധ മേഖലകളിൽ അദ്ദേഹം സാന്നിധ്യമറിയിച്ചിട്ടുണ്ട്.

സിനിമയിലും അദ്ദേഹത്തിന്റെ സംഭാവനയുണ്ട്. പ്രേം നസീറിന്റെ അവസാന ചിത്രമായ 'ധ്വനി ;ഉൾപ്പെടെ ഏഴ് സിനിമകൾക്കായി തിരക്കഥകൾ രചിച്ചിട്ടുണ്ട്.

എഴുത്തിനപ്പുറം പ്രഭാഷണവേദികളിലും പി. ആർ. നാഥൻ സജീവമായിരുന്നു. കേരളത്തിലും ഇന്ത്യയുടെ വിവിധ ഭാഗങ്ങളിലും വിദേശരാജ്യങ്ങളിലുമായി പതിനായിരത്തിലധികം വേദികളിൽ അദ്ദേഹം പ്രഭാഷണം നടത്തിയിട്ടുണ്ടെന്നാണ് ഗോപകുമാർ തന്റെ കുറിപ്പിൽ രേഖപ്പെടുത്തുന്നത്.

ആ പ്രഭാഷണങ്ങളുടെ പ്രത്യേകത കേവലം അറിവ് പകർന്നുനൽകുന്നതി ലായിരുന്നില്ല. കേൾക്കുന്നവരുടെ മനസ്സിനെ തൊടുന്നതിലായിരുന്നു.

ജീവിതത്തിൽ തളർന്നുനിൽക്കുന്ന ഒരാൾക്ക് ആശ്വാസം നൽകാനും, പ്രതിസന്ധിയിലൂടെ കടന്നുപോകുന്ന ഒരാൾക്ക് പ്രതീക്ഷ നൽകാനും, സ്വന്തം ജീവിതത്തെ മറ്റൊരു കോണിൽനിന്ന് കാണാൻ ഒരാളെ പ്രേരിപ്പി ക്കാനും അദ്ദേഹത്തിന്റെ വാക്കുകൾക്ക് കഴിഞ്ഞിട്ടുണ്ട്.

അതാണ് ഒരു പ്രഭാഷകനെ ഒരു ജീവിതഗുരുവാക്കി മാറ്റുന്ന ഘടകം.

അമൃതകീർത്തി പുരസ്കാരം, കേരള സാഹിത്യ അക്കാദമി അവാർഡ് എന്നിവ ഉൾപ്പെടെ എഴുപതിലധികം പുരസ്കാരങ്ങൾ അദ്ദേഹത്തെ തേടിയെത്തിയിട്ടുണ്ടെന്നതും ഈ ബഹുമുഖ പ്രതിഭയുടെ അംഗീകാരമാണ്.

അറിവിന്റെ വിശാലമായ ലോകം

ഉപനിഷത്തുകൾ, പുരാണങ്ങൾ, ഇതിഹാസങ്ങൾ, വേദാന്തം, തന്ത്ര, ധ്യാനം, പ്രാണിക് ഹീലിങ്, റെയ്കി, കൗൺസിലിംഗ്, പ്രകൃതിചികിത്സ, മന്ത്രവിദ്യ തുടങ്ങി വിവിധ ഭാരതീയ ആധ്യാത്മിക-ജ്ഞാന മേഖലകളിൽ പി. ആർ. നാഥന് ആഴത്തിലുള്ള അറിവുണ്ട്.

എന്നാൽ അറിവിന്റെ വലിയൊരു ശേഖരം കൈവശമുള്ള പലരിൽനിന്നും അദ്ദേഹത്തെ വ്യത്യസ്തനാക്കുന്നത് അതിനെ അവതരിപ്പിക്കുന്ന രീതിയാണ്.

ഗഹനമായ ആശയങ്ങളെ സങ്കീർണമായ ഭാഷയിൽ അവതരിപ്പിക്കാതെ, സാധാരണ മനുഷ്യന്റെ ജീവിതവുമായി ചേർത്തുവെച്ച് ലളിതമായി സംസാരിക്കാനുള്ള കഴിവ്.

വലിയ തത്വചിന്തകളെ വീട്ടുമുറ്റത്തെ അനുഭവങ്ങളിലേക്കും കുടുംബബ ന്ധങ്ങളിലേക്കും ദൈനംദിന ജീവിതത്തിലെ പ്രശ്നങ്ങളിലേക്കും കൊണ്ടുവ രുമ്പോൾ, കേൾക്കുന്നവന് അത് അകലെയുള്ള ഒരു തത്വശാസ്ത്രമല്ലാതാ കുന്നു.

സ്വന്തം ജീവിതത്തെക്കുറിച്ചുള്ള ഒരു സംഭാഷണമായി മാറുന്നു.

ഗോപകുമാറിനെ ഏറ്റവും കൂടുതൽ ആകർഷിച്ചതും ഈ കഴിവായിരുന്നു.

‘അറ്റൻഷൻ വാർ’ നടക്കുന്ന കാലത്ത്ഇന്ന് നമ്മുടെ മുന്നിലൂടെ കടന്നുപോകു ന്ന ഉള്ളടക്കങ്ങളുടെ എണ്ണം അളവറ്റതാണ്. ഓരോ നിമിഷവും പുതിയൊരു വീഡിയോ, പുതിയൊരു റീൽ, പുതിയൊരു വാർത്ത, പുതിയൊരു വിവാദം നമ്മുടെ ശ്രദ്ധ പിടിച്ചുപറ്റാൻ ശ്രമിക്കുന്നു.

നമ്മുടെ ശ്രദ്ധയാണ് ഇന്ന് വലിയൊരു വിപണി.

ക്ലിക്കുകളും കാഴ്ചക്കാരുടെ എണ്ണവും പലപ്പോഴും ഉള്ളടക്കത്തിന്റെ വിജയത്തിന്റെ അളവുകോലായി മാറിയിരിക്കുന്നു. അതുകൊണ്ടുതന്നെ ഭയം, വിവാദം, രാഷ്ട്രീയം, വിദ്വേഷം, മറ്റുള്ളവരുടെ സ്വകാര്യജീവിതം തുടങ്ങിയവയിലേക്ക് മനുഷ്യന്റെ ശ്രദ്ധ തിരിച്ചുവിടുന്നത് എളുപ്പവഴിയാ യി മാറുന്നു.

എന്നാൽ ഒരു ചോദ്യം ഇവിടെ പ്രസക്തമാണ്:

നാം നിരന്തരം കാണുന്നതും കേൾക്കുന്നതും നമ്മുടെ മനസ്സിൽ എന്താണ് അവശേഷിപ്പിക്കുന്നത്?

ഓരോ ഉള്ളടക്കവും നമ്മിൽ ഒരു വികാരം സൃഷ്ടിക്കുന്നുണ്ട്. ചിലത് അസ്വസ്ഥത ഉണ്ടാക്കുന്നു. ചിലത് ഭയം വളർത്തുന്നു. ചിലത് കോപം വർധിപ്പിക്കുന്നു. ചിലത് അസൂയയും നിഷേധാത്മകതയും വളർത്തുന്നു.

അതേസമയം, മനസ്സിന് അല്പം ശാന്തി നൽകുന്ന, ചിന്തകളെ ഉയർത്തുന്ന, ജീവിതത്തെ കൂടുതൽ അർഥവത്തായി കാണാൻ സഹായിക്കുന്ന ഉള്ളടക്കങ്ങൾക്കും സമൂഹത്തിൽ ഇടമുണ്ടാകേണ്ടതുണ്ട്.

അത്തരം ഒരിടം സൃഷ്ടിക്കാനുള്ള ശ്രമമാണ് ധന്യമീജീവിതം. വിവാദങ്ങളുടെ വഴിയല്ല, വെളിച്ചത്തിന്റെ വഴി കൂടുതൽ കാഴ്ച ക്കാരെ

നേടാൻ എളുപ്പമുള്ള വഴികൾ പലതുണ്ട്. രാഷ്ട്രീയ തർക്കങ്ങൾ, വിവാദങ്ങൾ, വിദ്വേഷം, സെൻസേഷണൽ വിഷയങ്ങൾ—ഇവയൊക്കെ അതിന് സഹായകമാകാം.

ധന്യമീ ജീവിതം ആ വഴിയിലേക്ക് പോകാതിരിക്കാൻ ബോധപൂർവം തീരുമാനിച്ചു.

വിദ്വേഷം വളർത്തുന്ന ഒരു എപ്പിസോഡും, അനാവശ്യമായ രാഷ്ട്രീയ തർക്കം സൃഷ്ടിക്കുന്ന ഒരു അവതരണവും, വെറും ക്ലിക്കുകൾ നേടുന്നതിനായി നിർമിച്ച ഉള്ളടക്കവും ഈ പരമ്പരയുടെ ലക്ഷ്യമായിരുന്നില്ല.

മറിച്ച്, മനുഷ്യന്റെ മനസ്സിന് കരുത്ത് നൽകുക, ആശ്വസിപ്പിക്കുക, പ്രചോദിപ്പിക്കുക, ജീവിതത്തിന്റെ തിരക്കുകൾക്കിടയിൽ അൽപസമയം ശാന്തമായി ചിന്തിക്കാൻ അവസരം നൽകുക—ഇതായിരുന്നു ലക്ഷ്യം.

ഏഴ് വർഷം പിന്നിട്ടിട്ടും പ്രേക്ഷകരിൽനിന്ന് ലഭിക്കുന്ന സ്നേഹവും പ്രോത്സാഹനവും ഈ ശ്രമത്തിന്റെ പ്രസക്തി തെളിയിക്കുന്നു.

പുറത്തേക്കല്ല, ഉള്ളിലേക്ക് നോക്കാനുള്ള ക്ഷണംആധുനിക ലോകം നിരന്തരം നമ്മോട് ചോദിക്കുന്നത് പുറത്തുള്ള ലോകത്തെക്കുറിച്ചാണ്.ലോകത്ത് എന്താണ് സംഭവിക്കുന്നത്? മറ്റുള്ളവരുടെ ജീവിതത്തിൽ എന്താണ് നടക്കുന്നത്? ആരാണ് വിജയിച്ചത്? ആരാണ് പരാജയപ്പെട്ടത്? ആരാണ് എന്ത് പറഞ്ഞത്?

എന്നാൽ ഭാരതീയ ദർശനങ്ങളുടെ വലിയൊരു പ്രത്യേകത മനുഷ്യനെ മറ്റൊരു ചോദ്യത്തിലേക്ക് തിരിച്ചു നിർത്തുന്നതാണ്:

ഞാൻ ആരാണ്?

സ്വന്തം ഉള്ളിലേക്ക് നോക്കാൻ പഠിപ്പിക്കുന്ന അറിവാണ് ഉപനിഷത്തുകളും വേദാന്തവും ഉൾപ്പെടെയുള്ള ഭാരതീയ ജ്ഞാനപാരമ്പര്യം മുന്നോട്ടുവയ്ക്കുന്നത്.

വിദ്യാഭ്യാസം സ്കൂളിലും കോളേജിലും അവസാനിക്കുന്നില്ല. ബിരുദവും ജോലിയും സാമ്പത്തിക വിജയവും മാത്രം ജീവിതത്തിന്റെ പൂർണതയല്ല.

മനസ്സിനെ മനസ്സിലാക്കാനും ബന്ധങ്ങളെ തിരിച്ചറിയാനും ഉത്തരവാദിത്വങ്ങളെ നേരിടാനും ജീവിതത്തിലെ പ്രതിസന്ധികളെ അതിജീവിക്കാനും സ്വന്തം മൂല്യങ്ങളും ജീവിതലക്ഷ്യവും തിരിച്ചറിയാനും സഹായിക്കുന്ന അറിവും മനുഷ്യന് ആവശ്യമാണ്.

വേദങ്ങളും ഉപനിഷത്തുകളും പുരാണങ്ങളും ഇതിഹാസങ്ങളും വേദാന്തവും ഉൾപ്പെടുന്ന ഭാരതീയ ജ്ഞാനപാരമ്പര്യം അത്തരമൊരു ജീവിതജ്ഞാനത്തിന്റെ വലിയൊരു നിധിയാണ്.

ആ നിധിയിലെ ആശയങ്ങളെ കാലത്തിനനുസരിച്ചുള്ള ഭാഷയിൽ, സാധാരണ മനുഷ്യന്റെ ജീവിതവുമായി ബന്ധപ്പെടുത്തി അവതരിപ്പിക്കുകയാണ് ധന്യമീ ജീവിതം ചെയ്യുന്നത്.

ഗോപകുമാറിന്റെ നിശ്ശബ്ദ സാന്നിധ്യം

ഈ ഏഴുവർഷത്തെ യാത്രയിൽ ക്യാമറയ്ക്കു മുന്നിൽ പി. ആർ. നാഥനാണ്. എന്നാൽ ക്യാമറയ്ക്ക് പിന്നിൽ ഗോപകുമാർ എന്ന മറ്റൊരു മനുഷ്യന്റെ നിശ്ശബ്ദമായ സമർപ്പണമുണ്ട് .

താൻ സാങ്കേതികമായി പൂർണനല്ലെന്നും എഡിറ്റിങ്ങിലും ക്യാമറ കൈകാര്യം ചെയ്യുന്നതിലും ഇപ്പോഴും പഠിച്ചുകൊണ്ടിരിക്കുകയാണെന്നും ഗോപകുമാർ തന്നെ അഹങ്കാര ലേശമില്ലാതെ വിനയത്തോടെ സമ്മതിക്കുന്നു .

പക്ഷേ, എല്ലാ വലിയ സംരംഭങ്ങളും സാങ്കേതിക മികവിൽ മാത്രമല്ല പിറക്കുന്നത്. ഒരു ആശയത്തിലുള്ള വിശ്വാസവും അതിനോടുള്ള സമർപ്പണവുമാണ് പലപ്പോഴും അതിന്റെ അടിത്തറ.

പി. ആർ. നാഥന്റെ വിലപ്പെട്ട അറിവുകളും നിരീക്ഷണങ്ങളും ജീവിതാനുഭവങ്ങളും വരുംതലമുറകൾക്കായി സംരക്ഷിക്കപ്പെടണം എന്ന ചിന്തയാണ് ഗോപകുമാറിനെ ഈ യാത്രയിലേക്ക് നയിച്ചത്.

അതുകൊണ്ടുതന്നെ ധന്യമീ ജീവിതം പി. ആർ. നാഥന്റെ വാക്കുകളുടെ മാത്രം യാത്രയല്ല; ഒരു ശിഷ്യസമാനമായ ബന്ധത്തിൽനിന്ന് ജനിച്ച സംരക്ഷണത്തിന്റെയും പങ്കുവെക്കലിന്റെയും യാത്ര കൂടിയാണ്.

പിന്നിൽ നിന്നവരും ഈ യാത്രയുടെ ഭാഗം

ഒരു ദീർഘകാല സംരംഭം ഒരാളുടെ മാത്രം പരിശ്രമത്തിൽ പൂർത്തിയാകുന്നതല്ല.

കഴിഞ്ഞ ഏതാനും വർഷങ്ങളായി ക്യാമറ കൈകാര്യം ചെയ്ത പ്രശസ്ത നടനും ആധ്യാത്മിക പ്രഭാഷകനുമായ സത്ത സഹചാരിയുമായ ഇല്ലിക്കെട്ട് നമ്പൂതിരിയുടെ സാന്നിധ്യവും ഈ യാത്രയിൽ ഏറെ ശ്രദ്ധേയമാണ്

.ആദ്യകാലങ്ങളിൽ ക്യാമറ കൈകാര്യം ചെയ്ത ഗോപകുമാറിന്റെ പത്നി സായി പ്രീതി, ശ്രീ ജയന്ത് രാമചന്ദ്രൻ,രാമായണ എപ്പിസോഡുകളിൽ അവതാരകയായിരുന്ന അഞ്ജന ജയന്ത് എന്നിവരെയും ഈ അവസരത്തിൽ നന്ദിയോടെ ഓർക്കേണ്ടതുണ്ട്.

ഓരോരുത്തരുടെയും ചെറിയ സംഭാവനകൾ ചേർന്നാണ് ഒരു വലിയ യാത്ര രൂപപ്പെടുന്നത്.

ഏഴ് വർഷം; 1500 എപ്പിസോഡുകളിലേക്ക്

2019 ഓഗസ്റ്റിൽ ആരംഭിച്ച ധന്യമീ ജീവിതം ഇന്ന് ഏഴ് വർഷം പിന്നിടുകയാ ണ്. 1500 എപ്പിസോഡുകളിലേക്ക് എത്തിനിൽക്കുന്ന ഈ സംരംഭം യൂട്യൂബി ലെ മറ്റൊരു ഉള്ളടക്കപരമ്പര എന്നതിലുപരി ഒരു കാലഘട്ടത്തിന്റെ മാനസി ക ആവശ്യത്തോടുള്ള പ്രതികരണമായി കാണാം.

ശബ്ദങ്ങൾ കൂടിക്കൊണ്ടിരിക്കുന്ന കാലത്ത് അൽപം നിശ്ശബ്ദത.അസ്വസ്ഥതകൾ വർധിക്കുന്ന കാലത്ത് അൽപംആശ്വാസം.വിദ്വേഷം പടരുന്ന കാലത്ത് സ്നേഹത്തിന്റെ ഭാഷ.പുറത്തുള്ള ലോകത്തെ മാത്രം നോക്കാൻ നമ്മെ പ്രേരിപ്പിക്കുന്ന കാലത്ത് സ്വന്തം ഉള്ളിലേക്ക് നോക്കാനുള്ള ഒരു ക്ഷണം.

ഇതാണ് ധന്യമീ ജീവിതം നൽകുന്ന ഏറ്റവും വലിയ പ്രസക്തി.

പി. ആർ. നാഥൻ എന്ന എഴുത്തുകാരന്റെയും ചിന്തകന്റെയും പ്രഭാഷകന്റെയും ജീവിതാനുഭവങ്ങളിൽ നിന്ന് ഉയർന്നുവരുന്ന ഈ അറിവുകൾ രേഖപ്പെടുത്തുകയും കൂടുതൽ ആളുകളിലേക്ക് എത്തിക്കുകയും ചെയ്യുന്നതിലൂടെ ഗോപകുമാർ തന്റെ ഭാഗം നിർവഹിച്ചുകൊണ്ടിരിക്കുന്നു.

ഒരു മനുഷ്യന്റെ അറിവ് അയാളോടൊപ്പം അവസാനിക്കാതെ അടുത്ത തലമുറയിലേക്ക് കൈമാറപ്പെടുമ്പോഴാണ് അത് യഥാർഥത്തിൽ സമൂഹത്തിന്റെ സമ്പത്തായി മാറുന്നത്.

ആ അർഥത്തിൽ ധന്യമീ ജീവിതം പി. ആർ. നാഥൻ ലോകത്തിന് നൽകുന്ന ഒരു മനോഹരമായ സമ്മാനമാണ്.

അതോടൊപ്പം, ആ സമ്മാനം കൂടുതൽ ആളുകളിലേക്ക് എത്തിക്കാൻ പിന്നിൽനിന്ന് പ്രവർത്തിക്കുന്ന ഗോപകുമാറിന്റെ ഏഴുവർഷത്തെ നിശ്ശബ്ദമായ അധ്വാനത്തിന്റെയും സ്നേഹത്തിന്റെയും അടയാളം കൂടിയാണ്.