കുട്ടികളുടെ സോഷ്യൽ മീഡിയ ഉപയോഗം: നയപരമായ തീരുമാനം കേന്ദ്രം കൈക്കൊള്ളണമെന്ന് ഡൽഹി ഹൈക്കോടതി

ന്യൂഡൽഹി: കുട്ടികളുടെ സോഷ്യൽ മീഡിയ ഉപയോഗത്തിന് നിയന്ത്രണമേർപ്പെടുത്തുന്നതുൾപ്പെടെയുള്ള വിഷയങ്ങളിൽ അന്തിമ തീരുമാനം കേന്ദ്ര സർക്കാർ കൈക്കൊള്ളണമെന്ന് ഡൽഹി ഹൈക്കോടതി. കുട്ടികൾ സോഷ്യൽ മീഡിയ ഉപയോഗിക്കുന്നത് നിയന്ത്രിക്കണമെന്നും കുട്ടികളെ ലൈംഗികമായി ചൂഷണം ചെയ്യുന്ന ഉള്ളടക്കങ്ങളുടെ പ്രചരണം തടയണമെന്നും ആവശ്യപ്പെട്ടുള്ള പൊതുതാൽപര്യ ഹർജി പരിഗണിക്കവെയാണ് കോടതിയുടെ നിർദേശം.

13 വയസ്സിന് താഴെയുള്ള കുട്ടികളുടെ സോഷ്യൽ മീഡിയ ഉപയോഗം നിയന്ത്രിക്കുന്നതിന് നിയമമോ പ്രത്യേക മാർഗനിർദേശങ്ങളോ കൊണ്ടുവരണമെന്നും 13 മുതൽ 16 വയസ്സുവരെയുള്ള കുട്ടികൾക്കായി സോഷ്യൽ മീഡിയയിലെ ഉള്ളടക്ക ഉപയോഗത്തിന് വ്യക്തമായ നിയന്ത്രണ ചട്ടക്കൂട് രൂപീകരിക്കണമെന്നും ഹർജിയിൽ ആവശ്യപ്പെട്ടിരുന്നു.

ഹർജിയിൽ ഉന്നയിച്ച ആവശ്യങ്ങൾ കേന്ദ്ര സർക്കാർ നിവേദനമായി പരിഗണിച്ച് ഉചിതമായ തീരുമാനം കൈക്കൊള്ളണമെന്ന് ജസ്റ്റിസുമാരായ വി. കാമേശ്വർ റാവുവും മൻമീത് പി.എസ്. അറോറയും ഉൾപ്പെട്ട ബെഞ്ച് നിർദേശിച്ചു. വിഷയത്തിൽ തീരുമാനമെടുക്കുന്നതിന് മുമ്പ് സോഷ്യൽ മീഡിയ കമ്പനികൾ ഉൾപ്പെടെയുള്ള ബന്ധപ്പെട്ട കക്ഷികളുമായും ഹർജിക്കാരുമായും കേന്ദ്രം കൂടിയാലോചന നടത്തണമെന്നും കോടതി വ്യക്തമാക്കി.

എന്നാൽ തീരുമാനം എടുക്കുന്നതിന് കേന്ദ്ര സർക്കാരിന് പ്രത്യേക സമയപരിധി നിശ്ചയിക്കാൻ കോടതി തയ്യാറായില്ല. കുട്ടികളുടെ സോഷ്യൽ മീഡിയ ഉപയോഗത്തിന് നേരിട്ട് വിലക്ക് ഏർപ്പെടുത്താൻ കേന്ദ്രത്തിന് നിർദേശം നൽകുന്നത് കോടതിയുടെ പരിധിയിലുള്ള കാര്യമല്ലെന്നും ബെഞ്ച് വ്യക്തമാക്കി. വിഷയത്തിന്റെ വ്യാപ്തിയും സാമൂഹിക പ്രത്യാഘാതങ്ങളും കണക്കിലെടുത്ത് നയപരമായ തീരുമാനമാണ് ആവശ്യമെന്നും കോടതി നിരീക്ഷിച്ചു.

‘വിപുലമായ കൂടിയാലോചന ആവശ്യമാണ്’

കുട്ടികളുടെ സോഷ്യൽ മീഡിയ ഉപയോഗം നിയന്ത്രിക്കുന്നതിനായി പുതിയ നിയമനിർമാണം തന്നെ ആവശ്യമായി വന്നേക്കാമെന്നും അതിനാൽ വിഷയം ഗൗരവമായി പരിഗണിക്കേണ്ടതുണ്ടെന്നും കേന്ദ്ര സർക്കാരിനുവേണ്ടി ഹാജരായ അഭിഭാഷക നിധി രാമൻ കോടതിയെ അറിയിച്ചു.

ഇത്തരമൊരു നിയന്ത്രണം നടപ്പാക്കുന്നത് കുട്ടികൾക്കും ഡിജിറ്റൽ പ്ലാറ്റ്‌ഫോമുകൾക്കും സമൂഹത്തിനും വിവിധ തരത്തിലുള്ള പ്രത്യാഘാതങ്ങൾ ഉണ്ടാക്കാൻ സാധ്യതയുള്ളതിനാൽ ബന്ധപ്പെട്ട മേഖലകളിലെ എല്ലാ കക്ഷികളുമായും വിശദമായ ചർച്ചകൾ നടത്തേണ്ടതുണ്ടെന്നും അവർ വ്യക്തമാക്കി.

കുട്ടികളുടെ സ്വകാര്യതയും വ്യക്തിഗത വിവരങ്ങളുടെ സുരക്ഷയും ഉറപ്പാക്കുന്നതിനായി രാജ്യത്ത് ഡിജിറ്റൽ പേഴ്സണൽ ഡാറ്റ പ്രൊട്ടക്ഷൻ നിയമം നിലവിലുണ്ടെന്നും കേന്ദ്രം കോടതിയെ അറിയിച്ചു.

ലൈംഗിക ചൂഷണ ഉള്ളടക്കങ്ങൾക്കെതിരെ നടപടി ശക്തമെന്ന് മെറ്റ

കുട്ടികളെ ലൈംഗികമായി ചൂഷണം ചെയ്യുന്ന ദൃശ്യങ്ങളും മറ്റ് നിയമവിരുദ്ധ ഉള്ളടക്കങ്ങളും തടയുന്നതിന് പ്ലാറ്റ്‌ഫോമുകളിൽ ശക്തമായ സംവിധാനങ്ങൾ പ്രവർത്തിക്കുന്നുണ്ടെന്ന് മെറ്റാ പ്ലാറ്റ്‌ഫോംസ് കോടതിയെ അറിയിച്ചു.

കഴിഞ്ഞ വർഷം മാത്രം ഫേസ്ബുക്കിൽനിന്ന് ആറുലക്ഷത്തിലേറെ പോസ്റ്റുകളും ഇൻസ്റ്റാഗ്രാമിൽനിന്ന് രണ്ടുലക്ഷത്തിലേറെ പോസ്റ്റുകളും ഇത്തരത്തിലുള്ള ഉള്ളടക്കത്തിന്റെ പേരിൽ നീക്കം ചെയ്തതായി കമ്പനിക്കുവേണ്ടി ഹാജരായ മുതിർന്ന അഭിഭാഷകൻ വ്യക്തമാക്കി.

ഇത്തരം ഉള്ളടക്കങ്ങൾ സാധാരണ ഉപയോക്താക്കൾക്ക് ലഭ്യമാകുന്നതിന് മുമ്പുതന്നെ കണ്ടെത്തുന്നതിൽ പ്ലാറ്റ്‌ഫോമുകൾക്ക് 99 ശതമാനം വരെ കാര്യക്ഷമതയുണ്ടെന്നും അദ്ദേഹം പറഞ്ഞു. നിയമലംഘനവുമായി ബന്ധപ്പെട്ട നിരവധി അക്കൗണ്ടുകൾ ഇതിനൊപ്പം റദ്ദാക്കുന്നുണ്ടെന്നും മെറ്റ കോടതിയെ അറിയിച്ചു.

സാങ്കേതികവിദ്യയുടെ സഹായത്തോടെ ഇത്തരം ഉള്ളടക്കങ്ങൾ തിരിച്ചറിയാനും നീക്കംചെയ്യാനും സംവിധാനങ്ങൾ കൂടുതൽ കാര്യക്ഷമമാക്കിയിട്ടുണ്ടെങ്കിലും എല്ലാ സംഭവങ്ങളും പൂർണമായും തടയുക പ്രായോഗികമായി ബുദ്ധിമുട്ടാണെന്നും കമ്പനി വ്യക്തമാക്കി. ചില ഉള്ളടക്കങ്ങൾ സുരക്ഷാ സംവിധാനങ്ങളെ മറികടന്ന് പ്ലാറ്റ്‌ഫോമുകളിൽ എത്തുന്നുണ്ടെന്നും പിന്നീട് അവ വാർത്തകളാകുന്നുണ്ടെന്നും അഭിഭാഷകൻ കോടതിയിൽ ചൂണ്ടിക്കാട്ടി.

കുട്ടികളുടെ ഓൺലൈൻ സുരക്ഷ, സ്വകാര്യത, സോഷ്യൽ മീഡിയ ഉപയോഗം എന്നിവ സംബന്ധിച്ച് രാജ്യത്ത് കൂടുതൽ ശക്തമായ നിയന്ത്രണങ്ങൾ ആവശ്യമാണോ എന്നതിൽ ഇനി കേന്ദ്ര സർക്കാരിന്റെ നയപരമായ തീരുമാനത്തിനാണ് പ്രാധാന്യം