വികസനവഴിയിൽ വഴിമുട്ടരുത് ചോമ്പാല; കേറ്റിൽ അണ്ടർപാസിനായി ജനസമരം

ദേശീയപാത വികസനത്തിന് നാട്ടുകാർ എതിരല്ല. യാത്രാസൗകര്യങ്ങൾ മെച്ചപ്പെടണം, റോഡുകൾ വികസിക്കണം എന്നതിലും തർക്കമില്ല. എന്നാൽ അതിന്റെ പേരിൽ പതിറ്റാണ്ടുകളായി പ്രവർത്തിച്ചുവരുന്ന സർക്കാർ മൃഗാശുപത്രിയിലേക്കുള്ള സുരക്ഷിതമായ പ്രവേശനം ഇല്ലാതാക്കുന്നത് വികസനത്തിന്റെ പേരിൽ നീതിയെ തന്നെ അവഗണിക്കുന്നതല്ലേയെന്ന ചോദ്യമാണ് സമരപ്പന്തലിൽ നിന്ന് ഉയരുന്നത്.

പ്രമുഖ എഴുത്തുകാരൻ സത്യൻ മാടാക്കരപറഞ്ഞു:

യഥാർഥ വികസനം റോഡുകൾ മാത്രം നിർമ്മിക്കുന്നതിലല്ല; ആ റോഡുകളുടെ ഇരുവശത്തും ജീവിക്കുന്ന മനുഷ്യരെയും അവരുടെ ജീവിതോപാധികളെയും സുരക്ഷിതമായി മുന്നോട്ടുകൊണ്ടു പോകു ന്നതിലാണ് വികസനത്തിന്റെ അർഥം.

ഇതുതന്നെയാണ് ചോമ്പാലയിലെ സമരത്തിന്റെ അടിസ്ഥാന ആശയവും.

ഒരു അണ്ടർപാസിന്റെ ആവശ്യത്തിനപ്പുറം ഒരു നാടിന്റെ ജീവിതം

സമരത്തിന്റെ ആവശ്യം ലളിതമാണ്—ദേശീയപാതയിൽ ചോമ്പാലിൽ ഒരു കേറ്റിൽ അണ്ടർപാസ് അനുവദിക്കുക.

അഴിയൂർ, ഒഞ്ചിയം, ഏറാമല, ചോറോട്, മാഹി തുടങ്ങിയ പ്രദേശങ്ങളിൽ നിന്നുള്ള നിരവധി കർഷകരും ക്ഷീരോൽപാദകരും വർഷങ്ങളായി കന്നുകാലികളെയും മറ്റു വളർത്തുമൃഗങ്ങളെയും ചോമ്പാൽ ബ്ലോക്ക് ഓഫീസിനോട് ചേർന്നുള്ള സർക്കാർ മൃഗാശുപത്രിയിലെത്തിച്ചുവരുന്നു.

രോഗബാധിതമായ ഒരു മൃഗത്തെ ചികിത്സയ്ക്കായി ആശുപത്രിയിലെത്തിക്കുക എന്നത് കർഷകന്റെ ജീവിതത്തിലെ സാധാരണ കാര്യമാണെങ്കിലും, ദേശീയപാത വികസനം പൂർത്തിയാകുന്നതോടെ അതിനുള്ള സുരക്ഷിതമായ സഞ്ചാരപാത ഇല്ലാതാകുമെന്ന ആശങ്കയാണ് ഇപ്പോൾ ഇവരെ സമരത്തിലേക്ക് എത്തിച്ചിരിക്കുന്നത്.

ആശുപത്രിയിലേക്കുള്ള വഴിക്കൊപ്പം ചോമ്പാൽ മിനി സ്റ്റേഡിയത്തിലേ ക്കുള്ള നിലവിലെ സഞ്ചാരപാതയും ഇല്ലാതാകുമെന്ന ആശങ്ക നിലനിൽക്കുന്നു.

അതിനുള്ള പ്രായോഗികവും സുരക്ഷിതവുമായ പരിഹാരമായാണ് കേറ്റിൽ അണ്ടർപാസ് ആവശ്യപ്പെടുന്നത്.

കേറ്റിൽ അണ്ടർപാസ് വെറുമൊരു തുരങ്കപാതയല്ല. ദേശീയപാതയുടെ അതിവേഗ ഗതാഗതത്തിനിടയിൽ വളർത്തുമൃഗങ്ങളെയും അവയെ അനുഗമിക്കുന്ന മനുഷ്യരെയും സുരക്ഷിതമായി മറുവശത്തെത്തിക്കു ന്നതിനുള്ള സംവിധാനമാണത്. ആവശ്യമായ രൂപകൽപനയോടെ കാൽനടയാത്രക്കാർക്കും ഇരുചക്രവാഹനങ്ങൾക്കും ഉപയോഗിക്കാവുന്ന രീതിയിലും ഇത്തരം സംവിധാനങ്ങൾ ഒരുക്കാനാകും.

അതുകൊണ്ടുതന്നെ ചോമ്പാലിലെ ആവശ്യം ഒരു ചെറിയ റോഡ് സൗകര്യത്തിനായുള്ള പിടിവാശിയല്ല. വികസനത്തിന്റെ കണക്കുകൾക്കിടയിൽ കാണാതെ പോകുന്ന ഒരു ഗ്രാമത്തിന്റെ ജീവിതാവകാശത്തിനായുള്ള ആവശ്യമാണത്.

ഇത് ഒരു പാർട്ടിയുടെ സമരമല്ല; ഒരു നാടിന്റെ ആവശ്യമാണ്

അഡ്വ. സന്തോഷ് എ. എം. സമരപ്പന്തലിൽ ചൂണ്ടിക്കാട്ടിയത് ഈ ജനകീയ സ്വഭാവമാണ്.

“ഇത് ഒരു രാഷ്ട്രീയ പാർട്ടിയുടെ സമരമല്ല. ഒരു നാടിന്റെ ആവശ്യമാണ്. കർഷകരുടെയും ക്ഷീരോൽപാദകരുടെയും സാധാരണ ജനങ്ങളുടെയും ജീവിതത്തെ നേരിട്ട് ബാധിക്കുന്ന ഗൗരവതരമായ വിഷയമാണിത്.”

അദ്ദേഹത്തിന്റെ വാക്കുകൾക്ക് പിന്നാലെ നിരവധി പ്രമുഖർ സമരത്തിന് പിന്തുണ പ്രഖ്യാപിച്ച് സംസാരിച്ചു.

വികസനം ആരുടെയും എതിരാളിയല്ല. എന്നാൽ വികസനത്തിന്റെ പേരിൽ സ്വന്തം ജീവിതത്തിലേക്കുള്ള വഴികൾ അടയുമ്പോൾ ചോദ്യം ചോദിക്കേണ്ടിവരുന്നവരാണ് ചോമ്പാലയിലെ ജനങ്ങൾ.

ഒരു ഭാഗത്ത് അതിവേഗത്തിൽ പായുന്ന ദേശീയപാത.

മറുഭാഗത്ത് രോഗബാധിതമായ കന്നുകാലിയുമായി ആശുപത്രിയിലേക്കുള്ള കർഷകൻ.

ഇവയ്ക്കിടയിൽ സുരക്ഷിതമായൊരു വഴി ഒരുക്കാൻ കഴിയാത്ത വികസനം എത്രമാത്രം സമ്പൂർണമാകും എന്നതാണ് ഇപ്പോൾ ഉയരുന്ന ചോദ്യം.

മഴ പെയ്താലും വെയിൽ കത്തിയാലും സമരപ്പന്തൽ അവിടെത്തന്നെയുണ്ട്.

അതിന്റെ കീഴിൽ നിൽക്കുന്നത് ഒരു രാഷ്ട്രീയ മുദ്രാവാക്യമല്ല.

വികസനം വേണം; പക്ഷേ ഞങ്ങളുടെ ജീവിതം വഴിമുട്ടുന്ന വികസനം വേണ്ട.

എന്ന ഒരു നാടിന്റെ നിശ്ശബ്ദമായ നിലവിളിയാണ്.

ദേശീയപാത മുന്നോട്ടുപോകട്ടെ.

ചോമ്പാലയും മുന്നോട്ടുപോകട്ടെ.

പക്ഷേ വികസനത്തിന്റെ പാതയിൽ ഒരു ഗ്രാമത്തിന്റെ ജീവിതം പിന്നിലാകാതിരിക്കാനുള്ള ഒരു ചെറിയ വഴിയെങ്കിലും തുറന്നിടണ മെന്നാണ് ചോമ്പാലയുടെ ആവശ്യം.

ആ വഴിയുടെ പേരാണ്—

കേറ്റിൽ അണ്ടർപാസ്.

:ദിവാകരൻ ചോമ്പാല