ചില സൗന്ദര്യങ്ങൾ പ്രായത്തോടൊപ്പം മങ്ങുകയല്ല, പാകപ്പെടുകയാണ്

പ്രായം ശരീരത്തിന്റേതാണ്; ആത്മവിശ്വാസത്തിന് പ്രായമില്ല.

വസ്ത്രധാരണത്തെ പ്രായത്തിന്റെയും ലിംഗത്തിന്റെയും ചട്ടക്കൂടുകളിൽ തളച്ചിടുന്ന ഒരു സാമൂഹിക മനോഭാവം നമുക്കിടയിൽ ഇപ്പോഴും ശക്തമാണ്. ഒരു പ്രത്യേക പ്രായം കഴിഞ്ഞാൽ സ്ത്രീകൾ എങ്ങനെ വസ്ത്രം ധരിക്കണം, എങ്ങനെ മുടിയൊരുക്കണം, എങ്ങനെ പൊതുസമൂഹത്തിൽ പ്രത്യക്ഷപ്പെടണം എന്നൊക്കെ സമൂഹം നിശ്ചയിച്ചുകൊടുക്കാൻ ശ്രമിക്കുന്നു. എന്നാൽ ഒരാൾക്ക് തനിക്കിണങ്ങുന്നതും താൻ സുഖകരമായി അനുഭവിക്കുന്നതുമായ വസ്ത്രം തിരഞ്ഞെടുക്കാനുള്ള അവകാശം അയാളുടേതുതന്നെയാണ്.

വിവാഹവേദിയിൽ പോകുമ്പോൾ ധരിക്കുന്ന വേഷവും ശവസംസ്കാരച്ചടങ്ങിൽ പങ്കെടുക്കുമ്പോൾ ധരിക്കുന്ന വേഷവും ഒരുപോലെയല്ല. ഒരു ഡോക്ടർ ആശുപത്രിയിൽ ധരിക്കുന്ന വേഷത്തിനും ഒരു കലാകാരൻ വേദിയിൽ ധരിക്കുന്ന വേഷത്തിനും ഒരേ ധർമ്മമല്ല. ഓരോ തൊഴിലും ഓരോ സാഹചര്യവും അതിന്റേതായ വേഷഭാഷ ആവശ്യപ്പെടുന്നു. അതിനാൽ തൊഴിൽപരമായ അവതരണത്തെയും സ്വകാര്യജീവിതത്തിലെ വേഷധാരണത്തെയും ഒരേ അളവുകോലിൽ അളക്കുന്നത് ശരിയല്ല.

വസ്ത്രമല്ല, മനുഷ്യനാണ് വലുത്

ചരിത്രം നമ്മെ പഠിപ്പിക്കുന്ന ഏറ്റവും വലിയ പാഠങ്ങളിലൊന്നും ഇതുതന്നെയാണ്.

മഹാത്മാഗാന്ധി ധരിച്ചിരുന്ന അത്യന്തം ലളിതമായ വേഷം ഒരുകാലത്ത് പരിഹാസത്തിനും വിമർശനത്തിനും കാരണമായിരുന്നു. വിൻസ്റ്റൺ ചർച്ചിൽ ഗാന്ധിയെ അപമാനകരമായി വിശേഷിപ്പിച്ചതും ചരിത്രത്തിന്റെ ഭാഗമാണ്. എന്നാൽ ആ വേഷത്തിനുള്ളിൽ ഒളിച്ചിരുന്ന ആത്മശക്തിയെ ബ്രിട്ടീഷ് സാമ്രാജ്യത്തിന് പരിഹസിച്ചുതള്ളാനായില്ല. ഒരു മുണ്ട്, ഒരു വടി, അഹിംസ .ഇത്രയും ലളിതമായ പ്രതീകങ്ങളിലൂടെ ഗാന്ധി ലോകചരിത്രത്തിൽ അസാധാര ണമായൊരു അധ്യായം എഴുതുകയായിരുന്നു.നമ്മുടെ നാട്ടിലും ഇതിന് ഉദാഹരണങ്ങൾ ഏറെയുണ്ട്. എൻ്റെ നാട്ടുകാരൻ മുല്ലപ്പള്ളി രാമചന്ദ്രൻ ഖദർ മുണ്ടുടുത്തുകൊണ്ട് പാർലമെന്റിന്റെ പടികൾ കയറിയ രാഷ്ട്രീയജീവിതത്തിന്റെ ചിത്രങ്ങൾ നമുക്ക് പരിചിതമാണ്.

വേഷത്തിന്റെ ആഡംബരമല്ല, വ്യക്തിത്വത്തിന്റെ ആഴമാണ് മനുഷ്യനെ വലുതാക്കുന്നത്.

ചെരിപ്പിടാത്ത കാലുകളുമായി, തോളിലൊരു തോൽസഞ്ചിയുമായി, അയഞ്ഞ കുപ്പായമിട്ട് തെരുവിന്റെ മണമുള്ള സിനിമകളിലൂടെ നടന്നുപോയ ജോൺ എബ്രഹാമും ഇതിന്റെ മറ്റൊരു ഉദാഹരണമാണ്. അദ്ദേഹം ആരെയും അനുകരിച്ചില്ല; സ്വന്തം വഴിയിലൂടെ നടന്നു.

ഡോ. എ.പി.ജെ. അബ്ദുൾകലാമിന്റെ ലാളിത്യവും അതുപോലെതന്നെ. വേഷത്തിൽ വലിയ ആഡംബരങ്ങളൊന്നുമില്ലാതിരുന്നിട്ടും ലോകം അദ്ദേഹത്തെ ആദരിച്ചത് അദ്ദേഹത്തിന്റെ വസ്ത്രം കണ്ടല്ല, അദ്ദേഹത്തിന്റെ ചിന്തകളെ കണ്ടാണ്.

കുറിയ മുണ്ടുടുത്ത കുഞ്ഞുണ്ണിമാഷ്, വൈക്കം മുഹമ്മദ് ബഷീർ, ആർട്ടിസ്റ്റ് നമ്പൂതിരി — ഇവരൊക്കെ തങ്ങളുടേതായ ലാളിത്യത്തിലൂടെ മലയാളിയുടെ മനസ്സിൽ ഇടം നേടിയവർ . അവർക്ക് പ്രസിദ്ധിയുണ്ടാക്കിയത് വേഷത്തിലെ കൃത്രിമത്വമല്ല; തങ്ങളുടെ വ്യക്തിത്വത്തെക്കുറിച്ചുള്ള ഉറച്ച ബോധ്യമായിരുന്നു.പാരമ്പര്യം ഉപേക്ഷിക്കാതെ ലോകത്തെ അഭിമുഖീകരിച്ചവർ

പാരമ്പര്യം ഉപേക്ഷിക്കാതെ ലോകത്തെ അഭിമുഖീകരിച്ചവർ

ഗുരുദേവ് ശ്രീശ്രീ രവിശങ്കർ, അമൃതാനന്ദമയി അമ്മ തുടങ്ങിയ ആത്മീയ നേതാക്കൾ ലോകത്തിന്റെ വിവിധ ഭാഗങ്ങളിലേക്ക് സഞ്ചരിക്കുമ്പോഴും തങ്ങളുടെ പരമ്പരാഗത വേഷത്തിൽ തന്നെയാണ് പൊതുസമൂഹത്തെ അഭിമുഖീകരിക്കുന്നത്. പാശ്ചാത്യ ലോകത്തിന്റെ ഫാഷൻ അനുകരിക്കാത്തത് അവരുടെ അന്താരാഷ്ട്ര സ്വീകാര്യതയ്ക്ക് ഒരിക്കലും തടസ്സമായിട്ടില്ല. മറിച്ച്, തങ്ങളുടെ സംസ്കാരത്തിന്റെ തനിമയോടുള്ള ആത്മവിശ്വാസമായാണ് അത് പലപ്പോഴും വായിക്കപ്പെട്ടത്.

സാമൂഹിക-ജീവകാരുണ്യ പ്രവർത്തനങ്ങളുടെ പേരിൽ അറിയപ്പെടുന്ന ദയാബായി'അമ്മ യുടെ ജീവിതത്തിലും പുറംമോടിയേക്കാൾ പ്രവർത്തനത്തിനാണ് പ്രാധാന്യം. തെരുവോരങ്ങളിൽ പോലും ലളിതമായ അലസവും അശ്രദ്ധാപൂർണ്ണവുമായ വേഷത്തിൽ കഴിയുന്ന അവരുടെ ചിത്രങ്ങൾ നമ്മൾ ആദരവോടെയല്ലാതെ ആർക്കെങ്കിലും നോക്കിക്കാണാനാവുമോ ?

ഇവയെല്ലാം ചേർന്ന് പറയുന്നത് ഒരേയൊരു കാര്യമാണ് — മനുഷ്യന്റെ മഹത്വം അയാൾ ധരിക്കുന്ന വസ്ത്രത്തിലല്ല, അയാൾ ധരിക്കുന്ന മൂല്യങ്ങളിലാണ്.ഇടപെടലുകളിലാണ്

ഡോ .ലക്ഷ്മി നായർ: പ്രായത്തെക്കാൾ മുന്നിൽ നിൽക്കുന്ന ആത്മവിശ്വാസം

അതുകൊണ്ടുതന്നെ ലക്ഷ്മി നായരുടെ വേഷത്തെക്കുറിച്ചുള്ള വിമർശനങ്ങളെ വ്യക്തിപരമായ ഇഷ്ടാനിഷ്ടങ്ങളുടെ പരിധിയിൽ മാത്രംഒതുക്കി നിർത്തേണ്ടതുണ്ട്.

 ഇഷ്ടപ്പെടാതിരിക്കാം. അഭിപ്രായം പറയാം. പക്ഷേ ഒരു സ്ത്രീയുടെ പ്രായം ചൂണ്ടിക്കാട്ടി അവൾക്ക് എന്ത് ധരിക്കണം എന്ന് സമൂഹം വിധിച്ചുകൊടുക്കുന്ന രീതി തികസിച്ചും വിരോധാഭാസമാണ് ,സർക്കസ്സുകാരിയുടെയും സന്യാസിനിയുടെയും വേഷം ഒന്നല്ലെന്ന കാര്യം നമ്മൾ മറന്നുകൂടാ

ഒരു സെലിബ്രിറ്റി അവതാരകയായി, മോഡലായി, ക്യാമറയ്ക്ക് മുന്നിലെ വിവിധ പ്രൊഫഷണൽ വേഷങ്ങളിൽ, സ്വന്തം പ്രായത്തെ നിഷ്പ്രഭമാക്കി കാഴ്ചക്കാരിൽ ദൃശ്യവിസ്മയം സൃഷ്ടിക്കാൻ കഴിയുന്നത് വെറുമൊരു വേഷത്തിന്റെ പ്രത്യേകതയല്ല. അതിനു പിന്നിൽ ആത്മവിശ്വാസവും അനുഭവവും സ്വന്തം ശരീരത്തെയും വ്യക്തിത്വത്തെയും കുറിച്ചുള്ള സ്വീകാര്യതയും വേണം.

പ്രായം മുന്നോട്ടുപോകുമ്പോൾ സൗന്ദര്യം അവസാനിക്കുന്നില്ല; അതിന്റെ നിർവചനം മാത്രമാണ് മാറുന്നത്.

ഒരിക്കൽ യുവത്വത്തിന്റെ തിളക്കമായിരുന്ന സൗന്ദര്യം പിന്നീട് പക്വതയുടെ ആത്മവിശ്വാസമാകാം. ഒരിക്കൽ ഫാഷനായിരുന്നത് പിന്നീട് വ്യക്തിത്വത്തിന്റെ അടയാളമാകാം. അതിനാൽ ഒരു സ്ത്രീയുടെ പ്രായം അവളുടെ വസ്ത്രത്തിന്റെ നീളമോ നിറമോ ശൈലിയോ നിശ്ചയിക്കാനുള്ള ലൈസൻസല്ല.

അവസാനം, നമ്മൾ ഓർക്കേണ്ടത് ഇത്രമാത്രം:

വസ്ത്രം ശരീരത്തെ അലങ്കരിച്ചേക്കാം; പക്ഷേ വ്യക്തിത്വമാണ് മനുഷ്യനെ അലങ്കരിക്കുന്നത്.

ആരെങ്കിലും ധരിക്കുന്ന വസ്ത്രത്തെക്കുറിച്ച് വിധിയെഴുതുന്നതിനു മുമ്പ്, ആ വേഷത്തിനുള്ളിൽ നിൽക്കുന്ന മനുഷ്യനെ കാണാൻ നമുക്ക് കഴിയണം. കാരണം കാലം മാറുമ്പോൾ വേഷങ്ങൾ മാറും, സൗന്ദര്യസങ്കൽപ്പങ്ങൾ മാറും, ഫാഷൻ മാറും. എന്നാൽ സ്വന്തം വ്യക്തിത്വത്തിൽ ഉറച്ചുനിൽക്കാനുള്ള ആത്മവിശ്വാസം — അതാണ് മനുഷ്യന്റെ യഥാർത്ഥ സൗന്ദര്യം.

ഡോ. ലക്ഷ്മി നായരുടെ കാര്യത്തിലും അതുതന്നെയാണ് കാണേണ്ടത്.

അവരുടെ വേഷത്തെക്കാൾ വലിയതാണ് അവരുടെ വ്യക്തിത്വം; പ്രായത്തെക്കാൾ ശക്തമാണ് അവരുടെ അഴകളവുകൾ ,ശബ്ദമധുരിമ ആത്മവിശ്വാസം; വിമർശനങ്ങളെക്കാൾ ഉയർന്നതാണ് സ്വന്തം വഴിയിൽ മുന്നോട്ടുപോകാനുള്ള അവരുടെ സ്വാതന്ത്ര്യവും ഇച്ഛാശക്തിയും എന്നുപറഞ്ഞാൽ തെറ്റാവില്ല . 

:ദിവാകരൻ ചോമ്പാല