പോലീസും കോടതിയും ആക്രമിക്കാൻ ഇടവരരുത്: ഡോക്ടർ കെ.കെ.എൻ. കുറുപ്പ്

കൊച്ചി : ജനാധിപത്യ സമൂഹത്തിൽ പോലീസും കോടതിയും ആക്രമിക്കപ്പെടുന്ന അവസ്ഥ ഉണ്ടാകരുതെന്നും അക്രമരഹിതമായ പോരാട്ട വീര്യമാണ് നമ്മുടെ സമര പ്രസ്ഥാനങ്ങൾ സ്വീകരിക്കേണ്ടതെന്നും പ്രമുഖ ചരിത്രകാരനും അധ്യാപകനുമായ ഡോക്ടർ കെ.കെ.എൻ. കുറുപ്പ് പ്രസ്താവിച്ചു. ഡൽഹിയിലെ ജന്തർ മന്ദിറിൽ അക്രമരഹിതമായി സമരം ചെയ്ത വിദ്യാർത്ഥികൾ വലിയൊരു പാഠമാണ് നമ്മെ പഠിപ്പിച്ചത് . പോലീസിന് നേരെ തിരിച്ചടിക്കാൻ അവസരമുണ്ടായിട്ടും, അടിയേറ്റു വാങ്ങിയും ക്ഷമ പാലിച്ചുമാണ് അവർ അഹിംസാത്മകമായ ബഹുജന സമരത്തെ മുന്നോട്ടുനയിച്ചത്. ഗാന്ധിജിയും യേശുക്രിസ്തുവും കാണിച്ചുതന്ന അതേ തത്വശാസ്ത്രമാണ് നമ്മുടെ വിദ്യാർത്ഥി-ബഹുജന പ്രസ്ഥാനങ്ങളും കടമയായി സ്വീകരിക്കേണ്ടതെന്നും അദ്ദേഹം കൂട്ടിച്ചേർത്തു.

നമുക്ക് ഏറ്റവും ആവശ്യമായ സ്ഥാപനങ്ങളാണ് പോലീസും കോടതിയും. അവയോട് ആശയപരമായ ചെറുത്തുനിൽപ്പുകളാണ് സാധ്യമാക്കേണ്ടത്. ഡ്യൂട്ടിയിലുള്ള പോലീസുകാരെ അധിക്ഷേപിക്കുന്നതും തെറിവിളിച്ച് നിർവീര്യമാക്കാൻ ശ്രമിക്കുന്നതും സാംസ്കാരിക കേരളത്തിന് ചേർന്നതല്ല. അക്രമത്തിലൂടെ മാത്രമേ അവകാശങ്ങൾ നേടിയെടുക്കാൻ സാധിക്കൂ എന്ന തെറ്റായ സന്ദേശം വരുതലമുറയ്ക്ക് നൽകുന്നത് അപകടകരമാണ്.

രണ്ടാം ലോകമഹായുദ്ധകാലത്ത് ബെർലിനിൽ ബോംബെറിയാൻ പോയ ഗാരി ഡേവിസ് എന്ന ഫ്രഞ്ച് യുദ്ധവൈമാനികൻ, അവിടെ കളിക്കുന്ന കൊച്ചുകുട്ടികളെയും പന്ത്രണ്ടാം നൂറ്റാണ്ടിലെ ക്രൈസ്തവ ദേവാലയവും കണ്ട് ബോംബിടാതെ പാരിസിലേക്ക് മടങ്ങിയ സംഭവം കുറുപ്പ് ഓർമ്മിപ്പിച്ചു. തുടർന്ന് യുദ്ധവിചാരണ നേരിട്ട് ജയിൽവാസം അനുഭവിച്ച ഗാരി ഡേവിസിന്റെ ജീവിതം ഓരോ പൗരനും പഠിക്കേണ്ടതാണ്. വിക്ടർ യൂഗോയുടെ 'പാവങ്ങൾ' എന്ന നോവലിലെ കരുണാമയനായ ക്രിസ്തീയ പുരോഹിതനും ഗാരി ഡേവിസും തമ്മിൽ വ്യത്യാസമില്ല. ഇത്തരം മാനവിക മൂല്യങ്ങൾ ഉൾക്കൊണ്ട്(വ്യവസ്ഥിതി മാറ്റിയെടുക്കാൻ ഓരോ പൗരനും ശ്രമിക്കണമെന്നും അദ്ദേഹം ആവശ്യപ്പെട്ടു.

ചിത്രം :പ്രതീകാത്മകം