കർമ്മയോഗിക്ക് വിട: പാലേരി രമേശൻ പകർന്ന അപാരമായ കരുത്ത്

കേരളത്തിന്റെ സഹകരണ പ്രസ്ഥാനത്തിന്റെ ചരിത്രത്തിൽ സമാനത കളില്ലാത്ത കയ്യൊപ്പ് ചാർത്തിയ അതുല്യ പ്രതിഭയാണ് പാലേരി രമേശൻ. ലോകത്തിന്റെ മുന്നിൽ അഭിമാനത്തോടെ തലയുയർത്തി നിൽക്കുന്ന ഊരാളുങ്കൽ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റിയെ (യു.എൽ.സി.സി.എസ്) ഇന്നത്തെ നിലയിലേക്ക് വളർത്തിയെടുത്ത അമരക്കാരന്റെ വിയോഗം കേരളക്കരയ്ക്ക്, പ്രത്യേകിച്ച് വടകരയുടെ മണ്ണിലെ തൊഴിലാളി വർഗ്ഗത്തിന് താങ്ങാനാവാത്ത അപരിഹാര്യമായ നഷ്ടമാണ് സമ്മാനിച്ചിരിക്കുന്നത്.

വാഗ്ഭടാനന്ദ ഗുരുവിന്റെ ആശയങ്ങളിൽ നിന്നും ആവേശം ഉൾക്കൊണ്ട് 1925-ൽ സ്ഥാപിതമായ ഒരു ചെറിയ ലേബർ സൊസൈറ്റിയെ, ആധുനിക കാലത്തിന്റെ സകല വെല്ലുവിളികളെയും അതിജീവിച്ച് 18,000-ലധികം തൊഴിലാളികൾക്ക് ആശ്രയമായ മഹാപ്രസ്ഥാനമാക്കി മാറ്റിയെടുക്കുന്നതിൽ രമേശൻ പാലേരി വഹിച്ച പങ്ക് സമാനതകളില്ലാത്തതാണ്. അടിയുറച്ച സത്യസന്ധതയും, അടിയന്തിര ഘട്ടങ്ങളിൽ കൃത്യമായ തീരുമാനങ്ങൾ എടുക്കാനുള്ള അസാധാരണ പാടവവും അദ്ദേഹത്തെ മറ്റുള്ളവരിൽ നിന്നും വ്യത്യസ്തനാക്കി.

"സത്യസന്ധത, അർപ്പണബോധം, ആത്മധൈര്യം, ടീം വർക്ക്—വാഗ്ഭടാനന്ദ ഗുരുവിന്റെ ഈ ആശയങ്ങൾ സംഘത്തെ നയിക്കുന്നവർ സ്വീകാര്യജീവിതത്തിലും പകർത്തുമ്പോൾ അത് തൊഴിലാളി വർഗ്ഗത്തിന്െറ വിശ്വാസ്യതയാണ് ഉണ്ടാക്കിയെടുത്തത്." — രമേശൻ പാലേരി

പാരമ്പര്യത്തിന്റെ കരുത്തും ആധുനികതയുടെ പ്രൗഢിയും

1984-ൽ ഊരാളുങ്കൽ സൊസൈറ്റിയിൽ ഓവർസിയറായി ഔദ്യോഗിക ജീവിതം ആരംഭിച്ച രമേശൻ പാലേരി, 1995 മുതൽ സംഘടനയുടെ പ്രസിഡന്റായി ചുമതലയേറ്റെടുത്തതോടെയാണ് സ്ഥാപനത്തിന്റെ യഥാർത്ഥ കുതിച്ചുചാട്ടം ആരംഭിക്കുന്നത്. നിർമ്മാണ മേഖലയിൽ മാത്രമല്ല, സൈബർപാർക്ക്, ഊരാളുങ്കൽ ടെക്നോളജി സൊല്യൂഷൻസ്, ഇരിങ്ങൽ സർഗാലയ ആർട്ട് ആന്റ് ക്രാഫ്റ്റ് വില്ലേജ്, നീതി ലാബുകൾ തുടങ്ങി വൈവിധ്യമാർന്ന ഒട്ടനവധി സംരംഭങ്ങളിലേക്ക് യു.എൽ.സി.സി.എസിനെ വളർത്തിയത് അദ്ദേഹത്തിന്റെ ദീർഘവീക്ഷണമാണ്.

അവാസ്തവവും നീതിരഹിതവുമായ ആരോപണങ്ങളും കടുത്ത സാമ്പത്തിക സമ്മർദ്ദങ്ങളും ഒരേപോലെ നേരിടേണ്ടി വന്ന ഘട്ടങ്ങളിലെല്ലാം, സംഘടനയെ സ്നേഹിക്കുന്നവരുടെ ആത്മവിശ്വാസം ചോർന്നുപോകാതെ കാത്തുസൂക്ഷിക്കാൻ അദ്ദേഹത്തിന് കഴിഞ്ഞു. യുവ പ്രൊഫഷണലുകൾക്ക് ദിശബോധവും കരുത്തും പകർന്നുനൽകിക്കൊണ്ട്, ഏത് പ്രതിസന്ധിഘട്ടത്തിലും തൊഴിലാളികൾക്ക് ഒപ്പം പാറപോലെ ഉറച്ചുനിന്ന നേതാവായിരുന്നു അദ്ദേഹം.

തീരാത്ത വേർപാടും മായാത്ത സ്മരണകളും

കോയമ്പത്തൂരിലെ സ്വകാര്യ ആശുപത്രിയിൽ ചികിത്സയിലിരിക്കെ ഈ ലോകത്തോട് വിടപറയുമ്പോൾ, അദ്ദേഹം ബാക്കിവെച്ചുപോയത് രാജ്യത്തിന് മാതൃകയായ ഒരു വലിയ സഹകരണ സാമ്രാജ്യവും ലക്ഷക്കണക്കിന് തൊഴിലാളികളുടെ കണ്ണീരുമാണ്. വടകരയുടെ മണ്ണിൽ നിന്ന് തുടങ്ങി ലോകോത്തര നിലവാരത്തിലേക്ക് വളർന്ന ഊരാളുങ്കൽ സൊസൈറ്റിയുടെ ഓരോ ഇഷ്ടികയിലും രമേശൻ പാലേരിയുടെ ചോരയും വിയർപ്പുമുണ്ട്.

അദ്ദേഹം വെട്ടിതുറന്ന പാതയിലൂടെ, അദ്ദേഹം ഉയർത്തിപ്പിടിച്ച ഉദാത്തമായ ആശയങ്ങളുടെ വെളിച്ചത്തിൽ, ഈ മഹാപ്രസ്ഥാനത്തിന് ഇനിയും മുന്നോട്ട് പോകാൻ സാധിക്കട്ടെ. കർമ്മഗോപുരത്തിൽ മായാത്ത സ്മരണകളോടെ വിടവാങ്ങുന്ന ആ മഹാസഹകാരിക്ക് മീഡിയഫേസ് കേരളയുടെ പ്രണാമം.

:ദിവാകരൻ ചോമ്പാല