തോളിലൊരു കുഞ്ഞിക്കൈ, കയ്യിലൊരു സ്വപ്നം! പഠനം ഉപേക്ഷിച്ചവർക്ക് 'മടക്കയാത്ര

നാദാപുരം: കാൽനൂറ്റാണ്ട് മുൻപ് കോഴിക്കോട് സർവകലാശാല എടുത്ത ചരിത്രപരമായ ഒരു തീരുമാനം, വർഷങ്ങൾക്കിപ്പുറം ഒരു അമ്മയുടെയും കുഞ്ഞിന്റെയും പുഞ്ചിരിയായി ചെക്കിയാട് പുലിയാവ് നാഷണൽ ആർട്സ് ആൻഡ് സയൻസ് കോളേജിന്റെ വേദിയിൽ പുനർജനിച്ചു.പഠനം ഉപേക്ഷിച്ചവർക്ക് 'മടക്കയാത്ര'യൊരുക്കിയ കുറുപ്പ് സാറിന് മുന്നിൽ ബിരുദവുമായി അമ്മ; പുലിയാവ് കോളേജിൽ ഹൃദയസ്പർശിയായ നിമിഷം

വിവാഹം, പ്രസവം തുടങ്ങിയ കാരണങ്ങളാൽ പഠനം പൂർത്തിയാക്കാൻ കഴിയാതെ പോയ പെൺകുട്ടികൾക്ക് വീണ്ടും വന്ന് കോഴ്സ് പൂർത്തിയാക്കാൻ അവസരമൊരുക്കിയത് ഡോ. കെ.കെ.എൻ. കുറുപ്പ് കോഴിക്കോട് സർവകലാശാലാ വൈസ് ചാൻസലറായിരുന്ന കാലത്തായിരുന്നു. വർഷങ്ങൾക്കിപ്പുറം നാഷണൽ ആർട്സ് ആൻഡ് സയൻസ് കോളേജിൽ (ചെക്കിയാട്) നടന്ന എം.കോം. ബിരുദദാന ചടങ്ങിൽ മുഖ്യാതിഥിയായി അദ്ദേഹം എത്തിയപ്പോൾ, കണ്ടത് തന്റെ ആ വിപ്ലവാത്മക തീരുമാനത്തി ന്റെ മനോഹരമായ ഫലപ്രാപ്തിയാണ്.

തോളിൽ കൈക്കുഞ്ഞുമായി ബിരുദം സ്വീകരിക്കാൻ വേദിയിലേക്ക് എത്തിയ മുൻവിറ പി.കെ. എന്ന അമ്മയെ ഡോ. കെ.കെ.എൻ. കുറുപ്പ് ആദരവോടെയും വാത്സല്യത്തോടെയുമാണ് സ്വീകരിച്ചത്. ബിരുദദാനത്തോടൊപ്പം, തോളിൽ ചേർത്തുവെച്ച ആ കുഞ്ഞുമകളെ ഓമനിക്കാനും അദ്ദേഹം മറന്നില്ല. ലൈലനെഫൂഫ് എന്നാണ് ആ കുരുന്നിന്റെ പേര്.

കുടുംബജീവിതത്തിനും മാതൃത്വത്തിനുമിടയിലും തങ്ങളുടെ പഠനസ്വപ്നങ്ങൾ ഉപേക്ഷിക്കേണ്ടതില്ലെന്നും, അതിന് പ്രായമോ സാഹചര്യങ്ങളോ തടസ്സമല്ലെന്നും തെളിയിക്കുന്നതായിരുന്നു ബിരുദദാന വേദിയിലെ ഈ കാഴ്ച. താൻ പടുത്തുയർത്തിയ നയം ഒരുതലമുറയുടെ ജീവിതത്തെ എങ്ങനെ പ്രകാശപൂർണ്ണമാക്കുന്നു എന്നതിന്റെ നേരനുഭവമായി ഈ നിമിഷം മാറി