നമ്മുടെ വീടുകളുടെ ചുവരുകൾ സർക്കാർ കുറിപ്പുപുസ്തകങ്ങളല്ല.

വീടിന്റെ ചുമർ ,ജനൽ പാളികൾ സർക്കാർ രജിസ്റ്ററല്ല

വീടിന്റെ ചുമർ ഒരു രേഖാപുസ്തകമല്ല. ഓരോ കുടുംബത്തിന്റെയും ഓർമ്മകളും സ്വപ്നങ്ങളും പതിഞ്ഞ ഇടമാണ് അത്.

സ്വന്തം വീട്ടിൽ അനുമതിയില്ലാതെ ആരെങ്കിലും ഒരു വരയെങ്കിലും വരച്ചാൽ ആർക്കെങ്കിലും അത് ഇഷ്ടപ്പെടുമോ?

അങ്ങനെയിരിക്കെ, പൊതുസേവനത്തിന്റെ പേരിൽ ചുവരുകളിൽ കുത്തിവരയ്ക്കുന്നത് എങ്ങനെ അംഗീകരിക്കാനാകും?

പണ്ടുകാലത്ത് കള്ളുഷാപ്പുകളുടെയും ചായ കടകളുടെയും നിരപ്പലക കളിൽ കണക്കുകൾ കുറിച്ചിരുന്ന ശൈലിയെ ഓർമിപ്പിക്കുന്നതാണ് ഇന്ന് പല വീടുകളുടെയും പൂമുഖങ്ങൾ.

സ്മാർട്ട് സിറ്റി, ഡിജിറ്റൽ ഇന്ത്യ, ഇ-ഗവേണൻസ് എന്നൊക്കെ അഭിമാനത്തോ ടെ പറയുന്ന നമുക്ക് ഈ കാഴ്ച ഒട്ടും യോജിക്കുന്നതല്ല.

സാങ്കേതിക പുരോഗതി ചുമരുകളിൽ എഴുതപ്പെടുന്നതല്ല; സംസ്കാരത്തിൽ പ്രതിഫലിക്കേണ്ടതാണ്.

പൊതുജനങ്ങൾക്ക് സേവനം നൽകുന്ന സ്ഥാപനങ്ങൾ ആദ്യം മനസ്സിലാക്കേ ണ്ടത് ഒരു കാര്യമാണ്.

സർക്കാർ സേവനം ജനങ്ങളുടെ അവകാശമാണ്; ജനങ്ങളുടെ സ്വത്തിനെ അനുമതിയില്ലാതെ ഉപയോഗിക്കാനുള്ള അധികാരമല്ല തീർച്ച .

ഒരു സർക്കാർ ജീവനക്കാരൻ ചെയ്യുന്ന ചെറിയൊരു അടയാളപ്പെടുത്തൽ പോലും വീട്ടുടമയുടെ മനസ്സിൽ അസ്വസ്ഥത സൃഷ്ടിക്കാം. അതിനാൽ നടപടിക്രമങ്ങൾ മനുഷ്യകേന്ദ്രിതവും സംസ്കാരസമ്പന്നവുമാകണം.

 ഒരു വരി എഴുതാൻ ഒരു നിമിഷം മതി; അത് മായ്ക്കാൻ പലപ്പോഴും മാസങ്ങൾ വേണ്ടിവരും

പരിഹാരം വളരെ ലളിതം

ഈ പ്രശ്നം അവസാനിപ്പിക്കാൻ സർക്കാരിനോ തദ്ദേശ സ്വയംഭരണ സ്ഥാപനങ്ങൾക്കോ വലിയ ചെലവൊന്നും വേണ്ട.

ഓരോ പഞ്ചായത്തും മുനിസിപ്പാലിറ്റിയും ഒരേ മാതൃകയിലുള്ള 'ഹൗസ് ഇൻഫർമേഷൻ പ്ലാക്ക്' നിർബന്ധമാക്കാം.

അതിൽ—

വാർഡ് നമ്പർ

വീട്ടുനമ്പർ

കെട്ടിട നമ്പർ

ആവശ്യമായ പരിശോധനാ സ്റ്റിക്കറുകൾ പതിപ്പിക്കാനുള്ള പ്രത്യേക സ്ഥലം

എന്നിവ ഉൾപ്പെടുത്താം.

വരുന്ന എല്ലാ വകുപ്പുകൾക്കും അതിൽ മാത്രമേ രേഖപ്പെടുത്താവൂ എന്ന നിർദേശം നൽകിയാൽ വീടുകളുടെ ചുവരുകൾ എന്നും വൃത്തിയായി നിലനിൽക്കും.

ഡിജിറ്റൽ കേരളത്തിന് ഡിജിറ്റൽ പരിഹാരവും വേണം

ഒരു ക്യൂ.ആർ. കോഡ് ഉൾപ്പെടുത്തിയ ഫലകം സ്ഥാപിച്ചാൽ ഉദ്യോഗസ്ഥർ മൊബൈൽ ഉപയോഗിച്ച് വിവരങ്ങൾ ശേഖരിക്കാനും പരിശോധനാ രേഖകൾ അപ്ഡേറ്റ് ചെയ്യാനും കഴിയും.

അങ്ങനെ ചുവരിൽ ഒരു വര പോലും എഴുതാതെ എല്ലാ നടപടിക്രമങ്ങളും പൂർത്തിയാക്കാൻ സാധിക്കും.

ഡിജിറ്റൽ യുഗത്തിൽ ചുവരുകൾ സംസാരിക്കേണ്ട; വിവരസാങ്കേതിക വിദ്യ സംസാരിക്കട്ടെ.

മാറേണ്ടത് ലക്ഷ്യമല്ല; രീതിയാണ്

സർക്കാർ പരിശോധനകളും സർവേകളും നിർബന്ധമായും നടക്കണം. എന്നാൽ അവ നടപ്പാക്കുന്ന രീതി കാലത്തിനനുസരിച്ച് മാറണം.

ജനങ്ങളുടെ സ്വത്തിനോടുള്ള ആദരവും അവരുടെ സ്വകാര്യതയോടുള്ള ബഹുമാനവും പൊതുഭരണത്തിന്റെ അടിസ്ഥാന മൂല്യങ്ങളാകണം.

ചുവരുകളിലെ കുത്തിവരകൾ അവസാനിപ്പിക്കുന്നത് ഒരു ചെറിയ ഭരണപരിഷ്കാരമല്ല; അത് ഒരു വലിയ സാംസ്കാരിക മാറ്റത്തിന്റെ തുടക്കമാണ്.

ഭിത്തികളെ മുറിവേൽപ്പിക്കുന്ന കാലഹരണപ്പെട്ട രീതികൾ അവസാനിപ്പിക്കാൻ സർക്കാർ സംവിധാനങ്ങളും തദ്ദേശ സ്വയംഭരണ സ്ഥാപനങ്ങളും ഇനിയെങ്കിലും മുന്നോട്ടുവരണം.

വിനയപൂർവ്വം -ദിവാകരൻ ചോമ്പാല