മനുഷ്യത്വത്തിന്റെ കുരുക്ഷേത്രം ; ലഹരിക്കും അക്രമത്തിനുമെതിരായ നന്മയുടെ പോരാട്ടം. :ദിവാകരൻ ചോമ്പാല

"മനുഷ്യൻ മൃഗങ്ങളിൽ നിന്ന് പരിണമിച്ചുണ്ടായതാണ്" എന്ന് ശാസ്ത്രം നമ്മെ പഠിപ്പിക്കുന്നു. എന്നാൽ ഇന്നത്തെ പത്രവാർത്തകളും സമൂഹമാധ്യമങ്ങളിലൂടെ ഒഴുകിയെത്തുന്ന അക്രമദൃശ്യങ്ങളും കാണുമ്പോൾ ഉള്ളിലൊരു നടുക്കമുയരും—പരിണാമത്തിന്റെ പടവുകൾ കയറി മുകളിലെത്തിയ മനുഷ്യൻ, മനുഷ്യത്വത്തിന്റെ പടവുകളിൽ നിന്ന് വീണ്ടും താഴേക്ക് പതിക്കുകയാണോ?

ആധുനിക വസ്ത്രധാരണം, സാങ്കേതികവിദ്യയുടെ അത്ഭുതങ്ങൾ, കൃത്രിമബുദ്ധിയുടെ (AI) വിപ്ലവം—ഇതെല്ലാം നമ്മുടെ ബാഹ്യജീവിതത്തെ തിളക്കമുള്ളതാക്കി മാറ്റി. പക്ഷേ, അതേ വേഗത്തിൽ അവന്റെ ഉള്ളിലെ സംസ്കാരവും കരുണയും ധാർമികബോധവും വളർന്നോ? ഈ ചോദ്യമാണ് ഇരുപത്തിയൊന്നാം നൂറ്റാണ്ട് നേരിടുന്ന ഏറ്റവും വലിയ പ്രതിസന്ധി.

വേട്ടയാടുന്ന വാർത്തകൾ, തകരുന്ന മാനസികാരോഗ്യം

പ്രതിദിനം നാം കേൾക്കുന്നത് കൊലപാതകങ്ങളുടെയും പീഢനങ്ങളുടെയും ക്രൂരതകളുടെയും പിടിച്ചുപറിയുടെയുമെല്ലാം വാർത്തകളാണ്.

സ്വന്തം ചോരയിൽ പിറന്ന കുഞ്ഞുങ്ങളെപ്പോലും ദയയില്ലാതെ കൊല്ലുന്ന മാതാപിതാക്കൾ.

ജന്മം നൽകിയവർക്കെതിരെ ആയുധമുയർത്തുന്ന മക്കൾ.

ചെറിയ തർക്കങ്ങളുടെ പേരിൽ തെരുവിൽ ചോരപ്പുഴയൊഴുക്കുന്ന യുവാക്കൾ.

ഇതെല്ലാം കേവലം ക്രിമിനൽ വാർത്തകളല്ല; മറിച്ച്, നമ്മുടെ സമൂഹത്തിന്റെ മാനസികാരോഗ്യം തകർന്നടിയുന്നു എന്നതിന്റെ അപകടസൂചനകളാണ്.

ആദിമ മനുഷ്യൻ കാട്ടിൽ ജീവിച്ചിരുന്നു. മരവുരിയുടുത്ത് വേട്ടയാടിയിരുന്നു. പക്ഷേ അവൻ ജീവനെടുത്തത് വിശപ്പടക്കാൻ വേണ്ടി മാത്രമായിരുന്നു. ഇന്നത്തെ മനുഷ്യൻ കൊല്ലുന്നത് അഹങ്കാരത്തിനും, പ്രതികാരത്തിനും, ലഹരി മൂത്ത ഭ്രാന്തിനും, നിമിഷനേരത്തെ വികാരവിസ്ഫോടനങ്ങൾക്കുമാണ്. പുറമേ ആധുനികതയുടെ മേലങ്കി ധരിച്ചിട്ടും, ഉള്ളിൽ പ്രാകൃതതയുടെ കരിനിഴൽ വളരുന്നത് അതുകൊണ്ടാണ്.

ക്യാമറക്കണ്ണുകളിലെ വികാരശൂന്യത

പണ്ട് ഒരു അപകടമോ അക്രമമോ നേരിൽ കാണുമ്പോൾ മനുഷ്യരിൽ ഭയവും വലിഞ്ഞുപൊട്ടുന്ന കരുണയും ഉണ്ടായിരുന്നു. ഇന്ന് പലരും ആദ്യം കൈയിലെടുക്കുന്നത് സഹായഹസ്തമല്ല, മൊബൈൽ ഫോണാണ്! ചോരയൊലിച്ചു കിടക്കുന്ന മനുഷ്യനെ ആശുപത്രിയിലെത്തി ക്കുന്നതിനേക്കാൾ, ആ ദൃശ്യം പകർത്തി സോഷ്യൽ മീഡിയയിൽ ലൈക്കുകളും ഷെയറുകളും വാങ്ങാൻ മത്സരിക്കുന്ന മനോഭാവം സാംസ്കാരികമായ അന്ധതയാണ്. നമ്മുടെ സഹാനുഭൂതി വറ്റിവരണ്ടുപോയതിന്റെ ലക്ഷണമാണിത്.

സമൂഹമാധ്യമങ്ങൾ ശാപമല്ല;

അറിവും സൃഷ്ടിപരതയും പങ്കുവെക്കാനുള്ള വലിയ വേദിയാണ്. എന്നാൽ അക്രമവും അശ്ലീലതയും വിദ്വേഷവും നഗ്നതയും അശ്ലീലച്ചുവയുള്ള സംഭാഷണങ്ങളും ദുർമ്മേദസ്സും നഗ്നതയും വിപണനം ചെയ്യപ്പെടുമ്പോൾ, കാഴ്ചക്കാരുടെ ശ്രദ്ധ പിടിച്ചുപറ്റാൻ പത്തു ലൈക്ക് കിട്ടാൻ എന്തും ചെയ്യാമെന്ന മനോഭാവം കൗമാരക്കാരെ മാത്രമല്ല അമ്മൂമ്മമാരിലും അപ്പൂപ്പന്മാരിലും വരെ കാറ്റ് കൊടുങ്കാറ്റായി എന്ന നിലയിലേയ്ക്ക് പടരുന്നു . ഇവിടെയാണ് നിയമ സംവിധാനങ്ങളും സമൂഹവും കൺതുറക്കേണ്ടത്.

അടിയുംപിടിയും വെട്ടും കുത്തും തുടങ്ങി എല്ലാമൃഗീയതകളും അഭിനയിപ്പിച്ച് ക്യാമറക്കണ്ണുകളിലാക്കി സോഷ്യൽ മീഡിയകളിൽ പോസ്റ്റ് ചെയ്യുന്നവർ അക്രമം പ്രചരിപ്പിക്കുന്നവരാണ് .ഇവർക്കാണ് ചികിത്സയും വിലങ്ങും നൽകേണ്ടത് .

ലഹരിയുടെ കരാളഹസ്തങ്ങളും പ്രതിരോധവും

ഇന്ന് കേരളം നേരിടുന്ന ഏറ്റവും വലിയ ശാപം ലഹരിയുടെ വ്യാപനമാണ്. ഇതിനെ കേവലം നിയമം കൊണ്ട് മാത്രം തുടച്ചുനീക്കാനാകില്ല.

 ലഹരിവസ്തുക്കളുടെ ദുരുപയോഗം, സഹാനുഭൂതിയുടെ കുറവ്, സാമൂഹിക ഒറ്റപ്പെടൽ, കുട്ടിക്കാലത്തെ കയ്പേറിയ അനുഭവങ്ങൾ, മൂല്യബോധത്തിന്റെ തകർച്ച. ഇവയൊന്നും അക്രമങ്ങൾക്കുള്ള ന്യായീകരണമല്ല, മറിച്ച് നാം ചികിത്സിച്ച് മാറ്റേണ്ട രോഗലക്ഷണങ്ങളാനിന്നു വിദഗ്‌ദ്ധർ സമ്മതിക്കുന്നു 

 കുടുംബം, വിദ്യാലയം, മാധ്യമങ്ങൾ, സാംസ്കാരിക-സാമൂഹിക പ്രസ്ഥാനങ്ങൾ എന്നിവ കൈകോർത്തുകൊണ്ടുള്ള ബോധവൽക്കരണമാണ് ആവശ്യം.

വസ്ത്രധാരണത്തിലും ജീവിതസൗകര്യങ്ങളിലും മാത്രം പോരാ; കരുണയിലും സഹിഷ്ണുതയിലും ഉത്തരവാദിത്തബോധത്തിലും കൂടി നാം ആധുനികരാകേണ്ടതുണ്ട്. ഇല്ലെങ്കിൽ ഈ പുരോഗതി വെറും അർത്ഥശൂന്യമാണ്.

മാറ്റം നമ്മിൽ നിന്ന് ആരംഭിക്കട്ടെ!

ഈ രോഗാതുരമായ സാമൂഹിക സാഹചര്യത്തിൽ ഭയം തോന്നുന്നത് സ്വാഭാവികമാണ്. എന്നാൽ ഭയപ്പെടുകയല്ല, ഉണർന്നു പ്രവർത്തിക്കുകയാണ് വേണ്ടത്.

അക്രമദൃശ്യങ്ങൾക്കും ലഹരി സംസ്കാരത്തിനും പ്രചാരണം നൽകാതിരിക്കുക. തെരുവിൽ തല്ലുകൂടുന്നതും ''പോടാ പുല്ലേ ....... ''  എന്നലറുന്നത് കണ്ടുകൊണ്ടാണ് ഇളം തലമുറ വളരുന്നത് .''പായുന്നതിൻറെ കുഞ്ഞു പറക്കും '' എന്ന പഴമൊഴി വെറുതെയാകില്ല തീർച്ച .

കുട്ടികൾക്ക് സ്നേഹത്തിന്റെയും സഹാനുഭൂതിയുടെയും ആദ്യപാഠങ്ങൾ വീട്ടിൽ നിന്ന് നൽകുക.

ലഹരിക്കെതിരെ വിട്ടുവീഴ്ചയില്ലാത്ത പ്രതിരോധം തീർക്കുക.

മാനസികാരോഗ്യത്തെക്കുറിച്ചുള്ള തുറന്ന സംവാദങ്ങൾ പ്രോത്സാഹിപ്പിക്കുക.

സമൂഹത്തെ മാറ്റുന്ന വിപ്ലവങ്ങൾ പലപ്പോഴും ജന്മമെടുക്കുന്നത് നിയമ പുസ്തകങ്ങളിലല്ല, മനുഷ്യന്റെ മനസ്സുകളിലാണ്. അതുകൊണ്ട് ആ മാറ്റം മറ്റൊരാളിൽ നിന്നല്ല, നമ്മിൽ നിന്നുതന്നെ ആരംഭിക്കട്ടെ. മനുഷ്യൻ വീണ്ടും 'മനുഷ്യനാകുന്ന' ഒരു നല്ല നാളേയ്ക്കായി നമുക്ക് കൈകോർക്കാം.

ലഹരിമുക്ത കേരളത്തിനായി, ഒന്നിച്ച് മുന്നോട്ട്... ഓപ്പറേഷൻ തൂഫാൻ കേരളത്തിന്റെ നവോത്ഥാനമാണ് .അതാര് നയിച്ചാലും അദ്ദേഹം നവോത്ഥാന നായകനാണെന്ന് ചരിത്രം സാക്ഷ്യപ്പെടുത്താ തിരി ക്കില്ല .നന്മയുടെ നേർക്ക് മുഖംതിരിക്കാൻ മനുഷ്യനാവുമോ ?

: ദിവാകരൻ ചോമ്പാല