ലഹരിക്കെതിരായ പോരാട്ടം ക്ലാസ് മുറിയിൽ നിന്ന് തുടങ്ങണം" റിട്ട. പ്രൊഫസർ ഡോ. മാലിനികുറുപ്പ്

കോഴിക്കോട് ആർട്സ് ആൻഡ് സയൻസ് കോളേജിൽ (മീഞ്ചന്ത) സ്റ്റാറ്റിസ്റ്റിക്സ് പ്രൊഫസറായി സേവനമനുഷ്ഠിച്ചിരുന്ന കാലഘട്ടത്തിൽ, ലഹരിയുടെ പിടിയിലകപ്പെട്ട ചില വിദ്യാർത്ഥികളുമായി വളരെ അടുത്ത് ഇടപഴകാൻ എനിക്ക് അവസരം ലഭിച്ചിട്ടുണ്ട്. അധ്യാപിക എന്ന നിലയിൽ ഞാൻ അവരെ കുറ്റവാളികളായി കണ്ടില്ല; മറിച്ച് വഴിതെറ്റിപ്പോയ സ്വന്തം മക്കളെപ്പോലെ യാണ് കണ്ടത്. ശാസനയേക്കാൾ സ്നേഹത്തിനും, ശിക്ഷയേക്കാൾ കരുതലിനും, അകറ്റിനിർത്തുന്നതിനേക്കാൾ ചേർത്തുപിടിക്കുന്നതിനു മാണ് ഞാൻ പ്രാധാന്യം നൽകിയത്.

നിരന്തരമായ സംഭാഷണങ്ങളിലൂടെയും ആത്മവിശ്വാസം പകർന്നു കൊടുത്തും അവർക്ക് സ്വന്തം ജീവിതത്തിന്റെ മൂല്യം തിരിച്ചറിയാൻ സഹായിക്കാനാണ് ഞാൻ ശ്രമിച്ചത്. ലഹരിയിൽ നിന്ന് മോചിതരാകാൻ ആദ്യം വേണ്ടത് മനസ്സിന്റെ കരുത്തും ജീവിതത്തോടുള്ള പ്രത്യാശയുമാ ണെന്ന് ഞാൻ വിശ്വസിക്കുന്നു. ആ വിശ്വാസം ചിലരുടെ ജീവിതത്തിൽ ഫലവത്താകുന്നത് നേരിൽ കാണാൻ കഴിഞ്ഞത് എന്റെ അധ്യാപക ജീവിതത്തിലെ ഏറ്റവും വലിയ സന്തോഷങ്ങളിലൊന്നാണ്.

ഇന്ന് അവർ കുടുംബസമേതം സന്തോഷത്തോടെയും ആത്മാഭിമാ നത്തോടെയും ജീവിക്കുന്നത് കാണുമ്പോൾ ഒരു അധ്യാപിക എന്ന നിലയിൽ ഞാൻ അനുഭവിക്കുന്ന അഭിമാനം വാക്കുകൾക്കതീതമാണ്. ഒരു വിദ്യാർത്ഥിയുടെ വിജയം പരീക്ഷയിലെ മാർക്കുകളിൽ മാത്രമല്ല, ജീവിതത്തെ ശരിയായ ദിശയിൽ നയിക്കാൻ കഴിയുന്നതിലുമാണ് എന്ന തിരിച്ചറിവ് അവർ വീണ്ടും വീണ്ടും എനിക്ക് സമ്മാനിക്കുന്നു.

അതേസമയം, അന്നത്തെ ചില വിദ്യാർത്ഥികൾ ഇന്നും ലഹരിയുടെ ചങ്ങലകളിൽ നിന്ന് പൂർണമായി മോചിതരായിട്ടില്ലെന്ന യാഥാർഥ്യം എന്റെ മനസ്സിനെ വേദനിപ്പിക്കുന്നു. അവരെ ഞാൻ ഒരിക്കലും പ്രത്യാശയില്ലാത്തവരായി കാണുന്നില്ല. ഒരുനാൾ അവർ ജീവിതത്തിന്റെ യഥാർഥ മൂല്യം തിരിച്ചറിഞ്ഞ് ലഹരിയെ എന്നെന്നേക്കുമായി ഉപേക്ഷിക്കട്ടെയെന്ന പ്രാർത്ഥന മാത്രമാണ് ഇന്നും എന്റെ മനസ്സിലുള്ളത്.

ലഹരി ഒരു വ്യക്തിയെ മാത്രമല്ല, ഒരു കുടുംബത്തെയും ഒരു സമൂഹത്തെയും നിശ്ശബ്ദമായി തകർക്കുന്ന മഹാവിപത്താണ്. അതുകൊണ്ടുതന്നെ വിദ്യാർത്ഥികൾ ലഹരിയിലേക്ക് എത്തിപ്പെടുന്നതിന് മുമ്പേ അവരെ ജീവിതമൂല്യങ്ങളിലേക്ക് കൈപിടിച്ചുയർത്തേണ്ടത് മാതാപിതാക്കളുടെയും അധ്യാപകരുടെയും സമൂഹത്തിന്റെയും സംയുക്ത ഉത്തരവാദിത്തമാണ്. കുട്ടികളെ കേൾക്കാനും അവരുടെ മാനസിക സംഘർഷങ്ങൾ മനസ്സിലാക്കാനും അവർക്ക് വിശ്വാസത്തോടെ സംസാരിക്കാൻ കഴിയുന്ന അന്തരീക്ഷം സൃഷ്ടിക്കാനുമാണ് നാം മുൻഗണന നൽകേണ്ടത്.

വിദ്യാർത്ഥികളോടായി എനിക്ക് പറയാനുള്ളത് ഒന്നു മാത്രം. നിങ്ങളുടെ സ്വപ്നങ്ങൾക്കും മാതാപിതാക്കളുടെ പ്രതീക്ഷകൾക്കും നിങ്ങളുടെ ജീവിതത്തിനും ഒരു ലഹരിവസ്തുവിനേക്കാൾ അനന്തമായ വിലയുണ്ട്. നിമിഷനേരത്തെ കൗതുകത്തിനോ കൂട്ടുകാരുടെ പ്രേരണയ്ക്കോ വേണ്ടി നിങ്ങളുടെ ഭാവി ഒരിക്കലും പണയപ്പെടുത്തരുത്. യഥാർഥ ധൈര്യം ലഹരി പരീക്ഷിക്കുന്നതിലല്ല; അതിനെ ഉറച്ച മനസ്സോടെ നിരസിക്കുന്നതിലാണ്.

ലഹരിക്കെതിരായ പോരാട്ടം നിയമപാലകരുടെയോ സർക്കാരിന്റെയോ മാത്രം ദൗത്യമല്ല. അത് ഓരോ കുടുംബത്തിന്റെയും ഓരോ അധ്യാപക ന്റെയും ഓരോ വിദ്യാർത്ഥിയുടെയും സാമൂഹിക പ്രതിബദ്ധതയാണ്.

ഈ ബോധ്യത്തോടെയാണ് ലഹരിവിരുദ്ധ ജനകീയ മുന്നേറ്റമായ ഓപ്പറേഷൻ തൂഫാൻ കർമ്മപദ്ധതിക്ക് എന്റെ ഹൃദയം നിറഞ്ഞ ഐക്യദാർഢ്യം അറിയിക്കുന്നത്. നമ്മുടെ മക്കളുടെ ഭാവിയും കേരളത്തിന്റെ നാളെയും സംരക്ഷിക്കാൻ ഈ മഹത്തായ ദൗത്യത്തിൽ എല്ലാവരും കൈകോർ ക്കണമെന്ന് ഞാൻ അഭ്യർഥിക്കുന്നു.