ഓപ്പറേഷൻ തൂഫാൻ വിജയിക്കട്ടെ; നമ്മുടെ മക്കളുടെ ഭാവി സുരക്ഷിതമാകട്ടെ. :നാട്യഗുരു ഡോ. മീനാകുറുപ്പ് Indian Cultural & Heritage Centre,,Kochi

ഓപ്പറേഷൻ തൂഫാൻ വിജയിക്കട്ടെ;

നമ്മുടെ മക്കളുടെ ഭാവി സുരക്ഷിതമാകട്ടെ.

രാസലഹരിയുടെ മാരകവലയിൽ അറിഞ്ഞും അറിയാതെയും നമ്മുടെ മക്കൾ അകപ്പെട്ടുകൊണ്ടിരിക്കുന്ന ഈ കാലഘട്ടം കേരളം അഭിമുഖീകരിക്കുന്ന ഏറ്റവും വലിയ സാമൂഹിക ദുരന്തങ്ങളിലൊന്നാണ്. ഒരു കുടുംബത്തെയല്ല, ഒരു തലമുറയുടെ സ്വപ്നങ്ങളെയാണ് ഈ വിഷവിപത്ത് കവർന്നെടുക്കുന്നത്.

ത്രേതായുഗത്തിൽ ശ്രീരാമന്റെ പാദസ്പർശത്താൽ ശാപമോചനം ലഭിച്ച അഹല്യയെപ്പോലെ, ലഹരിയുടെ ശാപത്തിൽ നിന്ന് കേരളത്തിനും മോചനം നേടാനാകുമെന്ന പ്രത്യാശയാണ് ഓപ്പറേഷൻ തൂഫാൻ ഉയർത്തുന്നത്. ഇത് ഒരു പദ്ധതിമാത്രമല്ല; നമ്മുടെ മക്കളുടെ ജീവനും ഭാവിയും സംരക്ഷിക്കാനുള്ള ജനകീയ പ്രതിജ്ഞയാണ്.

ഈ മഹത്തായ ദൗത്യത്തിൽ കക്ഷിരാഷ്ട്രീയവും മതവും ജാതിയും അതിജീവിച്ച് ഓരോ അമ്മയും അച്ഛനും അധ്യാപകരും കലാകാരന്മാരും യുവജനങ്ങളും സാമൂഹിക പ്രവർത്തകരും കൈകോർക്കണം. ലഹരിമുക്ത കേരളം സൃഷ്ടിക്കാനുള്ള ഈ ജനകീയ മുന്നേറ്റം വിജയിപ്പിക്കേണ്ടത് നമ്മുടെയെല്ലാം ഉത്തരവാദിത്തമാണ്.

ഓരോ അമ്മയുടെ കരുതലും, ഓരോ കുടുംബത്തിന്റെയും ജാഗ്രതയും, ഓരോ പൗരന്റെയും പങ്കാളിത്തവുമാണ് ഓപ്പറേഷൻ തൂഫാന്റെ ഏറ്റവും വലിയ ശക്തി.

നമ്മുടെ മക്കൾക്കായി... നമ്മുടെ നാളേക്കായി... ലഹരിയില്ലാത്ത ദൈവത്തിന്റെ സ്വന്തം നാട് സൃഷ്ടിക്കാൻ എല്ലാവരും ഒന്നിക്കാം.

— നാട്യഗുരു ഡോ. മീനാകുറുപ്പ്

Indian Cultural & Heritage Centre. Kochi

https://ichc.in/