വടകരയുടെ കരുത്തുറ്റ ശബ്ദം നിലച്ചു: ശ്രീനാരായണീയൻ പി.എം. രവീന്ദ്രന് വിട : ദിവാകരൻ ചോമ്പാല.

ശ്രീനാരായണീയൻ പി.എം. രവീന്ദ്രന് വിട

വടകര: വടകരയുടെ സാമൂഹിക, വിദ്യാഭ്യാസ, സാംസ്കാരിക, സംഘടനാ രംഗങ്ങളിലെ നിറസാന്നിധ്യവും എസ്.എൻ.ഡി.പി യോഗത്തിന്റെ ജനകീയ നേതാവുമായിരുന്ന പി.എം. രവീന്ദ്രൻ ഇനി ഓർമ്മ. ഒരു സംഘടനാ നേതാവ് എന്നതിനപ്പുറം, വടകരയുടെ എല്ലാ പ്രധാന പൊതുപരിപാടികളുടെയും സംഘാടനരംഗത്ത് വിശ്വസ്ത സാന്നിധ്യമായിരുന്നു അദ്ദേഹം. അദ്ദേഹത്തിന്റെ നിര്യാണം വടകരയ്ക്കും മലബാറിലെ ശ്രീനാരായണ പ്രസ്ഥാനത്തിനും തീരാനഷ്ടമായിരിക്കുകയാണ്.

പി.എം. നാണുവിന്റെ പാത പിന്തുടർന്ന നേതാവ്

എസ്.എൻ.ഡി.പി യോഗം വടകര യൂണിയന്റെ നേതാവായിരുന്ന ജ്യേഷ്ഠസഹോദരൻ പി.എം. നാണുവിന്റെ പാത പിന്തുടർന്നാണ് പി.എം. രവീന്ദ്രൻ പൊതുപ്രവർത്തനരംഗത്തേക്ക് കടന്നുവന്നത്. നാണുവിന്റെ നിര്യാണശേഷം വടകര യൂണിയന്റെ നേതൃത്വം ഏറ്റെടുത്ത അദ്ദേഹം സംഘടനയെ കൂടുതൽ ശക്തിപ്പെടുത്തുകയും ശാഖാപ്രവർത്തനങ്ങൾ വ്യാപിപ്പിക്കുകയും ചെയ്തു.

താഴെത്തട്ടിൽ നിന്ന് സംഘടനയെ കെട്ടിപ്പടുക്കുക എന്നതായിരുന്നു അദ്ദേഹത്തിന്റെ പ്രവർത്തനശൈലി. യൂണിയനിലെ സാധാരണ അംഗം മുതൽ മുതിർന്ന പ്രവർത്തകൻ വരെ എല്ലാവരുമായും വ്യക്തിബന്ധം പുലർത്തിയ അദ്ദേഹം, ഓരോരുത്തരെയും പേരെടുത്ത് വിളിക്കുന്ന ആത്മബന്ധം കൊണ്ടാണ് ജനഹൃദയങ്ങളിൽ ഇടം നേടിയത്.

വിദ്യാഭ്യാസരംഗത്തെ ദീർഘവീക്ഷണം

പി.എം. രവീന്ദ്രൻ്റെ ഏറ്റവും വലിയ സംഭാവനകളിലൊന്നാണ് വിദ്യാഭ്യാസരംഗത്തെ ഇടപെടൽ.

എസ്.എൻ. ട്രസ്റ്റിന്റെ എക്സിക്യൂട്ടീവ് അംഗമെന്ന നിലയിൽ ചേളന്നൂർ എസ്.എൻ. കോളേജിന്റെ വളർച്ചയ്ക്ക് നേതൃത്വം നൽകി. കോളേജിന്റെ അടിസ്ഥാനസൗകര്യ വികസനം, പുതിയ കോഴ്‌സുകളുടെ ആരംഭം, അക്കാദമിക നിലവാര വർധന എന്നിവയിൽ അദ്ദേഹത്തിന്റെ ദീർഘവീക്ഷണം പ്രകടമായി.

ചേളന്നൂർ എസ്എൻ കോളേജിനെ കൂടുതൽ വിപുലീകരി കരിച്ചും വടകരയിൽ എസ്.എൻ. കോളേജ് സ്ഥാപിക്കുന്നതിലും അദ്ദേഹം നിർണായക പങ്കുവഹിച്ചു. യൂണിയന് കീഴിൽ ട്രസ്റ്റ് രൂപീകരിച്ച് അതുവഴി കോളേജ് സ്ഥാപിക്കുകയും, കാലത്തിനനുസരിച്ചുള്ള ബിരുദ-ബിരുദാനന്തര കോഴ്‌സുകൾ ആരംഭിക്കാൻ ശ്രമിക്കുകയും ചെയ്തു. ഇന്ന് കാലിക്കറ്റ് സർവകലാശാലയ്ക്ക് കീഴിലുള്ള മികച്ച സ്വാശ്രയ വിദ്യാഭ്യാസ സ്ഥാപനങ്ങളിലൊന്നായി വളർന്ന ഈ സ്ഥാപനത്തിന്റെ പിന്നിൽ അദ്ദേഹത്തിന്റെ ദീർഘകാല പരിശ്രമമുണ്ട്.

സാമ്പത്തിക ശാക്തീകരണത്തിനായുള്ള പ്രവർത്തനങ്ങൾ

സംഘടനയുടെ സാമൂഹിക ഉത്തരവാദിത്വം അംഗങ്ങളുടെ ജീവിതനിലവാരം ഉയർത്തലാണെന്ന കാഴ്ചപ്പാടോടെയായിരുന്നു അദ്ദേഹത്തിന്റെ പ്രവർത്തനം.

മൈക്രോഫിനാൻസ് പദ്ധതികൾ വിജയകരമായി നടപ്പാക്കി നിരവധി കുടുംബങ്ങളുടെ സാമ്പത്തിക സുരക്ഷ മെച്ചപ്പെടുത്താൻ അദ്ദേഹം നേതൃത്വം നൽകി. സാധാരണ കുടുംബങ്ങളുടെ വരുമാനം വർധിപ്പിക്കാനും സ്വയംപര്യാപ്തത വളർത്താനും ഈ പദ്ധതികൾ സഹായകമായി.

കെ.എസ്.എസ് – വടകരയുടെ ശബ്ദവും വെളിച്ചവും

വടകരയിലെ പ്രശസ്തമായ കെ.എസ്.എസ് ലൈറ്റ് ആൻഡ് സൗണ്ട് സ്ഥാപനത്തിന്റെ വളർച്ചയ്ക്കും പി.എം. രവീന്ദ്രന്റെ ദീർഘവീക്ഷണം വലിയ കരുത്തായി.

ഒരു വ്യാപാരസ്ഥാപനം മാത്രമല്ല, നിരവധി കുടുംബങ്ങളുടെ ഉപജീവനമാർഗമായി കെ.എസ്.എസ് വളർന്നു. വടകരയിലെയും സമീപപ്രദേശങ്ങളിലെയും പ്രധാന പൊതുപരിപാടികൾ, മഹാസമ്മേളനങ്ങൾ, യുവജനോത്സവങ്ങൾ, സാംസ്കാരിക ആഘോഷങ്ങൾ എന്നിവയുടെ ശബ്ദ-വെളിച്ച സംവിധാനങ്ങൾ കെ.എസ്.എസിന് ലഭിച്ചതിന് പിന്നിൽ അദ്ദേഹത്തിന്റെ വിശ്വാസ്യതയും നേതൃത്വവുമായിരുന്നു.

വർക്കലയിലെ ഗുരുദേവ തീർത്ഥാടന വേളയിൽ കെ.എസ്.എസ് സേവനം നൽകാൻ കഴിഞ്ഞത് അദ്ദേഹം എന്നും അഭിമാനത്തോടെ ഓർത്തിരുന്നു.

എന്റെ അഭ്യുദയകാംക്ഷിയായിരുന്ന പ്രിയ സഹോദരൻ"

:മുല്ലപ്പള്ളി രാമചന്ദ്രൻ

പി.എം. രവീന്ദ്രന്റെ നിര്യാണത്തിൽ മുൻ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ രേഖപ്പെടുത്തിയ അനുശോചനം അദ്ദേഹവുമായുള്ള ആത്മബന്ധത്തിന്റെ ആഴം വെളിപ്പെടുത്തുന്നതായിരുന്നു.

"പി.എം. രവീന്ദ്രന്റെ വേർപാടിലൂടെ വടകരയിലെ സാമൂഹ്യ–വ്യാപാര–വിദ്യാഭ്യാസ രംഗത്ത് ഒരു വലിയ വിടവാണ് സൃഷ്ടിക്കപ്പെട്ടിട്ടുള്ളത്. വടകരയിലെ വ്യാപാരരംഗത്ത് നിറഞ്ഞുനിന്ന പി.എം. നാണുവേട്ടന്റെ ഇളയ സഹോദരൻ കൂടിയായ രവി പരിചയപ്പെട്ടവർക്കാർക്കും പെട്ടെന്ന് മറക്കാൻ കഴിയുന്ന വ്യക്തിയല്ല. അസുഖബാധിതനായി വീട്ടിൽ വിശ്രമിക്കുമ്പോൾ അദ്ദേഹത്തെ കാണാൻ പോയ സന്ദർഭങ്ങൾ ഇന്നും മനസ്സിൽ നിറഞ്ഞുനിൽക്കുന്നു. പി.എം. കുടുംബവുമായുള്ള എന്റെ ബന്ധം എപ്പോഴും രവി സ്നേഹത്തോടെ ഓർത്തെടുക്കുമായിരുന്നു. ശ്രീനാരായണ സ്ഥാപനങ്ങളെ അന്തസ്സോടെ മുന്നോട്ടുകൊണ്ടുപോയ രവീന്ദ്രന്റെ നേതൃപാടവം ഓർക്കാതെ വയ്യ. ജീവിതത്തിലെ ഓരോ വഴിത്തിരിവുകളിലും എന്റെ അഭ്യുദയകാംക്ഷിയായി പി.എം. രവീന്ദ്രൻ ഉണ്ടായിരുന്നു. പ്രിയ സഹോദരന്റെ വേർപാടിൽ അഗാധമായ ദുഃഖം രേഖപ്പെടുത്തുന്നു."

കക്ഷിരാഷ്ട്രീയത്തിന് അതീതനായ ജനകീയ നേതാവ്

സംഘടനാ നേതാവായിരുന്നെങ്കിലും കക്ഷിരാഷ്ട്രീയ ഭേദമില്ലാതെ എല്ലാവരുടെയും ആദരവ് നേടിയ വ്യക്തിത്വമായിരുന്നു പി.എം. രവീന്ദ്രൻ.

വടകരയിലെ വലിയ പൊതുപരിപാടികൾ സംഘടിപ്പിക്കുമ്പോൾ സംഘാടകസമിതിയിൽ ആദ്യം പരിഗണിക്കപ്പെട്ട പേരുകളിൽ ഒന്നായിരുന്നു അദ്ദേഹത്തിന്റേത്. പ്രശ്നപരിഹാരത്തിലെ പക്വതയും പ്രവർത്തനത്തിലെ ആത്മാർത്ഥതയും ഏത് പരിപാടിയുടെയും വിജയത്തിന് ഉറപ്പായിരുന്നു.

അദ്ദേഹത്തിന്റെ സാന്നിധ്യം ചുറ്റുമുള്ളവർക്ക് ആത്മവിശ്വാസമായിരുന്നു. മറ്റുള്ളവരുടെ വളർച്ചയിലും വിജയത്തിലും ആത്മാർത്ഥമായി സന്തോഷിച്ച നേതാവെന്ന വിശേഷണവും അദ്ദേഹത്തിനുണ്ട്.

പ്രമുഖരുടെ ആദരാഞ്ജലി

എസ്.എൻ.ഡി.പി യോഗം ദേവസ്വം സെക്രട്ടറിയും എസ്.എൻ. ട്രസ്റ്റ് എക്സിക്യൂട്ടീവ് അംഗവുമായ സന്തോഷ് അരയാക്കണ്ടി പറഞ്ഞു:

"എസ്.എൻ.ഡി.പി യോഗത്തിന്റെ ചരിത്രത്തിൽ തങ്കലിപികളാൽ രേഖപ്പെടുത്തേണ്ട സേവനങ്ങളാണ് പി.എം. രവീന്ദ്രൻ കാഴ്ചവച്ചത്. വടകര യൂണിയനെ ശക്തിപ്പെടുത്തുകയും വിദ്യാഭ്യാസരംഗത്ത് ദീർഘവീക്ഷണത്തോടെ പ്രവർത്തിക്കുകയും ചെയ്തു. അദ്ദേഹത്തിന്റെ വേർപാട് സംഘടനയ്ക്ക് വലിയ നഷ്ടമാണ്."

മുതിർന്ന മാധ്യമപ്രവർത്തകനും എഴുത്തുകാരനുമായ ബാലകൃഷ്ണൻ വെളികുളങ്ങര പറഞ്ഞു:

"മലബാറിൽ ശ്രീനാരായണ പ്രസ്ഥാനത്തെ ആരാലും അവഗണിക്കാനാകാത്ത ശക്തിയാക്കി വളർത്തുന്നതിൽ പി.എം. രവീന്ദ്രന്റെ പങ്ക് വിലമതിക്കാനാവാത്തതാണ്. സ്ഥാനങ്ങൾ ഉയർന്നെങ്കിലും സാധാരണക്കാരോടുള്ള പെരുമാറ്റത്തിൽ ഒരിക്കലും മാറ്റം വന്നിരുന്നില്ല."

അനുശോചനപ്രവാഹം

പി.എം. രവീന്ദ്രന്റെ നിര്യാണത്തിൽ ഷാഫി പറമ്പിൽ എം.പി., കെ.കെ. രമ എം.എൽ.എ., മുൻ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ, കോട്ടയിൽ രാധാകൃഷ്ണൻ, എൻ. വേണു, ടി.കെ. അഷറഫ്, അഡ്വ. ഇ. നാരായണൻ നായർ, സി. ഭാസ്കരൻ, സി.ആർ. പ്രഫുൽ കൃഷ്ണ, ബാബു ഒഞ്ചിയം, രാംദാസ് മണലേരി, എം.കെ. ഭാസ്കരൻ, പി.പി. രാജൻ, പ്രദീപ് ചോമ്പാല, ബവിത്ത് മലോൽ, ആയാടത്തിൽ രവീന്ദ്രൻ തുടങ്ങി രാഷ്ട്രീയ, സാമൂഹിക, സാംസ്കാരിക മേഖലയിലെ നിരവധി പ്രമുഖർ ആദരാഞ്ജലികൾ അർപ്പിച്ചു.

വടകരയുടെ ഓർമ്മകളിൽ ജീവിക്കുന്ന നേതാവ്

ഒരു സംഘടനയുടെ നേതാവെന്നതിലുപരി, ഒരു വിദ്യാഭ്യാസപ്രവർത്തകൻ, സംഘാടകൻ, സംരംഭകൻ, ജനസേവകൻ, എല്ലാവർക്കും സമീപിക്കാനാകുന്ന സുഹൃത്ത്—ഇതെല്ലാം ഒരുമിച്ചുചേർന്ന വ്യക്തിത്വമായിരുന്നു പി.എം. രവീന്ദ്രൻ.

വടകരയുടെ വികസനത്തിലും ശ്രീനാരായണ പ്രസ്ഥാനത്തിന്റെ വളർച്ചയിലും പതിറ്റാണ്ടുകളോളം കരുത്തുറ്റ സാന്നിധ്യമായിരുന്ന അദ്ദേഹം ഇനി ചരിത്രത്തിന്റെ ഭാഗമാണ്. എന്നാൽ അദ്ദേഹം പടുത്തുയർത്തിയ സ്ഥാപനങ്ങളും വളർത്തിയ പ്രസ്ഥാനങ്ങളും ജീവിതസ്പർശം നൽകിയ ആയിരക്കണക്കിന് മനുഷ്യരും അദ്ദേഹത്തിന്റെ ഓർമ്മകൾ എന്നും നിലനിർത്തും.