ലഹരിമുക്തിയിലേക്ക് ഒരു ശ്വാസത്തിൻ്റെ ദൂരം ഉജ്വൽ ശങ്കറിൻ്റെ അതിജീവനത്തിന്റെ പ്രചോദനാത്മക ജീവിതകഥ... : ദിവാകരൻ ചോമ്പാല

ബെംഗളൂരു: ചില ജീവിതകഥകൾ വെറും വ്യക്തിഗത വിജയങ്ങളുടെ രേഖകളല്ല; അവ സമൂഹത്തിന് വഴികാട്ടുന്ന പ്രകാശസ്തംഭങ്ങളാണ്. പുകവലിയിൽ ആരംഭിച്ച് മദ്യപാനത്തിലേക്കും പിന്നീട് മാരകമായ മയക്കുമരുന്നുകളുടെ പിടിയിലേക്കും വഴുതിവീണ ഒരു യുവാവ്, ഒടുവിൽ ഒരു ശ്വാസത്തിന്റെ ശക്തിയിലൂടെ ജീവിതം തിരിച്ചുപിടിച്ച കഥയാണ് ഉജ്വൽ ശങ്കറിന്റേത്. ഇന്ന് അദ്ദേഹം സ്വന്തം ജീവിതത്തെ മാത്രമല്ല, ലഹരിയുടെ ഇരുണ്ട ഇടനാഴികളിൽ അകപ്പെട്ടിരിക്കുന്ന നൂറുകണക്കിന് മനുഷ്യരുടെ ജീവിതത്തെ യും വെളിച്ചത്തിലേക്ക് നയിക്കുന്ന ദൗത്യത്തി ലാണ്.

വീഴ്ചയുടെ തുടക്കം ഉജ്വലിന്റെ ജീവിതത്തിൽ ലഹരിയുടെ ആദ്യ ചുവടുവെപ്പ് സ്കൂൾ പഠനകാലത്തിന്റെ അവസാനഘട്ടത്തിലായിരുന്നു. ഒരു പരീക്ഷണം എന്ന നിലയിൽ തുടങ്ങിയ പുകവലി, കോളേജ് ജീവിതത്തിലെത്തിയപ്പോൾ കൂട്ടുകാർക്കിടയിലെ സ്വീകാര്യതയുടെ മാനദണ്ഡമായി മാറി. "പുകവലിക്കാത്തവൻ പിന്നോക്കക്കാരൻ" എന്ന തെറ്റായ സാമൂഹിക ധാരണയും യുവത്വത്തിന്റെ ഈഗോയും ചേർന്നപ്പോൾ അത് പതിയെ ശീലമായി വളർന്നു. പുകവലിക്ക് പിന്നാലെ മദ്യപാനവും ജീവിതത്തിന്റെ ഭാഗമായിത്തീർന്നു.

എന്നാൽ യഥാർത്ഥ അപകടം അതിനപ്പുറമായിരുന്നു. ഡിഗ്രി പഠനകാലത്ത് സുഹൃത്തുക്കളുടെ സ്വാധീനവും കൗതുകവും ചേർന്ന് മയക്കുമരുന്നുകളുടെ ലോകത്തേക്കുള്ള വാതിൽ തുറന്നു. "ഒരുതവണ പരീക്ഷിച്ചാൽ എന്താണ് സംഭവിക്കുക?" എന്ന നിസ്സാരമായ ചിന്ത, പിന്നീട് ആറു വർഷത്തോളം നീണ്ടുനിന്ന ദുരിതയാത്രയുടെ തുടക്കമായി. ലഹരി മനുഷ്യനെ കീഴടക്കുമ്പോൾ അത് ശരീരത്തെ മാത്രമല്ല, മനസ്സിനെയും ബന്ധങ്ങളെയും സ്വപ്നങ്ങളെയും ഒരുപോലെ തകർക്കുന്നു. ഉജ്വലിന്റെ ജീവിതത്തിലും അതുതന്നെയാണ് സംഭവിച്ചത്. ആരോഗ്യം തകർന്നു, ആത്മവിശ്വാസം നഷ്ടപ്പെട്ടു, കുടുംബവുമായുള്ള ബന്ധങ്ങൾ വഷളായി, സുഹൃദ്ബന്ധങ്ങൾ അകന്നു.

ജീവിതം പതിയെ ഒരു ലക്ഷ്യവുമില്ലാത്ത യാത്രയായി മാറി. ജീവിതം മാറ്റിമറിച്ച ഒരു കൂടിക്കാഴ്ച ഷിംലയിലെ ജോലി കഴിഞ്ഞ് ബെംഗളൂരുവിലേക്ക് മടങ്ങിയെത്തിയ കാലത്തായിരുന്നു ജീവിതത്തിലെ ഏറ്റവും നിർണായകമായ വഴിത്തിരിവ്. ഉജ്വലിന്റെ അവസ്ഥ കണ്ട് വേദനിച്ച ഒരു സുഹൃത്ത് അദ്ദേഹത്തോട് ആർട്ട് ഓഫ് ലിവിങ് സംഘടിപ്പിക്കുന്ന ഒരു പരിശീലന പരിപാടിയിൽ പങ്കെടുക്കാൻ നിർദ്ദേശിച്ചു. എന്നാൽ അന്നത്തെ ഉജ്വലിന് അതൊന്നും ഗൗരവമായി തോന്നിയില്ല. "ശ്വാസം കൊണ്ട് ജീവിതം മാറുമോ?" എന്ന പരിഹാസത്തോടെ അദ്ദേഹം ആ നിർദ്ദേശം തള്ളിക്കളഞ്ഞു. പക്ഷേ യഥാർത്ഥ സൗഹൃദം ഒരിക്കലും കൈവിടില്ല.

രണ്ടു വർഷത്തോളം ആ സുഹൃത്ത് തുടർച്ചയായി പ്രേരിപ്പിച്ചു. ഒടുവിൽ മനസ്സില്ലാമനസ്സോടെ ഉജ്വൽ ആർട്ട് ഓഫ് ലിവിങ്ങിന്റെ സുദർശൻ ക്രിയ പരിശീലനത്തിൽ പങ്കെടുക്കാൻ തീരുമാനിച്ചു. ആ ആദ്യ ശ്വാസം ജീവിതത്തിലെ ഏറ്റവും വലിയ മാറ്റങ്ങൾ ചിലപ്പോൾ നിശബ്ദമായ നിമിഷങ്ങളിലാണ് സംഭവിക്കുന്നത്. ആദ്യമായി സുദർശൻ ക്രിയ ചെയ്ത അനുഭവം ഉജ്വൽ ഇന്നും വികാരഭരിതനായി ഓർക്കുന്നു. "ആദ്യത്തെ സുദർശൻ ക്രിയ കഴിഞ്ഞപ്പോൾ എന്റെ തലയിൽ നിന്ന് വലിയൊരു ഭാരം ഇറങ്ങിപ്പോയതുപോലെ തോന്നി. നഷ്ടപ്പെട്ടുപോയ വർഷങ്ങളെക്കുറിച്ച് ഓർത്തപ്പോൾ നിയന്ത്രിക്കാനാകാതെ ഞാൻ ഏകദേശം അരമണിക്കൂർ കരഞ്ഞു."

വർഷങ്ങളായി മനസ്സിൽ അടിഞ്ഞുകൂടിയ കുറ്റബോധവും നിരാശയും വേദനയും ആ ശ്വാസത്തോടൊപ്പം പുറത്തേക്കൊഴുകിപ്പോയതുപോലെ യായിരുന്നു ആ അനുഭവം. ശീലങ്ങൾ തനിയെ അകന്നുപോയപ്പോൾ അഞ്ചു ദിവസത്തെ പരിശീലനത്തിനുശേഷം ഉജ്വലിന്റെ ചിന്താരീതിയിൽ അത്ഭുതകരമായ മാറ്റം സംഭവിച്ചു. ഓരോ പ്രഭാതവും മനസ്സിനും ശരീരത്തിനും നൽകുന്ന ശാന്തതയും ഊർജവും അനുഭവിച്ച അദ്ദേഹം, വൈകുന്നേരങ്ങളിൽ വീണ്ടും പുകവലിക്കാനോ മദ്യപിക്കാനോ മനസ്സ് അനുവദിക്കുന്നില്ലെന്ന് തിരിച്ചറിഞ്ഞു. ഒരു ദിവസം പെട്ടെന്ന് അദ്ദേഹം പുകവലി പൂർണമായി ഉപേക്ഷിച്ചു. അതിനുശേഷം മദ്യത്തോടും മയക്കുമരുന്നുകളോടും ഉണ്ടായിരുന്ന ആസക്തി ക്രമേണ ഇല്ലാതായി.