ഓപ്പറേഷൻ തൂഫാൻ എന്ന ഒറ്റ പദ്ധതിയിലൂടെ കേരളത്തിന്റെയും രാജ്യത്തിന്റെയും ശ്രദ്ധ പിടിച്ചുപറ്റുകയാണ് പ്രിയങ്കരനായ ആഭ്യന്തര മന്ത്രി:ഡോ. ഹുസൈൻ മടവൂർ

ഓപ്പറേഷൻ തൂഫാൻ എന്ന ഒറ്റ പദ്ധതിയിലൂടെ കേരളത്തിന്റെയും രാജ്യത്തിന്റെയും ശ്രദ്ധ പിടിച്ചുപറ്റുകയാണ് പ്രിയങ്കരനായ ആഭ്യന്തര മന്ത്രി രമേഷ് ചെന്നിത്തല. ജാതി, മത, രാഷ്ട്രീയ ഭേദമന്യേ സമൂഹത്തിന്റെ എല്ലാ വിഭാഗങ്ങളിൽ നിന്നുമുള്ള പിന്തുണ ഈ ദൗത്യത്തിന് ലഭിച്ചുകഴിഞ്ഞു.

പ്രതിപക്ഷത്തിരുന്നിരുന്ന കാലത്തുതന്നെ മയക്കുമരുന്ന് വിരുദ്ധ ബോധവത്കരണവുമായി അദ്ദേഹം കേരളം മുഴുവൻ സഞ്ചരിച്ചിരുന്നു. കോഴിക്കോട്ടെത്തിയപ്പോൾ ആ പ്രചാരണ യാത്രയിൽ അദ്ദേഹത്തോടൊപ്പം ചേരാൻ എനിക്കും അവസരം ലഭിച്ചിരുന്നു.

ഇന്ന് ഓപ്പറേഷൻ തൂഫാനിലൂടെ മയക്കുമരുന്ന് മാഫിയക്കെതിരെ ശക്തമായ നടപടികളാണ് നടക്കുന്നത്. സമൂഹത്തെ കാർന്നുതിന്നുന്ന ഈ വിപത്തിനെതിരെ ശക്തമായ നിയമനടപടികളും ബോധവത്കരണ പ്രവർത്തനങ്ങളും കാലഘട്ടത്തിന്റെ ആവശ്യമാണ്.

ഓപ്പറേഷൻ തൂഫാൻ ആരംഭിച്ചതിന് ശേഷം ജൂൺ 16 വരെയുള്ള ഏറ്റവും പുതിയ കണക്കുകൾ പ്രകാരം 2,575 കേസുകൾ രജിസ്റ്റർ ചെയ്യുകയും 2,778 പേരെ അറസ്റ്റ് ചെയ്യുകയും കോടിക്കണക്കിന് രൂപയുടെ മയക്കുമരുന്നുകൾ പിടിച്ചെടുക്കുകയും ചെയ്തിട്ടുണ്ട്.

മയക്കുമരുന്ന് ശൃംഖലയെ അടിവേരോടെ തകർക്കാനുള്ള ശക്തമായ നടപടികളുടെ പ്രതിഫലനമാണ് ഈ കണക്കുകൾ.

ഈ ഒറ്റ പദ്ധതിയുടെ ഫലമായി ഇന്ന് കേരളത്തിലെ അമ്മമാരും അച്ഛന്മാരും ഏറെ ആശ്വാസത്തിലും സന്തോഷത്തിലുമാണ്. തങ്ങളുടെ മക്കളുടെ ഭാവിയെക്കുറിച്ചുള്ള ആശങ്കകൾക്ക് ഒരളവുവരെ ശമനം ലഭിച്ചുവെന്ന വിശ്വാസമാണ് ജനങ്ങളിൽ വളരുന്നത്. യുവതലമുറയെ മയക്കുമരുന്നിന്റെ പിടിയിൽ നിന്ന് മോചിപ്പിക്കാനുള്ള ഈ ദൗത്യം ഓരോ കുടുംബത്തിനും പ്രത്യാശയുടെ കിരണമായി മാറിയിരിക്കുന്നു.

മയക്കുമരുന്നിനെതിരായ ഈ പോരാട്ടത്തിൽ മുന്നിൽ നിന്ന് നേതൃത്വം നൽകുന്ന ആഭ്യന്തര മന്ത്രി രമേഷ് ചെന്നിത്തലയ്ക്കും, ഈ ദൗത്യത്തിൽ പങ്കാളികളായ കേരള പോലീസിനും, എക്സൈസ് വകുപ്പിനും, ബോധവത്കരണ പ്രവർത്തകർക്കും എന്റെ ഹൃദയം നിറഞ്ഞ അഭിനന്ദനങ്ങളും ഒരായിരം നന്ദിയും അഭിവാദ്യങ്ങളും.

ഡോ. ഹുസൈൻ മടവൂർ