ചോമ്പാൽ ഹാർബറിന്റെ ചരിത്രത്തോടുള്ള അനാദരവ് ;വഴിനടക്കാനുള്ള അവകാശത്തിനായി ചോമ്പാലക്കാർ തെരുവിലേക്ക്: ദിവാകരൻ ചോമ്പാല

ദേശീയപാത വികസനത്തിന്റെ അതിവേഗപ്പാച്ചിലിൽ ഒരു നാടിന്റെ ജീവനാഡിയും ചരിത്രവും ചവിട്ടിമെതി ക്കപ്പെടുന്ന കാഴ്ചയ്ക്കാണ് മീത്തലെ മുക്കാളി സാക്ഷ്യം വഹിക്കുന്നത്.

വികസനത്തിന്റെ അളവുകോൽ റോഡുകളുടെ വീതിയല്ല, മനുഷ്യരുടെ ജീവിതത്തിന് നൽകുന്ന സുരക്ഷയും മാന്യതയുമാണ് യഥാർത്ഥ വികസനം.

നീതി നിഷേധിക്കപ്പെട്ട മീത്തലെ മുക്കാളിയിലെ ജനങ്ങൾ കക്ഷിഭേദമന്യേ ഇന്ന് വൈകുന്നേരം ഹാർബർ റോഡിന്റെ തുടക്കത്തിൽ അതിശക്തമായ പ്രതിഷേധവുമായി അണിനിരക്കുന്നു.

ചോമ്പാൽ ഹാർബറിന്റെ ചരിത്രത്തോടുള്ള അനാദരവിനെതിരെ ..പതിറ്റാണ്ടുകൾ പഴക്കമുള്ള യാത്രാസൗക ര്യവും അടിപ്പാതയും ഓവുചാലാക്കി മാറ്റി ജനങ്ങളെ വേലിക്കെട്ടിന് പുറത്താക്കിയ പ്രാകൃതവും നിന്ദ്യവു മായ വകതിരിവില്ലായ്മക്കെതിരെ .

നൂറുകണക്കിന് പ്രദേശവാസികൾ, ബി.ഇ.എം. യു.പി. സ്കൂളിലെയും സമീപ സ്ഥാപനങ്ങളിലെയും കുരുന്നുകളായ വിദ്യാർത്ഥികൾ പ്രായം ചെന്നവർ ,ഭാരം തൂക്കിനടക്കുന്നവർ തുടങ്ങി ആയിരങ്ങൾ ദുരിതക്കയത്തിൽ .

 ചോമ്പാലയുടെ സാമ്പത്തിക സ്രോതസ്സായ മത്സ്യബന്ധന തുറമുഖത്തിന്റെ പ്രധാന പ്രവേശന കവാടത്തിലാണ് ഈ ജനദ്രോഹ നടപടി.

വികസനത്തെ നല്ല മനസ്സോടെ നാട് സ്വാഗതം ചെയ്തപ്പോൾ, തിരികെ ലഭിച്ചത് പതിറ്റാണ്ടുകളായി തങ്ങൾ നടന്നുശീലിച്ച വഴികളിൽ നിന്നുള്ള പുറന്തള്ളലാണ്.

ചോമ്പാൽ ഹാർബർ റോഡിന്റെ പ്രവേശന കവാടത്തിൽ പൊതുജനങ്ങൾ ക്കും വിദ്യാർത്ഥികൾക്കും സുരക്ഷിതമായി കടന്നുപോകാൻ ഉണ്ടായിരുന്ന അടിപ്പാതയെ വെറുമൊരു ഓവുചാലാക്കി മാറ്റിയ അധികൃതരുടെ വകതിരിവില്ലായ്മയ്ക്കെതിരെ ഇന്ന് വൈകുന്നേരം ചോമ്പാല കത്തിജ്വലിക്കുകയാണ് . കക്ഷിഭേദങ്ങൾ മറന്ന്, രാഷ്ട്രീയ അതിർവരമ്പുകൾ ഭേദിച്ച് ഒരു നാട് മുഴുവൻ ഇന്ന് തെരുവിലേക്ക് ഇറങ്ങുകയാണ്; തങ്ങളുടെ വഴിനടക്കാനുള്ള അവകാശത്തിന് വേണ്ടി.

തടവറയിലാകുന്ന ജനജീവിതവും കുരുന്നുകളുടെ സുരക്ഷയും

ഇത് വെറുമൊരു കോൺക്രീറ്റ് പാലത്തിന്റെയോ അടിപ്പാതയുടെയോ മാത്രം പ്രശ്നമല്ല, മറിച്ച് ഒരു ജനതയുടെ അതിജീവനത്തിന്റെ പ്രശ്നമാണ്. തട്ടോളിക്കര, കുന്നുമ്മക്കര, ഒഞ്ചിയം ഭാഗങ്ങളിൽ നിന്നുള്ള നൂറുകണക്കിന് ആളുകളും റെയിൽവേയുടെ കിഴക്കുഭാഗത്ത് താമസിക്കുന്ന വിദ്യാർത്ഥികളും നിത്യേന ആശ്രയിച്ചിരുന്ന വഴിയാണിത്. ബി.ഇ.എം. യു.പി. സ്കൂളിലേക്ക് പോകുന്ന കുരുന്നുകൾ ഇനി എങ്ങനെ ഈ മരണപ്പാച്ചിൽ നടത്തുന്ന ദേശീയപാത മുറിച്ചുകടക്കും?

കഴിഞ്ഞ ദിവസങ്ങളിൽ ശക്തമായ ജനകീയ പ്രതിഷേധത്തെ തുടർന്ന് കുഞ്ഞിപ്പള്ളിയിലും കേളുബസാ റിലും അടിപ്പാതകൾ അനുവദിക്കാൻ അധികൃതർ തയ്യാറായിരുന്നു. എന്നാൽ സമാധാനപരമായി ആവശ്യങ്ങൾ ഉന്നയിച്ച മീത്തലെ മുക്കാളിയിലെ ജനങ്ങളെ ദേശീയപാത അധികൃതർ പൂർണ്ണമായി അവഗണിച്ചു.

"കരയുന്ന കുഞ്ഞിനേ പാലുള്ളൂ" എന്ന അവസ്ഥയിലേക്ക് നാടിനെ തള്ളിവിട്ട ഭരണകൂടത്തോടുള്ള കടുത്ത അമർഷമാണ് ഇന്നത്തെ ജനകീയ പ്രതിഷേധത്തിന് പിന്നിൽ. ഫൂട്ട് ഓവർ ബ്രിഡ്ജ് പോലുള്ള സാങ്കേതിക പരിഹാരങ്ങൾ പ്രായമായവർക്കും രോഗികൾക്കും കുട്ടികൾക്കും പ്രായോഗികമല്ല എന്ന യാഥാർത്ഥ്യം അധികാരികൾ മനസ്സിലാക്കണം.