മുക്കാളി പട്ട്യാട്ട് റെയിൽവെ അണ്ടർ ബ്രിഡ്ജിലെ വെള്ളക്കെട്ട്: ശാശ്വത പരിഹാരത്തിനായി ജനകീയ പ്രക്ഷോഭത്തിനൊരുങ്ങി ബി.ജെ.പി

മുക്കാളി പട്ട്യാട്ട് റെയിൽവെ അണ്ടർ ബ്രിഡ്ജിലെ വെള്ളക്കെട്ട്: ശാശ്വത പരിഹാരത്തിനായി ജനകീയ പ്രക്ഷോഭത്തിനൊരുങ്ങി ബി.ജെ.പി

മുക്കാളി: മഴക്കാലമായാൽ ജനജീവിതം ദുസ്സഹമാക്കുന്ന മുക്കാളി പട്ട്യാട്ട് റെയിൽവെ അണ്ടർബ്രിഡ്ജിലെ വെള്ളക്കെട്ടിന് ശാശ്വത പരിഹാരം കാണണമെന്നാവശ്യപ്പെട്ട് അഴിയൂർ, ഒഞ്ചിയം, ഏറാമല ഗ്രാമപഞ്ചാ യത്തുകളിലെ ബി.ജെ.പി പ്രവർത്തകരുടെ നേതൃത്വത്തിൽ മുക്കാളി വ്യാപാരി ഭവനിൽ യോഗം ചേർന്നു.

മുക്കാളി, ഓർക്കാട്ടേരി ടൗണുകളെ പരസ്പരം ബന്ധിപ്പിക്കുന്ന പ്രധാന പാതയായ പട്ട്യാട്ട് റെയിൽവെ അണ്ടർബ്രിഡ്ജ് റോഡിൽ എല്ലാ മഴക്കാലത്തും അതിരൂക്ഷമായ വെള്ളക്കെട്ടാണ് അനുഭവപ്പെടുന്നത്. ഇതുവഴി കടന്നുപോകുന്ന അപരിചിതരായ യാത്രക്കാരുടെ വാഹനങ്ങൾ വെള്ളത്തിന്റെ ആഴം മനസ്സിലാക്കാൻ സാധിക്കാതെ കേടായി അണ്ടർബ്രിഡ്ജിൽ കുടുങ്ങിക്കിടക്കുന്നത് ഇവിടെ പതിവ് കാഴ്ചയായി മാറിയിരിക്കുകയാണ്.

ദുരിതയാത്രയ്ക്ക് അറുതി വേണം

വെള്ളക്കെട്ട് കാരണം അഴിയൂർ, ഒഞ്ചിയം, ഏറാമല ഗ്രാമപഞ്ചായത്തുകളിലെ പ്രദേശവാസികൾക്ക് കിലോമീറ്ററുകളോളം ചുറ്റി മറ്റ് റോഡുകളെ ആശ്രയിക്കേണ്ടി വരുന്നത് കടുത്ത യാത്രാക്ലേശത്തിന് കാരണമാകുന്നുണ്ട്. വർഷങ്ങളായുള്ള ഈ ദുരിതത്തിന് ശാശ്വത പരിഹാരം കാണാനാണ് ബി.ജെ.പി പ്രവർത്തകർ അടിയന്തര യോഗം വിളിച്ചുചേർത്തത്.

റെയിൽവെ മേൽപ്പാലം ഉയർത്തി പുതുക്കിപ്പണിയണം: യോഗം

നിലവിലുള്ള റെയിൽവെ മേൽപ്പാലം ഉയർത്തി പുതുക്കിപ്പണിതാൽ മാത്രമേ ഈ വെള്ളക്കെട്ടിന് ശാശ്വതമായ പരിഹാരം കണ്ടെത്താൻ സാധിക്കൂ എന്ന് യോഗം ഐകകണ്ഠേന അഭിപ്രായപ്പെട്ടു. ഇതിനായി ബഹുമാനപ്പെട്ട വടകര എം.പി, എം.എൽ.എ, കൂടാതെ അഴിയൂർ, ഒഞ്ചിയം, ഏറാമല ഗ്രാമപഞ്ചായത്ത് പ്രസിഡന്റുമാർ എന്നിവരെ ഉൾപ്പെടുത്തി ഒരു ജനകീയ കമ്മിറ്റി രൂപീകരിക്കാൻ യോഗം തീരുമാനിച്ചു. കേന്ദ്ര റെയിൽവെ മന്ത്രിക്കു നേരിട്ട് സമർപ്പിക്കുന്നതിനായി വിപുലമായ നിവേദനം തയ്യാറാക്കാനും യോഗത്തിൽ തീരുമാനമായിട്ടുണ്ട്. ഇതോടൊപ്പം പ്രദേശത്തെ വെള്ളപ്പൊക്കത്തിന് കാരണമാകുന്ന ചെറിയാണ്ടി തോട് പുനർനിർമ്മിക്കണമെന്ന ആവശ്യവും യോഗം മുന്നോട്ടുവെച്ചു.

മുക്കാളി വ്യാപാരി ഭവനിൽ നടന്ന യോഗത്തിൽ കെ.കെ. ഉദയകുമാർ സ്വാഗതം ആശംസിച്ചു. അഴിയൂർ ഗ്രാമപഞ്ചായത്ത് പതിനാറാം വാർഡ് മെമ്പർ ശ്രീകല വി.എൻ അധ്യക്ഷത വഹിച്ചു.

കെ.പി. ജയകുമാർ (ബി.ജെ.പി സംസ്ഥാന കമ്മിറ്റി അംഗം) ,പി.കെ. പ്രീത (അഴിയൂർ ഗ്രാമപഞ്ചായത്ത് മുൻ മെമ്പർ) ,പി.കെ. പ്രകാശൻ ,അനിൽ കുമാർ വി.പി ,പി. രാജേഷ് കുമാർ (കേരള എൻ.ജി.ഒ സംഘ് കോഴിക്കോട് ജില്ലാ സെക്രട്ടറി) ,അക്ഷയ് കൃഷ്ണ (യുവമോർച്ച മണ്ഡലം സെക്രട്ടറി) ,ദിനേശൻ പ്യാർ ,ശശീന്ദ്രൻ പി.കെ

യോഗത്തിന്റെ സമാപനത്തിൽ ശ്രീലേഷ് കെ.ടി.കെ നന്ദി പ്രകാശിപ്പിച്ചു. പ്രദേശവാസികളുടെ ദീർഘകാലത്തെ ഈ യാത്രാക്ലേശത്തിന് ഉടൻ പരിഹാരം കണ്ടില്ലെങ്കിൽ ശക്തമായ ജനകീയ പ്രക്ഷോഭവുമായി മുന്നോട്ടുപോകാനാണ് ബി.ജെ.പി പ്രവർത്തകരുടെ തീരുമാനം.