വിജയത്തിന്റെ ആണിക്കല്ല്: കേൾക്കാനുള്ള സന്നദ്ധത :ഡോ :റിജി ജി നായർ

മനുഷ്യൻ നേടിയെടുക്കുന്ന വിജ്ഞാനത്തേക്കാളും പദവികളേക്കാളും വലിയ ഒന്നാണ് മറ്റുള്ളവരെ കേൾക്കാനുള്ള മനസ്സ്. ജീവിതത്തിന്റെ ഏതു തുറയിലായാലും, വിജയത്തിന്റെ ഉന്നതശൃംഗങ്ങൾ കീഴടക്കാൻ ഒരാൾക്ക് ഉണ്ടായിരിക്കേണ്ട ഏറ്റവും വലിയ സ്വഭാവവിശേഷമാണ് 'കേൾക്കാൻ സന്നദ്ധനാകുക' എന്നത്. പലപ്പോഴും അധികാരത്തിന്റെയോ അറിവിന്റെയോ പടവുകൾ കയറിക്കഴിയുമ്പോൾ പലരും മറന്നുപോകുന്ന പാഠവും ഇതുതന്നെയാണ്.

സർവ്വജ്ഞാനി എന്ന മിഥ്യാധാരണ

ഒരു ഉന്നതസ്ഥാനത്തെത്തിക്കഴിഞ്ഞാൽ തനിക്കെല്ലാം അറിയാമെന്നും, താനൊരു സർവ്വവിജ്ഞാനകോശമാണെന്നും കരുതി 'സർവ്വജ്ഞപീഠത്തിൽ' ഇരിക്കുന്നവർ കാലക്രമത്തിൽ പരാജയത്തിന്റെ പടുകുഴിയിലേക്ക് വീഴാനാണ് സാധ്യത കൂടുതൽ. "എനിക്കെല്ലാം അറിയാം" എന്ന ഭാവം പുതിയ അറിവുകളിലേക്കുള്ള വാതിലുകൾ കൊട്ടിയടയ്ക്കുന്നു. വിനയത്തോടെ മറ്റുള്ളവരെ കേൾക്കുന്നവർക്ക് മാത്രമേ വളരാൻ സാധിക്കൂ.

ആരെയും നിസ്സാരരായി കാണരുത്

നമ്മുടെ മുന്നിലെത്തുന്ന ഒരാളെയും അവർ വഹിക്കുന്ന സ്ഥാനത്തി ന്റെയോ പദവിയുടെയോ പേരിൽ നിസ്സാരരായി കാണരുത്. ഓരോ മനുഷ്യനും ഓരോ പാഠപുസ്തകമാണ്. അവർ എത്ര ചെറിയവരാണെങ്കിലും ശരി, ജീവിതാനുഭവങ്ങളും സാഹചര്യങ്ങളും അവർക്ക് നൽകിയ ചില ഉൾക്കരുത്തുകളുണ്ടാകും. ഒരു സ്ഥാപനത്തിന്റെ എം.ഡി.ക്ക് തന്റെ അറ്റൻഡറിൽ നിന്നുപോലും പുതിയ പാഠങ്ങൾ പഠിക്കാനുണ്ടാകും എന്നതാണ് യാഥാർത്ഥ്യം.

പുതിയ ഉത്തരവാദിത്തങ്ങളും പഠനവും

ഒരു ബാങ്ക് മാനേജരോ ഹെഡ് മാസ്റ്ററോ ആയി പുതിയൊരു സ്ഥലത്ത് ചുമതലയേൽക്കുമ്പോൾ, അവിടെ തന്റെ പ്രഭാവം തെളിയിക്കാൻ ധൃതി കാണിക്കുന്നതിനേക്കാൾ പ്രധാനം ആ സ്ഥാപനത്തെയും അവിടുത്തെ മനുഷ്യരെയും മനസ്സിലാക്കുക എന്നതാണ്.

ബാങ്ക് മാനേജർക്ക്: ബ്രാഞ്ചിന്റെ ചരിത്രം, പ്രധാന ഉപഭോക്താക്കൾ, അവിടുത്തെ പ്രാദേശികമായ പ്രത്യേകതകൾ എന്നിവ മനസ്സിലാക്കാൻ വർഷങ്ങളായി അവിടെ ജോലി ചെയ്യുന്ന ഒരു താഴ്ന്ന ജീവനക്കാരന് നൽകാൻ കഴിയുന്ന വിവരങ്ങൾ ചിലപ്പോൾ മാനേജർക്ക് വലിയ മുതൽക്കൂട്ടാകും.

ഹെഡ് മാസ്റ്റർക്ക്: സ്കൂളിന്റെ പശ്ചാത്തലം, പൂർവ്വ വിദ്യാർത്ഥികൾ, പി.ടി.എ., അടിയന്തിര ആവശ്യങ്ങൾ എന്നിവയെക്കുറിച്ച് സഹപ്രവർത്തകരിൽ നിന്നും നാട്ടുകാരിൽ നിന്നും കേട്ടറിയുന്നത് മികച്ച ഭരണം കാഴ്ചവെക്കാൻ സഹായിക്കും.