'ജനങ്ങളെ വഞ്ചിക്കാനില്ല'; തമിഴ്‌നാട്ടിൽ ജനപ്രിയ പ്രഖ്യാപനങ്ങളുമായി മുഖ്യമന്ത്രി വിജയ്

ചെന്നൈ: "ഞാൻ തെറ്റ് ചെയ്യില്ല, തെറ്റ് ചെയ്യുന്നവർ കൂടെയുള്ള വരാണെങ്കി ൽ പോലും വിട്ടുവീഴ്ചയുണ്ടാകില്ല. ജനങ്ങളെ വഞ്ചിക്കുന്ന വ്യാജ വാഗ്ദാനങ്ങ ൾ നൽകാൻ എനിക്ക് താല്പര്യമില്ല,

" തമിഴ്‌നാട് മുഖ്യമന്ത്രിയായി ചുമതലയേറ്റ ശേഷം വിജയ് പ്രഖ്യാപിച്ചു. സത്യപ്രതിജ്ഞയ്ക്ക് പിന്നാലെ സംസ്ഥാനത്ത് വിപ്ലവകരമായ മാറ്റങ്ങൾ ലക്ഷ്യമിട്ടുള്ള സുപ്രധാന തീരുമാനങ്ങളിലാണ് അദ്ദേഹം ആദ്യമായി ഒപ്പുവെച്ചത്.

സൗജന്യ വൈദ്യുതിയും സ്ത്രീ സുരക്ഷയും ഉൾപ്പെടെയുള്ള ജനപ്രിയ പദ്ധതികളാണ് അധികാരമേറ്റയുടൻ മുഖ്യമന്ത്രി പ്രഖ്യാപിച്ചത്. സുതാര്യമായ ഭരണമായിരിക്കും തന്റെ ലക്ഷ്യമെന്ന് അദ്ദേഹം വ്യക്തമാക്കി.

മുഖ്യ പ്രഖ്യാപനങ്ങൾ:

സൗജന്യ വൈദ്യുതി: 500 യൂണിറ്റിൽ താഴെ വൈദ്യുതി ഉപയോഗിക്കുന്ന ഗാർഹിക ഉപഭോക്താക്കൾക്ക് 200 യൂണിറ്റ് വരെ വൈദ്യുതി സൗജന്യമായി നൽകും. സാധാരണക്കാർക്ക് വലിയ ആശ്വാസമാകുന്നതാണ് ഈ തീരുമാനം.

സ്ത്രീ സുരക്ഷ: സ്ത്രീകൾക്കെതിരായ അതിക്രമങ്ങൾ തടയാനും സുരക്ഷ ഉറപ്പാക്കാനും പ്രത്യേക സേന രൂപീകരിക്കും.

ലഹരിവിരുദ്ധ പോരാട്ടം: സംസ്ഥാനത്തെ ലഹരി മാഫിയയെ അടിച്ചമർത്താൻ പ്രത്യേക പട്രോൾ സംഘത്തെ നിയോഗിക്കും.

ഭരണശൈലിയും വകുപ്പുകളും

സത്യപ്രതിജ്ഞയ്ക്ക് ശേഷം സെക്രട്ടേറിയറ്റിലെത്തി ചുമതലയേറ്റ വിജയ്, പൊതുഭരണം, ആഭ്യന്തരം, പോലീസ് എന്നീ നിർണ്ണായക വകുപ്പുകളാണ് കൈകാര്യം ചെയ്യുന്നത്. അഴിമതിയില്ലാത്ത കർക്കശമായ ഭരണമായിരിക്കും വരുംദിവസങ്ങളിൽ തമിഴ്‌നാട് കാണുക എന്ന സൂചനയാണ് അദ്ദേഹം നൽകുന്നത്.

സാമ്പത്തിക പ്രതിസന്ധിയും ധവളപത്രവും

സംസ്ഥാനത്തിന്റെ നിലവിലെ സാമ്പത്തിക സ്ഥിതിയെക്കുറിച്ച് ജനങ്ങളെ ബോധ്യപ്പെടുത്താൻ ഉടൻ തന്നെ ധവളപത്രം ഇറക്കുമെന്ന് മുഖ്യമന്ത്രി അറിയിച്ചു. പത്തുലക്ഷം കോടി രൂപ കടബാധ്യതയുള്ള, ഖജനാവ് കാലിയായ അവസ്ഥയിലാണ് താൻ ഉത്തരവാദിത്വം ഏറ്റെടുത്തിരിക്കുന്നതെന്ന് അദ്ദേഹം ചൂണ്ടിക്കാട്ടി. വലിയ സാമ്പത്തിക പ്രതിസന്ധികൾക്കിടയിലും ജനങ്ങൾക്ക് നൽകിയ വാഗ്ദാനങ്ങൾ പാലിച്ച് മുന്നോട്ട് പോകാനാണ് പുതിയ സർക്കാരിന്റെ തീരുമാനം.