ഗ്രൂപ്പ് തിരിഞ്ഞുള്ള പരസ്യപ്രസ്താവന അരുത് ; മുന്നറിയിപ്പുമായി മുല്ലപ്പള്ളി

കോഴിക്കോട്: തിരഞ്ഞെടുപ്പ് വിജയത്തിന്റെ തിളക്കം കെടുത്തുന്ന രീതിയിൽ ഗ്രൂപ്പ് തിരിഞ്ഞുള്ള പരസ്യപ്രസ്താവനകളും വാദങ്ങളും ഉണ്ടാകരുതെന്ന് മുൻ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ പറഞ്ഞു. ഇത്തരം നടപടികൾ പാർട്ടിയോടുള്ള അവഹേളനമാണെന്നും അദ്ദേഹം കൂട്ടിച്ചേർത്തു.

അഖിലേന്ത്യാ കോൺഗ്രസ് കമ്മിറ്റി (AICC) അടിയന്തരമായി ഇടപെട്ടുകൊണ്ട് ഇത്തരം പരസ്യപ്രസ്താവനകൾ അവസാനിപ്പിക്കണമെന്ന് അദ്ദേഹം ആവശ്യപ്പെട്ടു. പാർട്ടിക്കുള്ളിൽ പറയാനുള്ള കാര്യങ്ങളും അഭിപ്രായവ്യത്യാസങ്ങളും ബന്ധപ്പെട്ട വേദികളിലാണ് ഉന്നയിക്കേണ്ടത്.

അതുകേൾക്കാനാണ് ഹൈക്കമാൻഡ് പ്രതിനിധികൾ കേരളത്തിലെത്തുന്നത്. എന്നാൽ ഹൈക്കമാൻഡ് തീരുമാനങ്ങൾ വരുന്നതിന് മുൻപ് തന്നെ ചേരിതിരിഞ്ഞ് തെരുവിലിറങ്ങുന്നത് ആർക്ക് വേണ്ടിയായാലും ഭൂഷണമല്ലെന്നും മുല്ലപ്പള്ളി രാമചന്ദ്രൻ പ്രതികരിച്ചു.

ചിത്രം :ഫയൽകോപ്പി