അടുക്കളയിൽ പടരുന്ന തീയല്ല, ഇത് സാധാരണക്കാരന്റെ നെഞ്ചിലെ കനൽ : ദിവാകരൻ ചോമ്പാല

തെരുവിൽ പുകയുന്ന പ്രതിഷേധം വരാനിരിക്കുന്ന വലിയൊരു കൊടുങ്കാറ്റിന്റെ സൂചന

അധികാരത്തിന്റെ ശീതളമന്ദിരങ്ങളിൽ ഇരുന്നുകൊണ്ട് അക്കൗണ്ടിലെ അക്കങ്ങൾ മാറ്റിവരയ്ക്കുന്നവർ അറിയുന്നുണ്ടോ, പുറത്ത് ഒരു ജനതയുടെ അന്നം മുടങ്ങുകയാണെന്ന്? 

ഗ്യാസ് സിലിണ്ടറിന് ഒറ്റയടിക്ക് 993 രൂപ വർദ്ധിപ്പിച്ചത് വെറുമൊരു വിലവർദ്ധനവല്ല; അതൊരു ഭരണകൂട ഭീകരതയാണ്. പാവപ്പെട്ടവന്റെ വിശപ്പിന് മേൽ പതിച്ച ഇടിത്തീയാണിത്.

വിലക്കയറ്റത്തിന്റെ പൊള്ളലിൽ ഹോട്ടലുകൾ ഒന്നൊന്നായി അടഞ്ഞുതുടങ്ങുന്നു. ഇത് കേവലം ബിസിനസ് തകർച്ചയല്ല, മറിച്ച് പുറത്തുനിന്ന് ആഹാരം കഴിച്ച് വിശപ്പടക്കുന്ന ആയിരക്കണക്കിന് സാധാരണക്കാരുടെ വഴിയടയ്ക്കലാണ്. കല്യാണവീടുകളിലും പൊതുപരിപാടികളിലും രുചിയേകിയിരുന്ന കാറ്ററിംഗ് യൂണിറ്റുകൾ പ്രതിസന്ധിയിലാകുമ്പോൾ, അത് കേവലം ഒരു ചടങ്ങല്ല ഇല്ലാതാകുന്നത്; ആ മേഖലയെ വിശ്വസിച്ച് കഴിയുന്ന ലക്ഷക്കണക്കിന് തൊഴിലാളികളുടെ ഉപജീവനമാണ്.പൂട്ട് വീഴുന്ന അടുക്കളകൾ, മുടങ്ങുന്ന ആഘോഷങ്ങൾ ആംഗീകരിക്കാവുന്നതല്ല .

 ഒരു ഹോട്ടൽ പൂട്ടിയാൽ പട്ടിണിയിലാകുന്നത് മുതലാളി മാത്രമല്ല, അവിടെ പണിയെടുക്കുന്ന സപ്ലൈയറും ശുചീകരണ തൊഴിലാളിയും വരെയാണ്.

ആഘോഷങ്ങളുടെ മരണം:

കല്യാണങ്ങൾ ലളിതമാക്കാൻ നിർബന്ധിതരാകുന്നത് വഴി പന്തൽ കെട്ടുന്നവരും പാചകക്കാരും ശബ്ദസംവിധാനക്കാരും അടങ്ങുന്ന ഒരു വലിയ ശൃംഖല തന്നെ തകരുന്നു.

 ഗ്യാസ് വില താങ്ങാനാവാതെ വീണ്ടും വിറകടുപ്പുകളിലേക്ക് ജനങ്ങൾ മടങ്ങുമ്പോൾ, നാം ഇത്രകാലം പറഞ്ഞ 'പുരോഗതി'യും 'പരിസ്ഥിതി സംരക്ഷണ'വും എവിടെപ്പോയി?

പഴയ കാലത്തേക്കുള്ള പിന്മടക്കം പ്രോത്സാഹിപ്പിക്കുകയാണോ ?

പ്രതിഷേധം വെറും വാക്കുകളിലല്ല

ജനാധിപത്യ സംവിധാനത്തിൽ ജനങ്ങളുടെ കണ്ണീരിന് വിലയില്ലെങ്കിൽ, ആ ഭരണകൂടത്തിന് നിലനിൽക്കാൻ അവകാശമില്ല. സബ്‌സിഡികൾ വെട്ടിക്കുറച്ചും കോർപ്പറേറ്റുകൾക്ക് ഇളവുകൾ നൽകിയും മുന്നോട്ട് പോകുന്നവർ കാണാതെ പോകുന്നത് സാധാരണക്കാരന്റെ ഉള്ളിലെ കനലാണ്. ഈ കനൽ നാളെ വലിയൊരു തീപ്പൊരിയായി മാറും.കാട്ടുതീപോലെ വളരുമെന്നും ഉറപ്പ് ,

ഒരു കാര്യം വ്യക്തമാണ് അടുക്കള പുകയാത്ത വീട്ടിൽ സമാധാനമുണ്ടാ വില്ല. തെരുവിൽ പുകയുന്ന പ്രതിഷേധം വരാനിരിക്കുന്ന വലിയൊരു കൊടുങ്കാറ്റിന്റെ സൂചനയാണ്. ജനങ്ങളുടെ വിശപ്പിനെ വെല്ലുവിളിക്കുന്ന ഈ നയം തിരുത്തിയില്ലെങ്കിൽ, ഭരണാധികാരികൾക്ക് ചരിത്രം മാപ്പുനൽകില്ല.

അന്യായമായ ഈ ഗ്യാസ് വിലവർദ്ധനവ് അടിയന്തിരമായി പിൻവലിക്കുക! പാവപ്പെട്ടവന്റെ വയറ്റത്തടിക്കുന്ന ഈ ക്രൂരത അവസാനിപ്പിക്കുക!'

ചിത്രം : പ്രതീകാത്മകം