വേനൽച്ചൂടിലെ പൊള്ളുന്ന സത്യങ്ങൾ: ദാഹിക്കുന്ന മിണ്ടാപ്രാണികളും വഴിതെറ്റുന്ന മനുഷ്യരും :ദിവാകരൻ ചോമ്പാല

സംസ്ഥാനത്ത് വേനൽച്ചൂട് സർവ്വ റെക്കോർഡുകളും ഭേദിച്ച് മുന്നേറുകയാണ്. പാലക്കാട്ടും തൃശൂരിലും കൊല്ലത്തുമൊക്കെ താപനില 41 ഡിഗ്രിയിലേക്ക് ഉയരുമ്പോൾ, നാട് കടുത്ത ഉഷ്ണതരംഗത്തിന്റെ നിഴലിലാണ്. കണ്ണൂരിൽ സൂര്യാഘാതമേറ്റ് ഒരു യുവാവ് മരണപ്പെട്ട വാർത്ത നമ്മെ നടുക്കുന്നു. വെയിൽ ഏൽക്കരുത്, ധാരാളം വെള്ളം കുടിക്കണം എന്നൊക്കെ മനുഷ്യർക്കായി ജാഗ്രതാനിർദ്ദേശങ്ങൾ നിരന്നു കഴിഞ്ഞു. പക്ഷേ, ഒരു ചോദ്യം ബാക്കിയാവുന്നു: ഈ ആവാസവ്യവസ്ഥ മനുഷ്യർക്ക് മാത്രമുള്ളതാണോ?

ഉറുമ്പ് മുതൽ ആന വരെ നീളുന്ന എണ്ണമറ്റ ജീവജാലങ്ങൾക്കും കൂടി അവകാശപ്പെട്ടതാണ് ഈ ഭൂമി. ഇന്ന് എന്റെ അരുമപ്പൂച്ചയ്ക്ക് രാത്രി മുഴുവൻ പെഡസ്റ്റൽ ഫാനിട്ട് ഞാൻ തണുപ്പേകുമ്പോൾ, ഓർമ്മകൾ കറന്റില്ലാത്ത പഴയ കാലത്തേക്ക് പോകുന്നു. കുഞ്ഞുപ്രായത്തിൽ കവുങ്ങിൻ പാള മുറിച്ചുണ്ടാക്കിയ വിശറി കൊണ്ട് ഞങ്ങളെ വീശി തണുപ്പിച്ച് ഉറക്കിയിരുന്ന എന്റെ അച്ഛന്റെ മുഖം ഇന്നും മനസ്സിലുണ്ട്. അതൊരു പഴഞ്ചൻ കാലമെന്ന് പറഞ്ഞ് തള്ളുന്നവരോട് ഒന്നേ പറയാനുള്ളൂ—അന്ന് മനുഷ്യർക്കിടയിൽ ഇന്നില്ലാത്ത ഒരു 'മര്യാദ' ഉണ്ടായിരുന്നു. കനിവും അറിവും ഒത്തുചേർന്ന ആ കാലത്തെക്കുറിച്ച് എന്റെ ഒരു സുഹൃത്തുമായി സംസാരിച്ചപ്പോൾ അയാൾക്ക് ഈർഷ്യയാണ് തോന്നിയത്. അയാൾ ഫോൺ വെച്ചുകളഞ്ഞു. ഒരുപക്ഷേ എനിക്ക് വട്ടായിപ്പോയോ എന്ന് അദ്ദേഹം ശങ്കിച്ചിട്ടുണ്ടാകാം.

ആഭരണങ്ങളേക്കാൾ തിളക്കമുള്ള നാട്ടുമര്യാദ

പഴയകാലത്ത് ചൂടുകൂടുമ്പോൾ വീടിന്റെ ഉമ്മറക്കോലായിൽ പുല്ലുപായ വിരിച്ച് സ്ത്രീകളും കുട്ടികളും എന്തിന്, പ്രസവിച്ചു കിടക്കുന്നവർ വരെ നിർഭയം കിടന്നുറങ്ങുമായിരുന്നു. കഴുത്തിലും കയ്യിലുമുള്ള ആഭരണങ്ങൾ അവർ അഴിച്ചു വെക്കാറില്ല. ഒരു ചെറിയ മണ്ണെണ്ണ വിളക്കിന്റെ തിരി താഴ്ത്തിവെച്ച് അന്ന് അവർ ഉറങ്ങുമ്പോൾ, ആരുടെയെങ്കിലും മാല പൊട്ടിക്കാൻ ആരെങ്കിലും വരുമെന്ന പേടി അന്നുണ്ടായിരുന്നില്ല. അതായിരുന്നു അന്നത്തെ നാട്ടുമര്യാദ.

എന്നാൽ ഇന്ന്, അറിവും അതിലേറെ വിവരവും ഐടിയിൽ ബിരുദാനന്തര ബിരുദവുമുള്ള നവസമൂഹത്തിൽ എന്താണ് നടക്കുന്നത്? പകൽവെളിച്ചത്തിൽ റോഡിലൂടെ നടന്നുപോകുന്ന വീട്ടമ്മയുടെ അഞ്ചുപവൻ മാല ബൈക്കിലെത്തി പൊട്ടിച്ചു കടന്നുകളയുന്ന പെരുംകള്ളന്മാരെ പിടിക്കാൻ സിസിടിവി ദൃശ്യങ്ങൾ അരിച്ചുപെറുക്കേണ്ടി വരുന്നു. ഈ ചൂടുകാലത്ത് വീടിനു പുറത്തോ ടെറസിലോ കിടന്നുറങ്ങുന്നവർ അണലിയേക്കാൾ പേടിക്കേണ്ടത് ഇത്തരക്കാരെയാണ്—വിദ്യാസമ്പന്നരെന്നു നടിക്കുന്ന, മേലനങ്ങാതെ തട്ടിപ്പറിച്ച് തിന്നു ശീലിച്ച ഇക്കൂട്ടരെ!

ദാഹം കടിച്ചുകീറുന്ന പ്ലാസ്റ്റിക് ഹോസുകൾ

നമ്മുടെ വീട്ടിൽ ഫ്രിഡ്ജുണ്ട്, എസിയുണ്ട്, തണുത്ത വെള്ളമുണ്ട്. പക്ഷേ ഒന്നു പുറത്തെ പറമ്പിലേക്ക് നോക്കൂ. കഴിഞ്ഞ കുറച്ചു ദിവസങ്ങളായി എന്റെ പറമ്പിലെ പ്ലാസ്റ്റിക് ഹോസ് പലയിടത്തും കടിച്ചുകീറിയ നിലയിലായിരുന്നു. അത് ശരിയാക്കിയാലും വീണ്ടും ആവർത്തിച്ചു. ഒടുവിൽ ഞാൻ തിരിച്ചറിഞ്ഞു—ദാഹജലത്തിനായി പിടയുന്ന ഏതോ ഉടുമ്പോ കീരിയോ മുള്ളൻ പന്നിയോ ആണത് ചെയ്യുന്നത്. ഒരു തുള്ളി ജലത്തിന് വേണ്ടി ആ ജീവികൾ ആ ഹോസ് കടിച്ചു കീറുന്നതിലെ വേദന നാം തിരിച്ചറിയണം. നമ്മൾ ഉപദ്രവിക്കാത്തതുകൊണ്ടാവാം, വലിയ ഉടുമ്പുകൾക്കും കുഞ്ഞുങ്ങൾക്കും നമ്മളെ ഭയമില്ല. എന്തിനു ഞങ്ങളുടെ വളർത്തുപൂച്ചയും ഉടുമ്പും അടുത്തടുത്ത് ഇരുന്നാലും ശണ്ഠകൂടാറില്ല, അല്പം അകലം പാലിക്കുമെന്ന് മാത്രം.

അവർക്കായി രാത്രിയിൽ അടുക്കളയിൽ മിച്ചംവരുന്ന ഭക്ഷണവും പറമ്പിന്റെ ഒരു വശത്ത് വലിയ ബേസിനിൽ വെള്ളവും ഞാൻ കരുതാറുണ്ട്. ദിവസവും ആ പാത്രത്തിലെ വെള്ളം കുറയുന്നത് കാണുമ്പോൾ മനസ്സിലൊരു സുഖമുണ്ട്. അത് ഞാൻ മരിച്ചു ചെന്നാൽ സ്വർഗ്ഗത്തിൽ എസി റൂം കിട്ടാനല്ല, മറിച്ച് ജീവിക്കുന്ന കാലത്ത് നമ്മളെക്കൊണ്ടാവുന്ന നന്മ ചെയ്യാനാണ്.

അച്ഛൻ പഠിപ്പിച്ച വലിയ പാഠം

മൂന്നാം ക്ലാസ്സിൽ പഠിക്കുമ്പോൾ അച്ഛൻ എന്നെ പഠിപ്പിച്ച ഒരു ശീലമുണ്ട്. പാടവരമ്പിലൂടെ നടക്കുമ്പോൾ പശുക്കളുടെ കയർ എവിടെയെങ്കിലും കുരുങ്ങിക്കിടക്കുന്നത് കണ്ടാൽ അത് അഴിച്ചുവിട്ടു മാത്രമേ അച്ഛൻ മുന്നോട്ട് പോകുമായിരുന്നുള്ളൂ. ഇടവഴികളിലെ കുപ്പിച്ചില്ലുകൾ കണ്ണിൽപ്പെട്ടാൽ അത് പെറുക്കി മാറ്റാൻ എന്നെക്കൊണ്ട് ചെയ്യിപ്പിക്കുമായിരുന്നു. അത്തരം ചെറിയ കാര്യങ്ങളിലൂടെയാണ് കരുണ എന്താണെന്ന് ഞാൻ പഠിച്ചത്.

നമ്മുടെ ഇളംതലമുറയ്ക്ക് ഇതൊരു പാഠമാകട്ടെ. ഈ കഠിനമായ ചൂടിൽ നമ്മുടെ പറമ്പിലും ടെറസിലും ഒരു പാത്രം വെള്ളം വെക്കാം. പറ്റുമെങ്കിൽ ഒന്നുരണ്ട് മീറ്റർ പൊളിത്തീൻ ഷീറ്റ് വാങ്ങി അല്പം മണ്ണ് മാറ്റി വിരിച്ച് അതിൽ വെള്ളം നിറച്ചാൽ കുഞ്ഞു കിളികൾക്കും പറവകൾക്കും ചിറകടിച്ചുകുളിക്കാനാകും.

പുതിയ കാലത്തെ ജാഗ്രത

ചൂടിനെ പ്രതിരോധിക്കാൻ ജനലുകളും വാതിലുകളും തുറന്നിട്ട് ഉറങ്ങുമ്പോൾ മറ്റൊരു കാര്യം കൂടി ഓർക്കുക. പുറത്തെ കടുത്ത ചൂടിൽ നിന്നും തണുപ്പ് തേടി പാമ്പുകളെപ്പോലെയുള്ള ഇഴജന്തുക്കൾ നിങ്ങളുടെ അകത്തളങ്ങളിലേക്ക് എത്താൻ സാധ്യതയുണ്ട്. ചൂട് കൂടുമ്പോൾ വീടിന് പുറത്ത് വിശ്രമിക്കുന്നവർ കള്ളന്മാരുടെ കാര്യത്തിലും ഇഴജന്തുക്കളുടെ കാര്യത്തിലും ഒരുപോലെ ജാഗ്രത പാലിക്കുക.

മനുഷ്യനോടും പ്രകൃതിയോടും ഒരുപോലെ നീതി പുലർത്താൻ നമുക്ക് സാധിക്കണം. ഈ ചുട്ടുപൊള്ളുന്ന കാലത്ത് നമുക്ക് ചുറ്റുമുള്ള ജീവജാലങ്ങളുടെ ദാഹം കൂടി കാണാനുള്ള കണ്ണ് നമുക്കുണ്ടാകട്ടെ. മനുഷ്യത്വത്തിന് ചൂടേൽക്കാത്ത ഒരു നല്ല കാലത്തിനായി നമുക്ക് കാത്തിരിക്കാം.

ചിത്രം :പ്രതീകാത്മകം