ആറ്റുകാൽ പൊങ്കാല: പ്രപഞ്ചശക്തിയുടെയും വാസ്തു ഊർജ്ജത്തിന്റെയും സംഗമം :വാസ്‌തു ഗുരു ഡോ .നിശാന്ത് തോപ്പിൽ

ഭാരതീയ സംസ്കാരത്തിൽ ആചാരങ്ങളും അനുഷ്ഠാനങ്ങളും കേവലം വിശ്വാസങ്ങൾ മാത്രമല്ല, അവ കൃത്യമായ ശാസ്ത്രീയ അടിത്തറയുള്ളവയുമാണ്.

ലോകത്തിലെ ഏറ്റവും വലിയ സ്ത്രീസംഗമമായ ആറ്റുകാൽ പൊങ്കാല, വാസ്തുശാസ്ത്രപരമായും പ്രപഞ്ചോർജ്ജ (Cosmic Energy) വിതരണ രീതിയാലും ഏറെ സവിശേഷതകൾ നിറഞ്ഞതാണ്.

 ഒരു വീടിന്റെയോ ക്ഷേത്രത്തിന്റെയോ വാസ്തുക്രമീകരണം എങ്ങനെയാണോ അവിടെ വസിക്കുന്നവർക്ക് ഗുണകരമാകുന്നത്, അതുപോലെതന്നെ വിപുലമായ ഒരു ജനതയെ സ്വാധീനിക്കുന്ന 'നഗര വാസ്തു'വിന്റേയും (Urban Vastu) ഊർജ്ജതന്ത്രത്തിന്റേയും ഉത്തമ ഉദാഹരണമാണ് ഈ പുണ്യകർമ്മം.

 പഞ്ചഭൂതങ്ങളുടെ സമന്വയം

വാസ്തുശാസ്ത്രം അടിസ്ഥാനപ്പെട്ടിരിക്കുന്നത് ആകാശം, വായു, അഗ്നി, ജലം, ഭൂമി എന്നീ പഞ്ചഭൂതങ്ങളിലാണ്. പൊങ്കാല സമർപ്പണത്തിൽ ഈ അഞ്ച് തത്വങ്ങളും കൃത്യമായി സംഗമിക്കുന്നു:

ഭൂമി:മൺകുടങ്ങ ളും തറയിൽ ഒരുക്കുന്ന അടുപ്പും.

ജലം: നിവേദ്യം തയ്യാറാക്കാൻ ഉപയോഗിക്കുന്ന പരിശുദ്ധമായ ജലം.

അഗ്നി: അടുപ്പിൽ ജ്വലിക്കുന്ന പവിത്രമായ ജ്വാല.

വായു: അന്തരീക്ഷത്തിൽ പടരുന്ന ചന്ദനത്തിരിയുടെയും കർപ്പൂരത്തിന്റെയും സുഗന്ധം.

ആകാശം: തുറസ്സായ സ്ഥലത്ത് ആകാശത്തിന് കീഴെ നടത്തുന്ന ഈ കർമ്മം പ്രപഞ്ചശക്തിയെ നേരിട്ട് ആവാഹിക്കുന്നു.

ഈ പഞ്ചഭൂതങ്ങൾ ഒരേസമയം ലക്ഷക്കണക്കിന് കേന്ദ്രങ്ങളിൽ (അടുപ്പുകളിൽ) സമന്വയിക്കപ്പെടുമ്പോൾ ആ പ്രദേശത്തെ നെഗറ്റീവ് ഊർജ്ജം നശിക്കുകയും പോസിറ്റീവ് ഊർജ്ജം നിറയുകയും ചെയ്യുന്നു.

അഗ്നികോണും ഊർജ്ജ പ്രവാഹവും

വാസ്തുശാസ്ത്രമനുസരിച്ച് അടുക്കളയുടെയും അഗ്നിസംബന്ധമായ കാര്യങ്ങളുടെയും സ്ഥാനം അഗ്നികോണിലാണ് (തെക്ക്-കിഴക്ക്). ആറ്റുകാൽ ക്ഷേത്രത്തെ കേന്ദ്രബിന്ദുവാക്കി സങ്കൽപ്പിച്ചാൽ, തിരുവനന്തപുരം നഗരമാകെ ഒരു വലിയ 'യാഗശാല'യായി മാറുന്നു. ലക്ഷക്കണക്കിന് സ്ത്രീകൾ ഒരേസമയം അഗ്നി ജ്വലിപ്പിക്കുമ്പോൾ അത് ഭൂമിയിലെ താപനിലയെക്കാൾ ഉപരിയായി പ്രാണോർജ്ജത്തിന്റെ (Prana Energy) ഒരു വലിയ വലയം സൃഷ്ടിക്കുന്നു. ഇത് വ്യക്തികളുടെ മാനസികവും ശാരീരികവുമായ ആന്തരിക ശുദ്ധീകരണത്തിന് സഹായിക്കുന്നു.

ഈ കർമ്മം വർഷത്തിൽ ഒരിക്കൽ വെടിക്കെട്ട് നടത്തുന്നതിലും ഉജ്വലവും അതിലേറെ ശാസ്ത്രീയവുമാണ് .

ഒരുവർഷമായി നഗരത്തിൽ തങ്ങിനിൽക്കുന്ന അശുദ്ധവായുവിനെ ലക്ഷക്കണക്കിന് അടുപ്പുകളിൽനിന്നും ഉയരുന്ന അഗ്നിജ്വാലകൾ ഒരു വർഷമായി നഗരപ്രാന്തത്തിൽ തങ്ങിനിൽക്കുന്ന അശുദ്ധവായുവിനെ ചൂട് പിടിപ്പിച്ച് മുകളിലേയ്ക്ക് അയക്കുമ്പോൾ ശുദ്ധവായു നഗരത്തിൽ പ്രവഹിക്കുന്നു

സ്ത്രീശക്തിയും വാസ്തുപുരുഷനും

വാസ്തുശാസ്ത്രത്തിൽ പ്രകൃതിയെ സ്ത്രീയായും പുരുഷനെ ചൈതന്യമായും കണക്കാക്കുന്നു. ആറ്റുകാൽ ദേവി പ്രകൃതിസ്വരൂപിണിയാണ്. ലക്ഷക്കണക്കിന് സ്ത്രീകൾ ഭക്തിയോടെ നടത്തുന്ന ഈ അനുഷ്ഠാനം ഭൂമിദേവിക്ക് നൽകുന്ന ആദരവ് കൂടിയാണ്. ഭൂമിയിലെ ഊർജ്ജ കേന്ദ്രങ്ങളെ (Marma Points) ഉത്തേജിപ്പിക്കാൻ ഇത്തരം കൂട്ടായ പ്രാർത്ഥനകൾക്ക് സാധിക്കുമെന്ന് വാസ്തുതത്വം അടിവരയിടുന്നു.