സ്വർണ്ണപ്പൊൻവെയിൽ പോലെ പൂത്തുലഞ്ഞ മാവുകൾ: :ദിവാകരൻ ചോമ്പാല

സ്വർണ്ണപ്പൊൻവെയിൽ പോലെ

പൂത്തുലഞ്ഞ മാവുകൾ:

:ദിവാകരൻ ചോമ്പാല

കല്ലാമലയിലെ കോവിക്കൽ കടവിനെ തഴുകിവരുന്ന കാറ്റിന് ഇന്ന് മാമ്പൂവിന്റെ ഗന്ധമാണ്.

കടവ് റിസോർട്ടിന്റെ മുറ്റത്ത്, ഒരു പട്ടുടുത്തെ പെണ്ണിനെപ്പോലെ പൂത്തുലഞ്ഞു നിൽക്കുകയാണ് ഈ നാ ട്ടുമാവ്. 50 വർഷങ്ങൾക്ക് കോവുക്കൽ കടവിലെ കച്ചവടക്കാരൻ വി .എം .ദാമോദരനാണത്രെ ഒരു കുഞ്ഞു മാവിൻ തൈ ഈ പുഴയിറമ്പിൽ നാട്ടുനനച്ചുവളർത്തിയത് .

മഞ്ഞുതുള്ളികൾ ഇറ്റുവീണ മാമ്പൂങ്കുലകൾക്കിടയിലൂടെ അരിച്ചെത്തുന്ന സൂര്യപ്രകാശം ഈ റിസോർട്ടിൻറെ മുറ്റത്ത് കളം വരയ്ക്കുമ്പോൾ, അതൊരു കവിതപോലെ പോലെ മനോഹരം .

ഈ പൂമണം വെറുമൊരു മണമല്ല; അത് ഗൃഹാതുരത്വത്തിന്റെ മണമാണ്. ഈ മണം തേടി വരുന്ന കുഞ്ഞുറുമ്പുകളും വണ്ടുകളും നമ്മുടെ ബാല്യകാലത്തിന്റെ ഓർമ്മകളിലേക്കുള്ള വഴികാട്ടികളാണ്.

കേരളത്തിന്റെ ആകാശങ്ങളിൽ ഇത്തവണ മാമ്പൂക്കളുടെ സുഗന്ധമാണ്. മുറ്റത്തെ നാട്ടുമാവുകൾ മുതൽ തോട്ടങ്ങളിലെ വർണ്ണവൈവിധ്യമുള്ള ഒട്ടു മാവുകൾ വരെ ചരിത്രത്തിലില്ലാത്ത വിധം പൂത്തുലഞ്ഞു നിൽക്കുന്നു. "എന്തുകൊണ്ടാണ് ഇത്തവണ ഇത്രയധികം മാവുകൾ പൂത്തത്?" എന്ന ചോദ്യത്തിന് ഉത്തരമായി ലളിതമായ ചില കൃഷിശാസ്ത്ര രഹസ്യങ്ങൾ പങ്കുവെച്ചത് ഓയിൽപാം ഇന്ത്യ ലിമിറ്റഡിൽ നിന്നും വിരമിച്ച കാർഷികവിദഗ്ധനും എൻ്റെ മാന്യസുഹൃത്തുമായ എസ്.തങ്കപ്പൻ. കൊല്ലം ജില്ല

കാലാവസ്ഥയുടെ വിസ്മയക്കൂട്ട്

മാവുകൾ പൂവിടുന്നതിന് താപനിലയിലെ വ്യതിയാനം അഥവാ 'Temperature Variation' വലിയ പങ്കുവഹിക്കുന്നു. സാധാരണഗതിയിൽ മാവിന് പൂവിടാൻ 2 മുതൽ 4 ആഴ്ച വരെ നീളുന്ന ചെറിയൊരു വരൾച്ചയോ തണുപ്പോ ആവശ്യമാ ണ്.

ഇത്തവണ നവംബർ, ഡിസംബർ മാസങ്ങളിൽ കേരളത്തിൽ ലഭിച്ച മിതമായ തണുപ്പും രാത്രികാലങ്ങളിലെ താഴ്ന്ന താപനിലയും (15°C - 20°C) മാമ്പൂക്കളുടെ മുകുളങ്ങൾ വിരിയാൻ വളരെയധികം സഹായിച്ചു. ദീർഘിച്ച ഈ തണുപ്പുകാലമാണ് ഈ വിസ്മയക്കാഴ്ചയ്ക്ക് ആക്കം കൂട്ടിയത്.

ഹോർമോണുകളും അന്നജവും

മാവിലുകളിൽ പാകം ചെയ്യപ്പെടുന്ന അന്നജം ശാഖകളിൽ ശേഖരിക്കപ്പെടുന്നു. മണ്ണിൽ ഈർപ്പം കുറയുന്ന സമയത്ത് വേരുകൾ വഴിയുള്ള നൈട്രജൻ ആഗിരണം കുറയുകയും ഇലകളിലെ കാർബൺ അളവ് കൂടുകയും ചെയ്യുന്നു.

ശാസ്ത്രീയമായി ഇതിനെ C:N Ratio (Carbon-Nitrogen Ratio) എന്ന് വിളിക്കുന്നു. ഈ അനുപാതം കൃത്യമായ അളവിലെത്തുമ്പോഴാണ് മാവ് പൂവിടാൻ തയ്യാറെടുക്കുന്നത്. ഒപ്പം സസ്യങ്ങളിലെ 'ഫ്ലോറിജൻ' (Florigen) എന്ന ഹോർമോൺ ഉത്പാദനം കൂടുന്നതും ഇത്തവണത്തെ അമിത പുഷ്പിക്കലിന് പിന്നിലെ രാസരഹസ്യമാണ്.

അതിജീവനത്തിന്റെ 'സർവൈവൽ മോഡ്'

സസ്യശാസ്ത്രമനുസരിച്ച്, ഏതൊരു ജീവിയും താൻ നേരിടുന്ന പ്രതിസന്ധികളെ (വരൾച്ച അല്ലെങ്കിൽ കാലാവസ്ഥാ വ്യതിയാനം) അതിജീവിക്കാനായി വംശവർദ്ധനവ് വേഗത്തിലാക്കും. കഴിഞ്ഞ കുറച്ചു വർഷങ്ങളിലെ അസ്ഥിരമായ മഴയും കാലാവസ്ഥാ വ്യതിയാനവും മാവുകളെ ഒരു 'Survival Mode'-ലേക്ക് എത്തിച്ചു. തങ്ങളുടെ വംശം നിലനിർത്താനായി കൂടുതൽ വിത്തുകൾ (മാങ്ങകൾ) ഉത്പാദിപ്പിക്കാനുള്ള മരങ്ങളുടെ ഈ വെമ്പലാണ് പൂക്കളുടെ ബാഹുല്യമായി നാം കാണുന്നത്.

പൂക്കൾ മാങ്ങകളായി മാറാൻ: കർഷകർ ശ്രദ്ധിക്കാൻ

വിരിഞ്ഞ പൂക്കൾ കൊഴിയാതെയും കരിയാതെയും മാങ്ങകളാക്കി മാറ്റാൻ ചില കരുതൽ നടപടികൾ ആവശ്യമാണ്:

മിതമായ നന:

മാങ്ങകൾ കടലമണിയോളം വലിപ്പമാകുമ്പോൾ വൈകുന്നേരങ്ങളിൽ നേരിയ രീതിയിൽ നനച്ചു തുടങ്ങാം. ഇത് 'ഫ്രൂട്ട് ഡ്രോപ്പ്' അഥവാ മാങ്ങ കൊഴിച്ചിൽ തടയാൻ സഹായിക്കും.

മിത്രകീടങ്ങളുടെ സംരക്ഷണം: പൂക്കുന്ന സമയത്ത് കടുത്ത രാസകീടനാശിനികൾ ഒഴിവാക്കുക. ഇത് പരാഗണം നടത്തുന്ന തേനീച്ചകളെയും മറ്റ് പ്രാണികളെയും സംരക്ഷിക്കും. എന്നാൽ പൂപ്പൽ ബാധ (Powdery Mildew), തുള്ളൻ എന്ന കീടം (Mango Hopper) എന്നിവയെ ശ്രദ്ധിക്കുകയും ആവശ്യമായ ജൈവനിയന്ത്രണങ്ങൾ സ്വീകരിക്കുകയും വേണം.

സൂക്ഷ്മ മൂലകങ്ങൾ: പൂക്കൾ മാങ്ങകളായി ഉറയ്ക്കാൻ ബോറോൺ (Boron) പോലുള്ള സൂക്ഷ്മ മൂലകങ്ങൾ അടങ്ങിയ ലായനികൾ കൃത്യമായ അളവിൽ തളിക്കുന്നത് വിളവർദ്ധനവിന് ഗുണകരമാണ്.

പൂത്തുലഞ്ഞ വസന്തം പോലെ 

കല്ലാമല കോവുക്കൽ കടവിലെ ദൃശ്യചാരുത...

വീഡിയോ കണ്ടാലും ...

https://www.youtube.com/watch?v=n-K91Voe3gU