പത്മനാഭപുരിയിൽ ലക്ഷദീപപ്രഭ: മുറജപത്തിന് നാളെ ഭക്തിനിർഭരമായ സമാപനം.

തിരുവിതാംകൂർ ഭരണാധികാരിയായിരുന്ന അനിഴം തിരുനാൾ മാർത്താണ്ഡവർമ്മ മഹാരാജാവാണ് 1750-ൽ മുറജപം ആരംഭിച്ചത്. ആറു വർഷത്തിലൊരിക്കലാണ് ഈ ചടങ്ങ് നടക്കുന്നത്. ഋഗ്വേദം, യജുർവേദം, സാമവേദം എന്നീ മൂന്നു വേദങ്ങളും എട്ടു ദിവസത്തെ ഓരോ 'മുറ'യായി (ഘട്ടം) 56 ദിവസം കൊണ്ട് ജപിച്ച് തീർക്കുന്നതിനാലാണ് ഇതിനെ മുറജപം എന്ന് വിളിക്കുന്നത്.

​രാജ്യത്തിന്റെ ഐശ്വര്യത്തിനും ലോകസമാധാനത്തിനുമായി നടത്തുന്ന ഈ മഹായാഗത്തിന്റെ സമാപനമാണ് ലക്ഷദീപം. ക്ഷേത്രത്തിനുള്ളിലെ പദ്മതീർത്ഥക്കരയിലും ഗോപുരങ്ങളിലും മാടവിളക്കുകളിലും ലക്ഷക്കണക്കിന് എണ്ണവിളക്കുകൾ തെളിയിക്കുമ്പോൾ ക്ഷേത്രം ഒരു സ്വർണ്ണകപ്പൽ പോലെ പ്രകാശിക്കുമെന്നാണ് വിശ്വാസം.

  ​ലോകത്തിലെ ഏറ്റവും ധന്യമായ ക്ഷേത്രങ്ങളിലൊന്നായ ശ്രീപദ്മനാഭസ്വാമി ക്ഷേത്രത്തിന് പിന്നിൽ വിൽവമംഗലം സ്വാമിയാരുമായി ബന്ധപ്പെട്ട ഐതിഹ്യമാണുള്ളത്. സ്വാമിയാർക്ക് മുന്നിൽ കുസൃതി കാട്ടിയ ബാലരൂപത്തിലുള്ള ഭഗവാൻ, അദ്ദേഹം ദേഷ്യപ്പെട്ടപ്പോൾ അപ്രത്യക്ഷനായി. തുടർന്ന് ഭഗവാനെ തിരഞ്ഞുപോയ സ്വാമിയാർ അനന്തൻകാട് എന്ന സ്ഥലത്ത് ഒരു ഇലഞ്ഞിമരം കടപുഴകി വീഴുന്നതും അത് ഭഗവാന്റെ രൂപമായി മാറുന്നതും കണ്ടു. ആ ഭീമാകാരമായ രൂപം ഉൾക്കൊള്ളാൻ കഴിയാത്തതിനാൽ സ്വാമിയാർ അപേക്ഷിച്ചതനുസരിച്ച് ഭഗവാൻ മൂന്നു ഭാഗങ്ങളിലായി ദർശനം നൽകത്തക്ക രീതിയിൽ കുടിയിരുത്തപ്പെട്ടു എന്നാണ് ചരിത്രം.

​ 

  ​നാളെ വൈകിട്ട് 5 മണി മുതൽ ബാർകോഡ് പാസ്സുള്ള ഭക്തരെ ക്ഷേത്രത്തിനുള്ളിലേക്ക് പ്രവേശിപ്പിച്ചു തുടങ്ങും. സുരക്ഷാ ക്രമീകരണങ്ങളുടെ ഭാഗമായി നിയന്ത്രണങ്ങൾ ഏർപ്പെടുത്തിയിട്ടുണ്ട്.

​  പുത്തരിക്കണ്ടം മൈതാനം, ഫോർട്ട് ഹൈസ്കൂൾ, വാഴപ്പള്ളി ഗ്രൗണ്ട് എന്നിവിടങ്ങളിൽ വാഹനങ്ങൾ പാർക്ക് ചെയ്യാം.

​  പാസ്സുള്ള വാഹനങ്ങൾക്ക് മാത്രമേ കോട്ടയ്ക്കുള്ളിലേക്ക് പ്രവേശനം അനുവദിക്കൂ.

​ദീപപ്രഭയിൽ കുളിച്ചുനിൽക്കുന്ന പത്മനാഭനെ ദർശിക്കാൻ കാത്തിരിക്കുന്ന ഭക്തർക്ക് ഈ ലക്ഷദീപം സായൂജ്യത്തിന്റെ നിമിഷങ്ങളാണ് സമ്മാനിക്കുന്നത്.

 ബിജു കാരക്കോണം.