ചിന്താവിഷ്ടയായ ഷർമിള ;ശ്രീനിവാസനും തലശ്ശേരിയിലെ ആ ഓർഗാനിക് ഗന്ധവും അനുഭവക്കുറിപ്പ് : പി. ഷർമിള

ഭക്ഷ്യശ്രീയുടെ വിത്തുകൾ പാകിയ സൗഹൃദങ്ങൾ

തലശ്ശേരിയിൽ മായം കലരാത്ത വെളിച്ചെണ്ണയും മില്ലറ്റുകളും മറ്റു ഭക്ഷ്യ ഉൽപ്പന്നങ്ങളും വിതരണം ചെയ്യാനായി തുടങ്ങിയ ആ ഓർഗാനിക് ഷോപ്പ് വെറുമൊരു കച്ചവടമായിരുന്നില്ല. അത് ഒരു വലിയ സാംസ്കാരിക കൂട്ടായ്മയുടെ കേന്ദ്രമായിരുന്നു. കൊറോണ എന്ന മഹാമാരി ആ കടയെ കൊണ്ടുപോയെങ്കിലും, അത് എനിക്ക് സമ്മാനിച്ചത് വിലമതിക്കാനാവാത്ത ഒരുപാട് സൗഹൃദങ്ങളാണ്.

ശ്രീനിവാസൻ എന്ന മഹാനടൻ മാത്രമല്ല, ആ കടയുടെ പടികയറി വന്നത് പ്രമുഖരായ എത്രയോ പേരാണ്! പ്രശസ്ത ഛായാഗ്രാഹകൻ എസ്. കുമാർ (S. Kumar), സംവിധായകൻ ലാൽജോസ്, ചൈത്ര തെരേസ ജോൺ ഐ.പി.എസ്, യുനെസ്കോ അവാർഡ് ജേതാവായ ചിത്രകാരൻ, ശില്പികൾ, ജഡ്ജിമാർ, ഡോക്ടർമാർ... സിനിമാ സെറ്റുകളിലേക്കും ബിജു മേനോനെ പോലുള്ള താരങ്ങൾക്കും ശുദ്ധമായ ഭക്ഷണസാധനങ്ങൾ എത്തിച്ചു നൽകിയ ആ ദിനങ്ങൾ ഒരു സ്വപ്നം പോലെ ഇന്നും തെളിഞ്ഞു നിൽക്കുന്നു.

"ശുദ്ധമായ ഭക്ഷണം ജന്മാവകാശം"

ശ്രീനിവാസൻ എന്നും സംസാരിച്ചിരുന്നത് മണ്ണിനെക്കുറിച്ചും വിഷമില്ലാത്ത ഭക്ഷണത്തെക്കുറിച്ചും ആയിരുന്നു. ആ ചിന്ത തന്നെയാണ് 'ഭക്ഷ്യശ്രീ' എന്ന ആശയത്തിന് ഡോ .കെ .കെ .എൻ കുറുപ്പിനും ,വടകരയിലെ ടി .ശ്രീനിവാസനും ,ദിവാകരൻ  ചോമ്പാലയും അടങ്ങുന്ന  ഒരുവലിയ കൂട്ടായ്‌മക്കൊപ്പം  എനിക്കും  കരുത്തേകുന്നത്.

ഇന്ന് നാം കഴിക്കുന്ന പച്ചക്കറികളിലെ രാസമാലിന്യങ്ങളും, മീനിലെ ഫോർമാലിനും, കാർബൈഡ് വെച്ച് പഴുപ്പിച്ച മാങ്ങകളും നമ്മുടെ തലമുറയെ കാർന്നു തിന്നുകയാണ്. ആരോഗ്യരംഗത്തെ മേലാളന്മാർ ഇതൊന്നും കണ്ടില്ലെന്ന് നടിക്കുമ്പോൾ, ജനങ്ങൾ സ്വയം സംഘടിക്കേണ്ട കാലം അതിക്രമിച്ചിരിക്കുന്നു.

തലശ്ശേരിയിലെ ജനങ്ങൾക്കിടയിൽ ശുദ്ധമായ ഭക്ഷ്യ ഉൽപ്പന്നങ്ങൾ എത്തിക്കാൻ കഴിഞ്ഞു എന്നത് എന്റെ ജീവിതത്തിലെ വലിയൊരു നിയോഗമായാണ് ഞാൻ കാണുന്നത്. ബിസിനസ്സിനപ്പുറം ഒരു സാമൂഹിക ഉത്തരവാദിത്തമായി മായം കലരാത്ത ഭക്ഷണത്തിനായുള്ള പോരാട്ടം തുടരേണ്ടതുണ്ട്.

"ശുദ്ധമായ ഭക്ഷണം ജന്മാവകാശം" എന്ന വലിയ പാഠമാണ് നടൻ ശ്രീനിവാസൻ എപ്പോഴും സമൂഹത്തിന് നൽകിയത്. ഇന്ന് നമ്മുടെ അടുക്കളകളിൽ വിഷം വിളമ്പുന്ന അധികാരികളുടെ മൗനത്തിനിടയിൽ, 'ഭക്ഷ്യശ്രീ' പോലുള്ള കൂട്ടായ്മകൾ അനിവാര്യമായിരിക്കുന്നു. മായം ചേർത്ത ഭക്ഷണത്തിനെതിരെ നാം സംഘടിക്കേണ്ടിയിരിക്കുന്നു.

ബാക്കിയാകുന്നത് നന്മയുടെ മണം

എസ്. കുമാർ സാർ ഒരിക്കൽ പറഞ്ഞത് ഇന്നും ഓർക്കുന്നു: "തലശ്ശേരിക്കാർ ഇത്ര ആതിഥ്യമര്യാദയുള്ളവരാണെന്ന് ഇപ്പോഴാണ് മനസ്സിലായത്." അതെ, സ്നേഹവും സത്യസന്ധതയും കലർന്ന ഭക്ഷണത്തിന് ഒരു പ്രത്യേക രുചിയുണ്ട്. ശ്രീനിവാസന്റെ വിയോഗം സൃഷ്ടിച്ച ശൂന്യതയിൽ നിൽക്കുമ്പോഴും, അദ്ദേഹം പകർന്നു നൽകിയ ആ വലിയ സന്ദേശം കൂടെയുണ്ട്—നമ്മുടെ മണ്ണും ഭക്ഷണവും ശുദ്ധമായിരിക്കണം.

വിമലേച്ചിയെ നേരിട്ട് കണ്ട് അനുശോചനം അറിയിക്കണം. തിരക്കുകൾ ഒഴിഞ്ഞ ഒരു നേരം അതിനായി കാത്തിരിക്കുന്നു. ശ്രീനിവാസൻ എന്ന പ്രതിഭ യാത്രയാകുമ്പോൾ, അദ്ദേഹം ആഗ്രഹിച്ചതുപോലെ വിഷമില്ലാത്ത ഒരു കേരളത്തിനായി കൈകോർക്കുക എന്നതാണ് അദ്ദേഹത്തിന് നൽകാവുന്ന ഏറ്റവും വലിയ ആദരം.

ചിത്രം :ഹരിതാമൃതം വടകര 

ടി .ശ്രീനിവാസൻ 

ചിത്രം :ഹരിതാമൃതം വടകര 

വിഷരഹിത നാളേയ്ക്കായി വടകര ഒരുങ്ങുന്നു; 'ഹരിതാമൃതം-2026' സംഘാടക സമിതി യോഗം വെള്ളിയാഴ്ച

വടകര: "വിഷരഹിത ഭക്ഷണം, ആരോഗ്യമുള്ള തലമുറ" എന്ന സന്ദേശവുമായി വടകരയുടെ മണ്ണിൽ പതിനഞ്ചു വർഷമായി ജൈവസംസ്കൃതിയുടെ വിത്തുപാകുന്ന 'ഹരിതാമൃതം' കാർഷിക മേള പതിനാറാം വർഷത്തിലേക്ക്. മഹാത്മ ദേശസേവ എഡ്യുക്കേഷണൽ & ചാരിറ്റബിൾ ട്രസ്റ്റിന്റെ നേതൃത്വത്തിൽ സംഘടിപ്പിക്കുന്ന 'ഹരിതാമൃതം-2026'ന്റെ വിപുലമായ നടത്തിപ്പിനായി രൂപീകരിക്കുന്ന സംഘാടക സമിതി യോഗം ഡിസംബർ 26 വെള്ളിയാഴ്ച നടക്കും.

വടകര ബി.ഇ.എം ഹൈസ്കൂളിൽ വൈകുന്നേരം 4 മണിക്ക് ചേരുന്ന യോഗത്തിൽ രാഷ്ട്രീയ-സാമൂഹിക-സാംസ്കാരിക രംഗത്തെ പ്രമുഖർ പങ്കെടുക്കും. 2010 മുതൽ ലാഭേച്ഛയില്ലാതെ പ്രവർത്തിക്കുന്ന ഈ ജനകീയ കൂട്ടായ്മ, പരമ്പരാഗത കൃഷി അറിവുകൾ വരുംതലമുറയ്ക്ക് കൈമാറുന്നതിനൊപ്പം ജൈവകർഷകർക്കും കുടിൽ വ്യവസായികൾക്കും വിപണന സാധ്യതകൾ ഒരുക്കുന്നതിലും വലിയ പങ്കുവഹിക്കുന്നുണ്ട്.

മണ്ണും മനസ്സും മലിനമാകുന്ന ഇക്കാലത്ത്, പ്രകൃതിയിലേക്കൊരു മടക്കയാത്രയാണ് ഹരിതാമൃതത്തിലൂടെ ലക്ഷ്യമിടുന്നതെന്ന് ട്രസ്റ്റ് ചെയർമാൻ ടി. ശ്രീനിവാസൻ അറിയിച്ചു. ജൈവകർഷകർ, പരമ്പരാഗത ചികിത്സകർ, കൈത്തറി-കുടിൽ വ്യവസായികൾ തുടങ്ങിയവരുടെ പങ്കാളിത്തം ഉറപ്പാക്കിക്കൊണ്ട് കൂടുതൽ വിപുലമായ പരിപാടികളാണ് ഇത്തവണ ആസൂത്രണം ചെയ്യുന്നത്.

മേളയിൽ സ്റ്റാളുകൾ ബുക്ക് ചെയ്യാൻ താല്പര്യമുള്ള ജൈവകർഷകരും സംരംഭകരും 9446834605 എന്ന നമ്പറിൽ ബന്ധപ്പെടേണ്ടതാണ്. പരിപാടിയുടെ വിജയത്തിനായി എല്ലാ സഹൃദയരും വെള്ളിയാഴ്ച ചേരുന്ന സംഘാടക സമിതി യോഗത്തിൽ എത്തിച്ചേരണമെന്ന് സംഘാടകർ അഭ്യർത്ഥിച്ചു.