കാലം മായ്ക്കാത്ത മഷിപുരട്ടലിൻ്റെ ഓർമ്മകൾ :ഡോ. കെ.കെ.എൻ. കുറുപ്പ്

കാലം മായ്ക്കാത്ത 

മഷിപുരട്ടലിൻ്റെ ഓർമ്മകൾ

:ഡോ. കെ.കെ.എൻ. കുറുപ്പ്

ഇന്ന് കേരളം പൊതുതിരഞ്ഞെടുപ്പിന്റെ മഹാമേളയിലാണ്. കൊച്ചിയിലെ തിരക്കുകളിൽ നിന്നെല്ലാം ഒരകലം പാലിച്ച്, വോട്ട് ചെയ്യാനായി അഴിയൂർ പഞ്ചായത്തിലെ കോവുക്കൽ കടവിലുള്ള 'പൂമാലികയിൽ' ഞാൻ ഒരു ദിവസം മുൻപുതന്നെ എത്തിച്ചേർന്നു. മരുമകൻ കല്ലാക്കോവിലകത്ത് സുധാകരനും ഭാര്യ ഗീതയ്ക്കുമൊപ്പം പനാട എം.യു.പി. സ്‌കൂളിലെ പോളിംഗ് ബൂത്തിലേക്ക് നടന്നടുക്കുമ്പോൾ, ചുറ്റും കണ്ടുമറന്ന മുഖങ്ങൾ വാത്സല്യത്തോടെ ഓർമ്മകൾ പുതുക്കി. എങ്കിലും, പോളിംഗ് ബൂത്തിൽവെച്ച് വിരലിൽ മഷി പുരളാനായി കൈനീട്ടിയ ആ നിമിഷം, എൻ്റെ മനസ്സ് ആധുനികതയുടെ ആരവങ്ങളെല്ലാം വിട്ട്, ഒരു അൻപതുകളിലേക്കും അറുപതുകളിലേക്കും അറിയാതെ സഞ്ചരിച്ചുപോയി. റിപ്പബ്ലിക് ഇന്ത്യയുടെ പിറവിയിലെ നിഷ്കളങ്കമായ ആവേശവും, ഗ്രാമീണ തിരഞ്ഞെടുപ്പ് കാഴ്ചകളും ഇന്നത്തെ തലമുറയ്ക്ക് ഒരു അദ്ഭുതകഥയായിരിക്കും.

പഴയ കാലത്തിൻ്റെ പ്രതിധ്വനി

: അരിവാളും കതിരും നുകം വെച്ച കാളയും 

1950 ജനുവരി 26 ന് ഇന്ത്യ റിപ്പബ്ലിക്കായ ശേഷം നടന്ന ആദ്യ തിരഞ്ഞെടുപ്പ്, 1952-ലെ ആ ചരിത്രസംഭവം, ഇന്നും മനസ്സിൽ മായാതെ കിടക്കുന്നു. അന്ന് കമ്മ്യൂണിസ്റ്റ് പാർട്ടി ഭരണഘടന അംഗീകരിച്ച് തിരഞ്ഞെടുപ്പിൽ പങ്കെടുത്തത് ഒരു വഴിത്തിരിവായിരുന്നു. കമ്മ്യൂണിസ്റ്റ് പാർട്ടിയുടെ ചിഹ്നമായ അരിവാളും കതിരും കർഷകൻ്റെ പ്രതീക്ഷയായി മാറി. എന്നാൽ, പ്രധാന പാർട്ടിയായിരുന്ന കോൺഗ്രസിൻ്റെ ചിഹ്നമായ നുകം വെച്ച കാള (കന്നുപൂട്ടുന്ന കർഷകൻ) ഗ്രാമങ്ങളിലെ സാധാരണക്കാരൻ്റെ മനസ്സിൽ ഉടക്കി നിന്നു. ഇന്നത്തെ ഇലക്ട്രോണിക് യുഗത്തെക്കുറിച്ച് അന്ന് ആരും ചിന്തിച്ചിട്ടുണ്ടാവില്ല. ഓരോ പാർട്ടിക്കും പ്രത്യേകം പ്രത്യേകം വോട്ടുപെട്ടികൾ ബൂത്തിൽ ഒരുക്കിക്കൊണ്ടായിരുന്നു ജനങ്ങൾ തങ്ങളുടെ ഇഷ്ടം രേഖപ്പെടുത്തിയത്. അന്ന് പഞ്ചായത്തോ ജില്ലാ പഞ്ചായത്തോ ഈ തിരഞ്ഞെടുപ്പിനൊപ്പം ഉണ്ടായിരുന്നില്ല.

ഇലക്ഷൻ വാർത്തകൾ ഗ്രാമങ്ങളിലേക്ക് ഒഴുകിയെത്തിയത് സോഷ്യൽ മീഡിയ വഴിയായിരുന്നില്ല; അത് മെഗാഫോണിലൂടെ ആയിരുന്നു. നേരിയ തകരപ്പാളികൾ വളച്ചുണ്ടാക്കിയ, ഒരറ്റം വീതികൂടിയ ആ ഉപകരണം ശബ്ദം പെരുപ്പിച്ച് ഗ്രാമവീഥികളെ ശബ്ദമുഖരിതമാക്കി. ശബ്ദബഹളമില്ലാത്ത പാതിരാത്രികളിൽ 'പ്രിയപ്പെട്ട നാട്ടുകാരെ' എന്ന് തുടങ്ങുന്ന ആ മെഗാഫോൺ വിളി, ഇന്നത്തെ തലമുറയ്ക്ക് ഒരു കാല്പനികമായ കേട്ടറിവ് മാത്രമാവാം.

ലളിത പ്രചാരണം: ചുമരെഴുത്തും ചായപ്പീടികയും

തിരഞ്ഞെടുപ്പടുക്കുമ്പോൾ കിളച്ചുറപ്പിച്ച മതിലുകളിലും പീടികച്ചുമരുകളിലും ചുമരെഴുത്ത് തുടങ്ങുന്നത് അക്കാലത്തെ പ്രധാന കാഴ്ചയായിരുന്നു. ഓരോ പ്രദേശത്തും ഓരോ പാർട്ടിക്കും വേണ്ടി മുന്നിൽ നിന്ന കലാകാരന്മാർക്ക് വലിയ സ്ഥാനമാണുണ്ടായിരുന്നത്. കൊയ്ത്ത് കഴിഞ്ഞ പാടങ്ങളിലും പറമ്പുകളിലുമായിരുന്നു തിരഞ്ഞെടുപ്പ് യോഗങ്ങൾ അരങ്ങേറിയിരുന്നത്. ഇന്നത്തെ ബഹുവർണ്ണ പോസ്റ്ററുകളോ ഫ്ലക്സുകളോ വിരളം. വാഹന ജാഥകളോ കവലപ്രസംഗങ്ങളോ ഇല്ലാതെ തിരഞ്ഞെടുപ്പ് കാലം കടന്നുപോകുമായിരുന്നു. നാട്ടുമ്പുറങ്ങളിലെ ചായപ്പീടികയുടെ ചുമരുകൾ രാഷ്ട്രീയ ചർച്ചകളുടെ കേന്ദ്രങ്ങളായി മാറി. സ്ഥാനാർത്ഥികൾ പ്രധാന പ്രമുഖ വീടുകളിൽ കയറിയിറങ്ങി നേരിട്ട് വോട്ട് അഭ്യർത്ഥിച്ചു.

ചരിത്ര മുഹൂർത്തങ്ങൾ: എ.കെ.ജി., ഇ.എം.എസ്., നെഹ്റു

ചില വ്യക്തിഗത ഓർമ്മകൾ ചരിത്രത്തിൻ്റെ ഏടുകളായി മനസ്സിൽ മായാതെ കിടക്കുന്നു. കാസർഗോഡ് പാർലമെന്ററി സീറ്റിൽ മത്സരിക്കാൻ വന്ന എ.കെ. ഗോപാലനെ (എ.കെ.ജി.) ഞാൻ ആദ്യമായി കാണുന്നത് ഞങ്ങളുടെ കുട്ടമത്ത് തറവാട്ടിൽ വോട്ടു ചോദിച്ച് ഗൃഹസന്ദർശനത്തിന് എത്തിയപ്പോഴാണ്. അവിടെ നിന്നും ചായസൽക്കാരം കഴിഞ്ഞാണ് അദ്ദേഹം മടങ്ങിയത്.

1956-ൽ കേരള സംസ്ഥാനം പിറന്ന ശേഷം 1957-ലെ അസംബ്ലി തിരഞ്ഞെടുപ്പിൽ നീലേശ്വരത്ത് മത്സരിച്ചു വിജയിച്ച ഇ.എം.എസ്സ് ലോകത്തുതന്നെ ആദ്യമായി ഭരണഘടനാപരമായി അധികാരത്തിലെത്തിയ കമ്മ്യൂണിസ്റ്റ് സർക്കാരിന് നേതൃത്വം നൽകി. അധികാരം ഏറ്റെടുക്കാൻ പോകുന്ന വഴിയിൽ ഇ.എം.എസ്സിന് കുഞ്ഞിപ്പള്ളിക്കടുത്തുള്ള ചിറയിൽപീടികയിലെ നവോദയ വായനശാലയിൽ ഉജ്വലമായ വരവേൽപ്പ് നൽകിയതും, വായനശാലയുടെ ഒന്നാം വാർഷികോത്സവം അദ്ദേഹം ഉത്‌ഘാടനം ചെയ്തതും മറക്കാൻ കഴിയാത്ത ഓർമ്മകളാണ്. ശ്രീ. പി. ചാത്തു, ഇ.എം. നാണുമാസ്റ്റർ, ടി.പി. കണാരൻ തുടങ്ങി ഒരുകൂട്ടം ആളുകൾക്കൊപ്പം ഞാനും ചേർന്നായിരുന്നു ഈ പരിപാടി വിജയിപ്പിച്ചത്. ആവേശം ഒട്ടും ചോരാതെ ആ ചടങ്ങിന് നേതൃത്വം നൽകിയവരിൽ പലരുമിന്നില്ല. ആ കാലത്ത് 21 വയസ്സ് പൂർത്തിയാകാത്തതുകൊണ്ട് എനിക്ക് വോട്ട് ചെയ്യാൻ കഴിഞ്ഞിരുന്നില്ല.

പണ്ഡിറ്റ് ജവഹർലാൽ നെഹ്റു

ആദ്യമായി ചോമ്പാലയുടെ മണ്ണിൽ പ്രസംഗിക്കാനെത്തിയതും

ചരിത്രമുഹൂർത്തമാണ്.

കല്ലും സിമൻ്റും ഉപയോഗിച്ച് കുഞ്ഞിപ്പള്ളി മൈതാനത്ത് നിർമ്മിച്ച ഉയരം കൂടിയ പ്രൗഢോജ്വലമായ പ്രസംഗ മണ്ഡപത്തിൽ ഗോവണിപ്പടികൾ ചവിട്ടിക്കയറിയ നെഹ്റുവിനെ കാണാൻ ആയിരങ്ങളാണ് ഒഴുകിയെത്തിയത്. പ്രദേശത്തെ പ്രമുഖ കോൺഗ്രസ് പ്രവർത്തകനും ഗാന്ധിയനുമായ മുല്ലപ്പള്ളി ഗോപാലൻ്റെ മുഖ്യനേതൃത്വത്തിൽ ചന്തൻ വൈദ്യർ, കൊയിലോത്ത് കുഞ്ഞിക്കണ്ണക്കുറുപ്പ് തുടങ്ങിയ അക്കാലത്തെ ഇവിടുത്തെ കോൺഗ്രസുകാരുടെ നേതൃത്വത്തിലായിരുന്നു ഈ ചരിത്രസംഭവം ചോമ്പാലയിൽ നടന്നത്. നെഹ്രുവിനെ കാണാൻ ഞാനും അമ്മയും സഹോദരിമാരും എല്ലാം നേരത്തെ കാലത്തെ കുഞ്ഞിപ്പള്ളിയിൽ ചെന്നിരുന്നു. 

(പിൽക്കാലത്ത് ഇന്ത്യയുടെ ആഭ്യന്തര സഹമന്ത്രി പഥം വരെയെത്തി യ ശ്രീ. മുല്ലപ്പള്ളി രാമചന്ദ്രൻ, ഈ ചരിത്രസംഭവത്തിന് നേതൃത്വം നൽകിയ മുല്ലപ്പള്ളി ഗോപാലന്റെ മകനാണ്.)

കോഴിക്കോട് മുതൽ തുറന്ന കാറിൽ നെഹ്റുവിൻ്റെ ഡ്രൈവറായി വന്ന മുക്കാളിക്കാരൻ കണ്ണൻ ഡ്രൈവർക്ക് മികച്ച ഡ്രൈവിംഗിനുള്ള അനുമോദന സർട്ടിഫിക്കറ്റ് നെഹ്റു അന്ന് നൽകുകയുണ്ടായി.